Aju t-spad Kman
21
Tzaj yolin Kman wucꞌile ex tma cyjaꞌ: 2 Aya xjal, queꞌyinxa tumlal tnam Jerusalén ex kꞌmanxa tyola cyiꞌj ke lugar jatum in che cꞌulun xjal. Kꞌmanxa aju yol cxel nmaꞌne teya tiꞌj txꞌotxꞌ Israel, 3 ex kꞌmanxa cyjaꞌ: Atzun jlu in tmaꞌn Kman: Ma chin oque aj kꞌoj cyiꞌje. Cjawitz wiꞌne nspadiye tuj tjayil ex che bel nbyoꞌne ke xjal tzꞌaklxix ex ke aj il. 4 Ax toc cjawitz wiꞌne nspadiye tuj tjayil tuꞌn cycub nbyoꞌne cycyakil xjal tzꞌaklxix ex cycyakil aj il, cxelx keꞌ wuꞌne tuj txꞌotxꞌ tuj tbankꞌab kꞌij ex cpol baj wuꞌne tuj txꞌotxꞌ tuj tnayaj kꞌij. 5 Cꞌelel cynicꞌ cycyakil xjal tiꞌj, akine Dios otok chin jatz kꞌinte nspadiye tuj tjayil, ex mlayx txi ncꞌuꞌntle.6 Aya xjal, tjaw ayayana cyuwxix tuꞌn taꞌw bis, tjaw ayayana cywitz ke xjal. 7 Katzun ma tzaj cykanin teya: ¿Tikuꞌn in ayayana? ka che chi, kꞌmanxa cye cyjaꞌ: In chin ayayane tuꞌn tlaj tkanil tiꞌj jun chꞌix tul canun, ex cycyakil xjal che cyjel ten mintiꞌ cyipun ex che elel bakchaj cykꞌab; mi jun ctel tipun, cycyakil ctzajel luꞌlun cykan tuꞌn cyxobil. Chꞌix tul canun jlu, chicuya cye. Akine Dios in chin kꞌmante jlu.
8 Tzaj yolin Kman wucꞌile ex tma cyjaꞌ: 9 Aya xjal, kꞌmanxa aju yol cxel nmaꞌne teya, atzun jlu in tmaꞌn Kman chicuya cye xjal:
Banimaj ttzi spad ex jakumaj tiꞌj.
10 Banimaj ttziꞌ tuꞌn cybyet xjal tuꞌn, ex jakumaj tiꞌj tuꞌn tkoptzꞌaj. Mlay ko tzalaj tiꞌj jlu porque ma tzꞌel icꞌun tvar ncyꞌajale mer ic tzaꞌn nok alcyex jun tzeꞌ;
11 baj jakuꞌn tiꞌj tuꞌn ttzyet tuꞌn kꞌabaj. Banimaj ttziꞌ ex jakumaj tiꞌj tuꞌn tocx kꞌot tuj tkꞌab byol xjal.
12 Atzun teya xjal, tjaw schꞌina ex tjaw okꞌa, porque aju spad banin tten tuꞌn cycub byoꞌn ke xjal etzan wuꞌne, cyucꞌix cycyakil keju in che cawin cyxol aj Israel. Banimaj cysentens tuꞌn cycyim junx cyucꞌil ke xjal etzan wuꞌne; cyjaꞌtzun kꞌajtzaꞌn oca ttzi t-xuꞌca tuꞌn bis.
13 Ax toc che oquel xjal tuj malbil. Yajtzun ka ma tzꞌel icꞌun tvar ncyꞌajale ex ka miꞌn xcyaj ten, ¿titzun cꞌoquel? Akine Dios in chin kꞌmante jlu.
14 Aya xjal, kꞌmanxa cye aju yol cxel nmaꞌne teya; yucunxa t-spadiye elaꞌ maj tucꞌil nim tkꞌoja. Atzun tajben spad lu tuꞌn cybyet xjal tuꞌn, puro xobajilxix oc tbiyan, ex nnoꞌc t-xobtzaꞌn xjal tuj tcyakil part.
15 Tuꞌn spad lu ctzajel cyxobil xjal ex che cymel nim xjal tuꞌn tuj tcyakil ja. Cpol ju spad wuꞌne tuꞌn cycyim xjal tuꞌn. Aju spad jakumaj tiꞌj tuꞌn tkoptzꞌaj tiꞌj ex banimaj ttziꞌ tuꞌn cybyet xjal tuꞌn.
