Ezequiel 23

Aju tnam Samaria tucꞌix Jerusalén cyerman cyib ex aj il ke

Tzaj yolin Kman wucꞌile ex tma cyjaꞌ: 2 Aya xyal, attok cabe xuꞌj junx cytxuꞌ. 3 Akeju cabe xuꞌj lu kꞌapojxtok ke xi cykꞌon cyib tuꞌn cyyaẍin tuj Ejipt; ex atzun baj xkꞌuꞌyin cyim tnejel maj. 4 Ahola tbi aju tzicbaj (ex atzun in yolin tiꞌj tnam Samaria), atzunju tzꞌinbaj Aholiba tbi (ex atzun in yolin tiꞌj tnam Jerusalén). E jaw wiꞌne te nxuꞌjile, ex e tzaj ncyꞌajale ex nmeꞌjele cyiꞌj. 5 Xi lpeꞌ Ahola tiꞌj juntl xinak acux at tuj ncwente, ex oc t-xoꞌn tgan cyiꞌj ke tyaẍ, akeju soldad aj Asiria. 6 Toclex cyxbalun tbanilxix ẍjulin queꞌyin, cycyakil ke jlu nejenel ke ex cawil ke, cuꞌxun ke tbanilxix che queꞌyin, ex cyjax ke cyibaj chej, 7 xi tkꞌon tib Ahola tuꞌn tyaẍin cyucꞌil keju mas tbanilxix ateꞌ cyxol aj Asiria, ex baj ttzꞌilsan tib tuꞌnju oc ten cꞌulul cywitz ke tilbilal. 8 Mintiꞌ cyaj tcolin tuꞌn tyaẍin, ic tzaꞌn otok tbincha tuj Ejipt. Tej kꞌapojxtok e cub tan nimcu xinak tucꞌil ex atzun e baj xkꞌuꞌyin tnejel maj ke tim, nimxix e yaẍin tucꞌil. 9 Tuꞌntzunju xi nkꞌoꞌne tuj cykꞌab aj Asiria akeju tyaẍ ex otok tzꞌoc t-xoꞌn tgan cyiꞌj, 10 ex atzun ke jlu el kꞌinte t-xbalun; ex xi cyiꞌn ke tal, xinak ex xuꞌj, atzun te cub byoꞌn tuꞌn spad, ex el tkanil cyxol mastl xuꞌj tej tcub tcastiw tuꞌn tlaj tbinchben mya baꞌn.

11 Tcyakil jlu o til Aholiba aju tzꞌinbaj, ex masque icju pero masxix oc jawni twitz ex mas xi tkꞌon tib tuꞌn tyaẍin ic tzaꞌn otok tbincha ttzic. 12 Ax icx te oc t-xoꞌn tgan cyiꞌj aj Asiria, cycyakil ke jlu nejenel ke ex cawil ke, kꞌojlel ke, toclex cyxbalun tbanilxix queꞌyin, cyjax ke cyibaj chej, ex cuꞌxun ke tbanilxix che queꞌyin. 13 El nnicꞌe tiꞌj, icx te otok baj ttzꞌilsan tib ex otok tzꞌoc lpeꞌ tiꞌj tbinchben ttzic. 14 Atzun te, masxix xi tkꞌon tib tuꞌn tyaẍin: O til cyilbilal aj Babilonia tzꞌibamaj ke twitz ja ex cyak che queꞌyin; 15 cycyakil ke jlu ic che queꞌyin ic tzaꞌn ke xjal aj Babilonia maꞌ cyoclen tuꞌn cycawin, toc cꞌalbil cꞌuꞌjbaj cymij ex toc cꞌalbil cywiꞌ maꞌ tkan. 16 Tej tqueꞌyinte cyilbilal aj Babilonia, biꞌx oc t-xoꞌn tgan cyiꞌj ex e jeꞌx t-samaꞌn sanjel tuj Babilonia; 17 e ultzun ke aj Babilonia ex e cub tan tucꞌil, baj cytzꞌilsaꞌn tuꞌn cyyaẍbil. Tejtzun tbaj tzꞌilsaꞌn cyuꞌn, e jeꞌl ticꞌun. 18 Xiꞌxixtzun tkꞌon tib tuꞌn tyaẍin cywitz xjal, xi tyecꞌun t-ximlal skiꞌt tiꞌj, atzun weye el wicꞌune ic tzaꞌn otok tzꞌel wicꞌune aju ttzic. 19 Pero masxix xi tkꞌon tib tuꞌn tyaẍin, ex tzaj tnaꞌn ic tzaꞌn otok tbincha tej matok kꞌapojxtok tej tyaẍin tuj txꞌotxꞌ Ejipt, 20 ex oc t-xoꞌn juntl maj tgan cyiꞌj aj Ejipt akeju jawni che yaẍin.

