8 Atzun cye jaw cyiꞌn cyib wiꞌje, ex mintiꞌ cyajbe tuꞌn t-xi cybiꞌn nyole; ex mintiꞌ cyaj cycolin ke tilbilal nnoꞌc cydiosin, akeju icꞌbilxix, ex mintiꞌ cyaj cycolin ke tilbilal ateꞌ tuj Ejipt. Cub nximane tuꞌn ttzaj nkꞌoje cyiꞌj, ex tuꞌn tcub cycastiw wuꞌne tuj Ejipt ocxi tjatz baj nkꞌoje. 9 Pero mintiꞌ o nbinchaye icju tuꞌntzun mi tyolinjtz mya baꞌn wiꞌje cyuꞌn ke nasyon jatum najlkeꞌtok, porque cywitz ke nasyon lu o txi nyecꞌun wibe cye ex o txi ntziyane cye tuꞌn cyetz wiꞌne tuj Ejipt. 10 E jeꞌtz wiꞌne tuj Ejipt ex e jeꞌx wiꞌne tuj tzkij txꞌotxꞌ. 11 Atzun xi nkꞌoꞌne ke nleye cye cyucꞌix ke nmandamyente; in cykꞌoꞌn jlu cychwinklal xjal ka ma che japun cyuꞌn. 12 Ax icx xi nmaꞌne cye tuꞌn cyojlan tuj kꞌij te ojlabl, a jlu tuꞌn tajben te jun techal tiꞌj ju yol otok cyaj bant tiꞌj wuꞌne cyucꞌil, tuꞌntzun ttzaj cynaꞌn akine Dios o chin el paꞌnte cye tuꞌn cyoc te weye. 13 Jawtzun cyiꞌn cyib wiꞌje tuj tzkij txꞌotxꞌ, ex mintiꞌ xi cyniman ke nleye; el cyicꞌun ke nmandamyente, akeju otok txi nkꞌoꞌne cye tuꞌn tten cychwinklal ka ma che japun cyuꞌn, ex oc cykꞌoꞌn te mintiꞌ tajben aju kꞌij te ojlabl. Cubtzun nximane tuꞌn tjatz baj nkꞌoje cyiꞌj ex tuꞌn cynaj wuꞌne te jumajx tuj tzkij txꞌotxꞌ. 14 Pero mintiꞌ nbinchaye icju tuꞌntzun miꞌn tyolinjtz mya baꞌn wiꞌje cyuꞌn ke nasyon, akeju otok cyil tzaꞌn tten otok che etz wiꞌne ke aj Israel tuj Ejipt.

15 Ax icx xi nmaꞌne cye jun yol axix toc tuj tzkij txꞌotxꞌ, tuꞌn miꞌn cyocx tuj txꞌotxꞌ otok txi ntziyane cye, aju txꞌotxꞌ lu kꞌinun txꞌotxꞌ ex tbanilxix, ex mas tbanil cywitz mastl txꞌotxꞌ, 16 xi nmaꞌne cye icju tuꞌnju el cyicꞌun ke nmandamyente, mintiꞌ xi cyniman ke nleye ex oc cykꞌoꞌn te mintiꞌ tajben aju kꞌij te ojlabl, ex oꞌcx oc ten cycꞌuꞌj cyiꞌj ke tilbilal nnoꞌc cydiosin. 17 Masque icju pero tzaj kꞌakꞌan ncꞌuꞌje cyiꞌj ex mintiꞌ e naj wuꞌne tuj tzkij txꞌotxꞌ. 18 Tuj tzkij txꞌotxꞌ xi nmaꞌne cye cycꞌwaꞌl tuꞌn miꞌn tel cycanoꞌn tiꞌj ju in cybinchaꞌn cyman ex tuꞌn miꞌn t-xi cyniman aju ctzajel cymaꞌn cyman, ex tuꞌn miꞌn tbaj cytzꞌilsan cyib cyuꞌn ke tilbilal nnoꞌc cydiosin cyman. 19 Xi nmaꞌne cye cyjaꞌ: Akine Cymane aju Cydiose. Japunx ke nleye ex ke nmandamyente cyuꞌne, 20 cynimanxe ke kꞌij te ojlabl tuꞌn tajben te jun techal tiꞌj yol cyaj bant tiꞌj wuꞌne cyucꞌile; cyjaꞌtzun cꞌelel cynicꞌe tiꞌj, akine Cymane aju Cydiose, nchiye cye.

