Aju nimcu mya baꞌn cybincha aj Jerusalén
22
Tzaj yolin Kman wucꞌile ex tma cyjaꞌ: 2 Aya xjal, kꞌoncuya t-sentens tnam nojni tuꞌn byol xjal. Kꞌmanxa tcyakil cybinchben mya baꞌn ex icꞌbilxix, 3 ex cxel tmaꞌna cye cyjaꞌ: Atzun jlu in tmaꞌn Kman: Akeye aj Jerusalén in cub cybyoꞌn cyxjalile ex in cub cybinchaꞌne ke tilbilal te cydiose, tuꞌn jlu in baj cytzꞌilsan cyibe, chꞌix tul canun or tuꞌn cynaje. 4 Tuꞌnju tcublen cybyoꞌne xjal ma che oque at cyile, ex cyuꞌn ke tilbilal in cub cybinchaꞌne ma baj cytzꞌilsan cyibe; tuꞌnju mya baꞌn in bant cyuꞌne ma tzul lakꞌeꞌ or tuꞌn cynaje ex ma pon baj cykꞌijlalile. Cyjaꞌtzun cxel nkꞌoꞌne ambil tuꞌn cyoc yasoꞌne cyuꞌn mastl tnam ex tuꞌn cyoc xmayine cyuꞌn cycyakil nasyon. 5 Ke nasyon nikayin ateꞌ ex keju najchak ateꞌ oc che xmayil cyiꞌje tuꞌnju mya baꞌn yolbil cyeye ex mya tuj tumel cybinchbene. 6 Ke cawil cyxol aj Israel, tuꞌnju at cyoclen, in cub cybyoꞌn nimcu xjal. 7 Ke xjal najlke tuj tnam Jerusalén nneꞌl cyicꞌun cyman ex cytxuꞌ, in cybinchaꞌn mya baꞌn cyiꞌj ke stranjer xjal, in baj cyyajlaꞌn ke xjal mintiꞌ cyman ex cytxuꞌ ex ke meba xuꞌj. 8 Mya xoꞌn cyuꞌn ke lugar xjansaꞌmaj wuꞌne ax icx ke kꞌij te ojlabl. 9 Tuꞌn siꞌmj yol in che cyim xjal cyuꞌn; in che waꞌn tiꞌj jun nintz waꞌn in cub icꞌsan cywiꞌ ke witz te nimsabl cye tilbilal, ex in cybinchaꞌn aju puro plojxix. 10 At junjun in che yaẍin tucꞌil t-xuꞌjil cyman, ex ka cyucꞌil ke xuꞌj tuj tkꞌijlalil oc in cꞌuꞌl ẍwoꞌj cyiꞌj. 11 At junjun in cybinchaꞌn aj pajil tucꞌil t-xuꞌjil cyucꞌil, ex junjuntl in che cub tan tucꞌil cylib, a jlu chꞌixbajilxix, ex junjuntl in che yaẍin tucꞌil tmeꞌjel cyman. 12 At junjun aj Jerusalén in cycꞌmoꞌn pwak tuꞌn tcub cybyoꞌn ke xjal, ex at junjun in xi cykꞌoꞌn cypwak te chꞌex pero nim taꞌl nneꞌl cyiꞌn, in baj cyyajlaꞌn ke cyucꞌil tuꞌn cyoc te kꞌinun, ex nnicꞌ nnaꞌnjtze cyuꞌn. Akine Dios in chin kꞌmante jlu.13 Nim in chin kꞌojine cyiꞌje tuꞌn tlaj in baj cyyajlaꞌne ke xjal ex tuꞌn tlaj ju in cub cybyoꞌne ke xjal. 14 ¿Cꞌicꞌexpe cyuꞌne ex ctelpe tipun cykꞌabe oc tpon tkꞌijlalil tuꞌn tcub cycastiwoye wuꞌne? Akine Dios in chin kꞌmante jlu ex cjapunel wuꞌne: 15 Che xel nsputune cyuj cycyakil nasyon ex cyuj cycyakil tnam, ex cbajel ntxꞌjoꞌne tcyakilju cytzꞌilile. 16 Ctzajel cychꞌixwiye cyxol ke nasyon, ex cꞌelel cynicꞌe tiꞌj, akine Dios.