21 Aya Aholiba o tajbeya tuꞌn tyaẍina ic tzaꞌn o tbinchaya tuj Ejipt tej tbaj xkꞌuꞌyin tima tej kꞌapojxtoka. 22 Cyjaꞌtzun akine Dios in xi nmaꞌne jlu: Che tzajel nsamaꞌne ke tyaẍa kꞌojlel tiꞌja, akeju e jeꞌl ticꞌuna. Tuj tcyakil part che tzajel nsamaꞌne kꞌojlel tiꞌja, ake jlu: 23 ke aj Babilonia, ke aj Caldey, ke aj Pecod, ke aj Soa, ke aj Coa, ex cycyakil aj Siria: Cycyakil ke jlu cuꞌxun ke tbanilxix che queꞌyin, nejenel ke, cawil ke maꞌxix cyoclen, ex cyjax cyibaj chej. 24 Che tzajel kꞌojlel tiꞌja tucꞌil nim cyajlal carwaj ex nim cyajlal soldad; cbajel cytxolban cyib tiꞌja kꞌiꞌmlex cymacbil in ajben tuj kꞌoj, tjax cypas cꞌuxbil, ex kꞌiꞌmlex cymakbil, ex cxel nkꞌoꞌne ambil cye tuꞌn tcub tcastiwoye cyuꞌn, ex cbel ycastiwoya cyuꞌn ic tzaꞌnx cye cyley. 25 Ctzajel nimxix nkꞌoje tiꞌja ex ctzajel nim cytxꞌuꞌjil aj kꞌoj tiꞌja; cꞌelel cykesin ttxaꞌna ax icx ke t-ẍcyina, ex atzun keju che cyjel ankꞌin, byoꞌn che bel tuꞌn spad. Cxel cyiꞌn ke tala xinak ex ke tala xuꞌj, ex te bajsbil cbel tzꞌeꞌya tuꞌn kꞌakꞌ. 26 Cꞌelel cyiꞌn ke t-xbaluna, ex cxel cyiꞌn ke tiꞌxti tbanilxix ex wiꞌyilxix at teya. 27 Cyjaꞌtzun ctelba wuꞌne tiꞌja tuꞌn tcyaj tcolina tyaẍbila ex tcyakilju mya baꞌn pon tcꞌuꞌja tiꞌj tuj Ejipt, ex mlay pontl tcꞌuꞌja tiꞌj tcyakil jlu ex mlay tzaj tnaꞌntla aju tnam Ejipt.

28 Atzun jlu in nmaꞌne, akine Dios: Cxeꞌl nkꞌoꞌna tuj cykꞌab ke nasyon akeju e jeꞌl ticꞌuna, ex mya baꞌn e jeꞌl tuj twitza. 29 Cꞌelel icꞌuna cyuꞌn ex che oquel te tajwil tcyakilju otok tcambaya tuꞌn takꞌunbena, ex cyjel skiteꞌ tiꞌja te jumajx cyuꞌn; cyjel kꞌanchaꞌlin t-ximlala aju ajben tuꞌna tuꞌn tyaẍina, tucꞌix ju mya baꞌn pon tcꞌuꞌja tiꞌj ex aju tyaẍbena. 30 Tcyakil jlu cbajel tiꞌja tuꞌnju xi tkꞌon tiba tuꞌn tyaẍina cyucꞌil ke mastl nasyon, ex baj ttzꞌilsan tiba tuꞌnju cꞌuluna cywitz ke tilbilal nnoꞌc cydiosin xjal. 31 El tcanoꞌna tbinchben ttzica; cyjaꞌtzun ax cꞌabj cxel tcꞌaꞌna tcuꞌx tuj vas ic tzaꞌn te ttzica.

32 Atzun jlu in xi nmaꞌne, akine Dios: Ax cꞌabj cxel tcꞌaꞌna ic tzaꞌn xi tcꞌaꞌn ttzica, tcuꞌx tuj jun vas matij, maꞌ tuj ex maꞌ t-xeꞌ, nojni tuj tuꞌn xmaybil ex tuꞌn icꞌbil,

33 nojni tuj tuꞌn xitbil teya. Ex tuꞌntzun jlu cyjel chyoꞌn twiꞌya ex cyjel cꞌixbiya tuꞌn. Atzun tvas ttzica Samaria.

34 Cxel tcꞌaꞌna ocxi tbaj tuꞌna, ex cbel tbuchina aju vas ex che elel ttzakina ke tima. Akine Dios ma chin kꞌmante ju yol lu.