21 Pero ax icx ke cycꞌwaꞌl jaw cyiꞌn cyib wiꞌje. Mintiꞌ xi cyniman ke nleye ex mintiꞌ e japun ke nmandamyente cyuꞌn, aju in tkꞌoꞌn cychwinklal ka ma japun cyuꞌn, ex oc cykꞌoꞌn te mintiꞌ cyajben ke kꞌij te ojlabl. Cubtzun nximane tuꞌn ttzaj nkꞌoje cyiꞌj ex tuꞌn cynaj te jumajx wuꞌne tuj tzkij txꞌotxꞌ tuꞌntzun tjatz baj nkꞌoje. 22 Pero mintiꞌ o nbinchaye icju tuꞌntzun miꞌn tyolinjtz mya baꞌn wiꞌje cyuꞌn ke nasyon akeju otok cyil tej cyetz wiꞌne tuj Ejipt. 23 Tuj tzkij txꞌotxꞌ xi nmaꞌne jun yol axix toc cye: Oc che bajel nsputune tuj tcyakil nasyon twitz txꞌotxꞌ, 24 tuꞌnju mintiꞌ e japun ke nmandamyente cyuꞌn, el cyicꞌun ke nleye, oc cykꞌoꞌn te mintiꞌ tajben ke kꞌij te ojlabl ex oꞌcx e cꞌulun cywitz ke tilbilal akeju in che cꞌulun cyman cywitz. 25 Cyjaꞌtzun e jeꞌx nkꞌoꞌne ke ley mya baꞌn cye ex ke mandamyent mintiꞌ cyankꞌibl cyuꞌn. 26 Xi nkꞌoꞌne ambil cye tuꞌn tbaj cytzꞌilsan cyib, tej t-xi cyiꞌn cyoyaj cywitz ke tilbilal ex cub cypatun tnejel cycyꞌajal te chojbil. O nbinchaye jlu tuꞌn ttzaj tchi cyiꞌj ex tuꞌn tel cynicꞌ tiꞌj, akine Dios.

27 Atzun teya xjal, kꞌmanxa cye aj Israel: Atzun jlu in tmaꞌn Kman: Ax icx tiꞌj jlu ke ktzan cymane o tzꞌel cypaꞌn cyib wiꞌje ex mintiꞌ o japun nyole cyuꞌn. 28 Tej cypon wiꞌne tuj txꞌotxꞌ otok txi ntziyane cye, nok oc tcyil jun tal witz ex ka jun tzeꞌ nim t-xak, atzun xi cykꞌoꞌn chojbil tucꞌix cyoyaj aju nimxix in tzaj nkꞌoje tuꞌn, ax icx atzun cub cykoꞌn perjum at tcꞌocꞌjal ex cub cykꞌoꞌn cyoyaj taꞌl twitz uva. 29 Xitzun nkanine cye: ¿Ti t-xilen ju tal witz jatum in cheꞌx aje cꞌulul? Nchiye cye. Ex oc kꞌoꞌn tbi lugar lu, Lugar jatum in che cꞌulun ke xjal mya ocslal, ex ax tbi toc jaꞌlo.