16 Aya spad, byoncuya ke xjal ateꞌ tuj bankꞌabaj ex tuj nayaj ex cyuj cycyakil pacꞌ.
17 Ax icx weye cxel nyucune ju spad ocxi tjatz baj nkꞌoje. Akine Dios in chin kꞌmante jlu.
18 Tzaj yolin Kman wucꞌile ex tma cyjaꞌ: 19 Kꞌoncuya techal cabe be, tuꞌntzun tbet ju rey te Babilonia tuj, tucꞌix t-spad. Cycabil be il tiꞌj tuꞌn cyex jlet tuj junx tnam, ex jatum in xi keꞌ junjun be, cbel tkꞌoꞌna jun techal tuꞌn tkꞌmante alcye tnam in pon ju be. 20 Baꞌn tuꞌn tcub tkꞌoꞌna techal be jatum tuꞌn t-xi bet rey tucꞌil t-spad. Jun techal cbel tkꞌoꞌna tiꞌj ju be in xiꞌ tuj tnam Rabá cye aj Amón, atzun juntl techal cbel tkꞌoꞌna tiꞌj ju be in xiꞌ tuj tnam Jerusalén, aju tnam toc muro tiꞌj tuj txꞌotxꞌ Judá. 21 Aju rey te Babilonia cbel ten kꞌil swert jatum in che tzaj keꞌ ke cabe be: che bajel tyucun ke plech, cꞌoquel ten kanil xjel cye ke tilbilal, ex cbajel tqueꞌyin tuj cycꞌuꞌj ke alumaj, aju cytxꞌotxꞌ tbi. 22 Tuj tbankꞌab cꞌoquex ten aju plech in tyecꞌun tiꞌj tnam Jerusalén, ex atzun t-xilen jlu: Il tiꞌj tuꞌn toc tzokpaj tiꞌj cyucꞌil ke macbil te kꞌojbil, ex tuꞌn t-xi tkꞌoꞌn orden tuꞌn cybyet xjal, tuꞌn cyjaw schꞌin oc toc kꞌoj, tuꞌn cyoc tzokpaj cyiꞌj ke tlamel tnam, tuꞌn tjaw cybinchaꞌn cyxweꞌtzbil tiꞌj ex tuꞌn tbaj cytxolban cyib tiꞌjele. 23 Tuj cywitz ke xjal najlke tuj Jerusalén mya ax toc aju tkanil lu, tuꞌnju otok bant tiꞌj jun cyyol tucꞌil rey te Babilonia. Atzunte rey ctzajel tnaꞌn aju cybinchben mya baꞌn, ex che tzyetel tuꞌn. 24 Cyjaꞌtzun akine Dios in xi nmaꞌne jlu: Ke cybinchbene mya baꞌn ex plojxix ma che el tuj kꞌanchaꞌl; ma tzꞌel tuj kꞌanchaꞌl aju il in bant cyuꞌne tuj tcyakilju in cybinchaꞌne. Cyjaꞌtzun che tzyetele tuꞌn cyxi kꞌiꞌne pres. 25 Atzun teya nejenel cye aj Israel, jumajx tkꞌon tiba tuꞌn tbinchanteya mya baꞌn, lu in lakꞌex ttzaj tkꞌijlalil tuꞌn tcꞌmonteya aju castiw cyuwxix. 26 Akine Dios in xi nmaꞌne jlu: Cꞌelel kꞌiꞌn cꞌalbil twiꞌya, cbeletz kꞌiꞌn coron tjax tuj twiꞌya, ex tcyakil cchꞌexpetel; keju chꞌin cyoclen che oquel te maꞌ cyoclen ex atzun keju maꞌ cyoclen che oquel te mintiꞌ cyoclen. 27 Tcyakil biꞌx cbel xitj ex mlay jaw binchaꞌn juntl maj; maxi cjawil binchaꞌn juntl maj ocxi tul aju xinak at toclen tuꞌn tjaw tbinchaꞌn. Ex tetzun cxel nkꞌoꞌne oclenj.
Ctzajel castiw cyibaj aj Amón
28 Aya xjal, kꞌmanxa cye aj Amón aju yol cxel nmaꞌne teya: Tuꞌnju in che xmayin cyiꞌj aj Israel, lu spad ma jatz tuj tjayil banin tten tuꞌn cybyet xjal tuꞌn ex jakumaj tiꞌj tuꞌn tkoptzꞌaj ex tuꞌn cynaj xjal tuꞌn. 29 Mya ax toc aju in tzaj yecꞌun cye ic tzaꞌn tuj witzicꞌ, ex aju tkanil in cymaꞌn tiꞌj ju tzul puro nicꞌaj yol. Tuꞌn spad cꞌelel tamtzꞌuꞌn cywiꞌ ke xjal akeju jumajx cykꞌon cyib tuj mya baꞌn. Chꞌix tul lakꞌeꞌ tkꞌijlalil tuꞌn tcub cycastiw.
30 Cykꞌon cuꞌxe cyspadiye tuj tjayil. Che najelxe wuꞌne twitz ju txꞌotxꞌ jatum e itzꞌje ax tuj cytanmiye, 31 ctzajel nkꞌoje cyibaje ic tzaꞌn jun kꞌakꞌ xobajilxix; ex che xel nkꞌoꞌne tuj cykꞌab ke xjal txꞌuꞌj cywiꞌ ex byol xjal ke. 32 Cꞌoquel tkꞌakꞌal cytanmiye ex cbel xitun, cꞌelel bet cychcꞌele tuj tcyakil txꞌotxꞌ, ex mi jun tzul naꞌnte cyeye. Akine Dios ma chin kꞌmante jlu.