35 Akine Dios in xi nmaꞌne jlu: Tuꞌnju ma tzicꞌ nnaꞌnjtze tuꞌna ex ma tzꞌajtz tkꞌoꞌna ttzal tiꞌja nwitze, cbel tcastiwoya tuꞌnju pon tcꞌuꞌja tiꞌj nimcu mya baꞌn ex tuꞌn tlaj tyaẍbena.

36 Tzaj tmaꞌn Kman weye cyjaꞌ: Aya xjal, ¿tajpeya tuꞌn tcub tkꞌoꞌna t-sentens Ahola tucꞌix Aholiba? Kꞌmaꞌnca tibaj cywitz aju cybinchben icꞌbilxix. 37 Ake xuꞌj lu ma chin cyaj coline cyuꞌn ex at ticꞌlen chicꞌ tiꞌj cykꞌab tuꞌnju tcublen cybyoꞌn xjal. Ma che oc ten cꞌulul cywitz ke tilbilal, ex ke ncꞌwaꞌle e tzaj cyiꞌj ma tzꞌocx cypatun tuj kꞌakꞌ te nimsabl cye ke tilbilal nnoꞌc cydiosin. 38 Ax icx ma cybincha jlu wiꞌje: Tuj junx kꞌij baj cytzꞌilsaꞌn njaye xjanxix ex ma tzꞌoc cykꞌoꞌn te mintiꞌ tajben ke kꞌij te ojlabl. 39 T-xilenxi cykꞌoꞌn cycꞌwaꞌl te chojbil cywitz ke tilbilal, ax kꞌij e ocx tuj njaye xjan ex baj cytzꞌilsaꞌn. Atzun jlu cybincha tuj njaye.

40 Ex xi cysamaꞌn sanjel txcolte cye ke xinak te najchak, ex e ul ke xinak. Atzun cye ke cabe xuꞌj lu e baj chin, oc cykꞌoꞌn tcꞌaꞌ cywitz ex oc cykꞌoꞌn ke tiꞌxti tbanilxix cyiꞌj, cyucꞌix ke tiꞌxti wiꞌyilxix, tuꞌntzun cycꞌmet ke xinak cyuꞌn; 41 e cub keꞌ twiꞌ jun watbil tbanilxix, ex cub cykꞌoꞌn jun mes cywitz, tibajtzun ju mes lu cub cykꞌoꞌn storac ex aseyt aju xjansaꞌmaj tuꞌn tajben weye. 42 O binjtz in che schꞌin nimcu xjal in che icꞌsan ninkꞌij; atzun ke xinak otok che ul tzajni ke tuj tzkij txꞌotxꞌ, oc cykꞌoꞌn tkul kꞌabaj tiꞌj cykꞌab ke cabe xuꞌj ex jax cykꞌoꞌn coron tbanilxix tuj cywiꞌ. 43 Atzun weye o nmaye: ¿Ocpetzun che yaẍil ke xinak lu cyucꞌil ke xuꞌj akeju ojtxi tzyet cyuꞌn tuꞌn cyyaẍin? 44 Porque ma che ul tucꞌil Ahola ex tucꞌil Aholiba tuꞌn cycub tan cyucꞌil, ic tzaꞌn in che ul xjal cyucꞌil ke xuꞌj jawni cywitz cyucꞌil xinak, ke xuꞌj lu jumajx mya baꞌn ke. 45 Pero ake xinak tzꞌaklxix cbel cykꞌoꞌn cysentens ke xuꞌj lu jawni cywitz cyucꞌil xinak, ax cysentens cbel ic tzaꞌn cysentens ke xuꞌj jawni cywitz cyucꞌil xinak ex byol xjal ke. Porque in che yaẍin ex byol xjal ke.

46 Atzun jlu in tmaꞌn Kman: E tjaw cychmon cyib xjal kꞌojlel cyiꞌj, e ttzaj cyxobil cyuꞌn ex e t-xi cyelkꞌaꞌn aju at cye; 47 che oquel xoꞌn tuꞌn abj cyuꞌn ke aj kꞌoj cyiꞌj ex che bel byoꞌn tuꞌn spad; che bel byoꞌn ke cyal xinak ex ke cyal xuꞌj, ex cꞌoquel kꞌoꞌn tkꞌakꞌal cyja. 48 Cbel naj wuꞌne aju mya baꞌn in binchanjtz tuj tnam lu. Cyjaꞌtzun ctzajel tchi cyiꞌj cycyakil xuꞌj ex mlay che oc lpeꞌtl tiꞌj cybinchben mya baꞌn. 49 Atzun cyeye akeye cabe xuꞌj, oc cycꞌmaye castiw tiꞌj cybinchbene mya baꞌn ex tiꞌj ju il cybinchaye tej cycꞌulune cywitz ke tilbilal. Cꞌeleltzun cynicꞌe tiꞌj, akine Dios.