17 Tzaj yolin Kman wucꞌile ex tma cyjaꞌ: 18 Ic cyten aj Israel te weye ic tzaꞌn tzꞌis in jaw tibaj kꞌan cꞌuxbil, estaño, cꞌuxbil, plom ex ka sak pwak, oc tocx kꞌoꞌn tuj kꞌakꞌ. 19 Cyjaꞌtzun akine Dios in xi nmaꞌne jlu: Tuꞌnju cycyakile ma che oque ic tzaꞌn tzꞌis mintiꞌ tajben, cyjaꞌtzun che oquel nchmoꞌne tuj tnam Jerusalén, 20 ic tzaꞌn sak pwak, kꞌan cꞌuxbil, cꞌuxbil, plom ex estaño junx in che ocx kꞌoꞌn tuj kꞌakꞌ ex in jaw xupit kꞌakꞌ cyiꞌj tuꞌn cycub ulj, cyjaꞌtzun weye ctzajel nim nkꞌoje, che oquel nchmoꞌne tuj tnam ex che bel ulje wuꞌne. 21 Ax toc ctzajel nim nkꞌoje ex cjawil nxupine kꞌakꞌ cyiꞌje, ex che oquel nchmoꞌne tuj tnam tuꞌntzun cycub ulje tuꞌn kꞌakꞌ. 22 Ic tzaꞌn in cub ulj sak pwak tuj kꞌakꞌ, cyjaꞌxtzun che bel ulje tuj tnam, ex cyjaꞌtzun cꞌelel cynicꞌe tiꞌj, akine Dios ma tzaj nim nkꞌoje cyiꞌje.
23 Tzaj yolin Kman wucꞌile ex tma cyjaꞌ: 24 Aya xjal, kꞌmanxa cye aj Israel cyjaꞌ: Aju cytanmiye tcub jun castiw tibaj, mintiꞌ in tzaj jbal ex mintiꞌ aꞌ tuj, 25 ke cawil ateꞌ cyxole ic cyten ic tzaꞌn balun in che tzanun ex in baj cytzakan cycanb; tuj cytanmi in cub cybyoꞌn ke xjal, nneꞌl cyelkꞌaꞌn cykꞌinumabl xjal ex in che cyaj ten nimcu xuꞌj meba cyuꞌn tuꞌnju otok cub cybyoꞌn cychmil. 26 Ke pal ateꞌ tuj tnam lu in baj cychꞌexpuꞌn ke nleye ex in baj cytzꞌilsaꞌn ke tiꞌxti xjansaꞌmaj wuꞌne; tuj cywitz junx taꞌ ju xjan tucꞌil ju tzꞌil, ex mintiꞌ in cykꞌoꞌn xnakꞌtzbil cye xjal tuꞌn tel cynicꞌ tiꞌj alcye sak ex alcye tzꞌil. Mintiꞌ in xi cyniman aju kꞌij te ojlabl ex mintiꞌ ma chinx cyniman. 27 Ke nejenel tuj tnam lu ic cyten ic tzaꞌn ke xoꞌj in baj cytzakan cycanb, banin cyten tuꞌn cycub cybyoꞌn ke xjal tuꞌntzun cyoc te kꞌinun. 28 Keju nnoꞌc cykꞌon cyib te nsanjele in cub cyewan aju il in bant cyuꞌn xjal; ic tten jlu ic tzaꞌn nnoꞌc kꞌoꞌn tcꞌaꞌ jun tcajonil ja; in cymaꞌn ka at in tzaj yecꞌun cye ic tzaꞌn tuj witzicꞌ ex in cymaꞌn tkanil ju tzul pero mintiꞌ in japun. Ex in cycyuwsaꞌn ka akine in chinx kꞌmante ju yol cye, ex mintiꞌ we in chin yolin cyucꞌil. 29 Ke xjal ateꞌ tuj tnam in baj cyyajlaꞌn ke cyucꞌil ex in che elkꞌan; nneꞌl cyiꞌn ke tiꞌxti at cye meba xjal ex cye keju mintiꞌ at cye; in cub cyyajlaꞌn ke stranjer xjal ex mintiꞌ in xi cybinchaꞌn cyiꞌj. 30 O chin jyone tiꞌj jun xjal cyxol aj Jerusalén tuꞌn tjaw tbinchaꞌn aju muro jatum otok cub xitj, ex tuꞌn tcub ten nwitze tuj tpaꞌxil, tuꞌntzun miꞌn tnaj tnam wuꞌne, pero mintiꞌ o cnet jun wuꞌne. 31 Cyjaꞌtzun ma cub cycastiw wuꞌne ex ma che naj wuꞌne tuꞌn nkꞌoje mer ic tzaꞌn kꞌakꞌ, tuꞌn tlaj cybinchben mya baꞌn. Akine Dios in chin kꞌmante jlu.