30 Kꞌmanxa cye aj Israel cyjaꞌ: Atzun jlu in tmaꞌn Kman: ¿Tikuꞌn ma baj cytzꞌilsan cyibe ic tzaꞌn o cybincha ktzan cyxeꞌchele? ¿Tikuꞌn mintiꞌ ma chinx cynimane ex ma che oc tene cꞌulul cywitz ke tilbilal icꞌunxix wuꞌne? 31 Oc in xi cykꞌoꞌne cyoyaje ex oc nnoꞌcx cypatune cycꞌwaꞌle tuj kꞌakꞌ te chojbil, tuꞌn jlu cucx tbaj cytzꞌilsan cyibe cyuꞌn ke tilbilal. ¿Jacupe txi ntzakꞌweꞌne cyxjele tuꞌnju cytene icju, akeye aj Israel? Akine Dios in xi nmaꞌne jun yol axix toc, mlay txi ntzakꞌweꞌne cyxjele. 32 Mlay japun cyximbetze tuꞌn cyoque ic tzaꞌn ke mastl nasyon twitz txꞌotxꞌ, akeju in che cꞌulun twitz tzeꞌ ex twitz abj. 33 Akine Dios cxel nmaꞌne jun yol axix toc: Tucꞌil nim wipumale ex tucꞌil nim ntxꞌuꞌjile chin cawile cyibaje. 34 Che ajetz wiꞌne cyxol ke nasyon jatum cysputun cyibe ex che oquel nchmoꞌne tucꞌil nim wipumale ex tucꞌil nim ntxꞌuꞌjile. 35 Che xel wiꞌne tuj tzkij txꞌotxꞌ cye tnam, ex atzun cbel cycastiwoye wuꞌne, 36 ic tzaꞌn tej tcub cycastiw ktzan cyxeꞌchele wuꞌne ojtxi tuj tzkij txꞌotxꞌ Ejipt. Akine Dios in chin kꞌmante jlu. 37 Cheba che bajel wajlaꞌne ic tzaꞌn jun pastor in baj tajlaꞌn ke t-ẍneꞌl, ex cbantel wuꞌne tuꞌn t-xi cynimane ju yol cyjel bant tiꞌj wuꞌne cyucꞌile. 38 Che elel npaꞌne cyiꞌje keju in jaw cyiꞌn cyib wiꞌje, ex keju o tzꞌel cypaꞌn cyib wiꞌje che eletz wiꞌne tuj cytxꞌotxꞌ stranjer xjal jatum najlke jaꞌlo; atzun cye mlay che ocx tuj cytxꞌotxꞌ aj Israel. Cꞌeleltzun cynicꞌe tiꞌj, akine Dios. 39 Akeye aj Israel, atzun jlu in tmaꞌn Kman: Ka cycꞌiꞌye tuꞌn cynimane weye, cyxiꞌye cꞌulul cywitz ke tilbilal akeju nnoꞌc cydiosine, pero te tibajxi che nimale weye, ex mlay tzꞌoc cykꞌoꞌntle nbiye xjan te mintiꞌ tajben tuꞌnju oyaj in bant cyuꞌne, ex tuꞌnju in che cꞌulune cywitz ke tilbilal. 40 Cycyakil aj Israel che cꞌulul weye twi witz xjansaꞌmaj wuꞌne, twi witz maꞌ twaꞌl at cyxol aj Israel, aju tcub tuj txꞌotxꞌ etzan wuꞌne. Akine Dios in chin kꞌmante jlu: Atzun che cꞌmetel wuꞌne tucꞌil tzalajbil; atzun cxel nkanine cye tuꞌn ttzaj cyiꞌn oyaj weye, ex tuꞌn ttzaj cyiꞌn aju tnejel twitz cyawal in jaw ex cycyakil cyoyaj cbajel cyxjansaꞌn tuꞌn toc te weye. 41 Octzun cyajtz wiꞌne cyxol ke tnam ex cyxol ke nasyon jatum cysputun cyib jaꞌlo, ex oc cyoc nchmoꞌne juntl maj, che cꞌmeteltzun wuꞌne ic tzaꞌn jun oyaj at tcꞌocꞌjal, ex cywitz cycyakil nasyon cxel nyecꞌun wibe ka xjan kine.

42 Octzun cypon wiꞌne tuj txꞌotxꞌ Israel, aju txꞌotxꞌ otok txi ntziyane tuꞌn t-xi nkꞌoꞌne cye ktzan cyxeꞌchele, cꞌeleltzun cynicꞌe tiꞌj, akine Dios. 43 Atzun tzul tiꞌj cycꞌuꞌje tcyakilju cybinchbene mya baꞌn aju otok baj cytzꞌilsan cyibe tuꞌn, ex ctzajel cychꞌixwiye cyiꞌjxe tuꞌn tlaj nimcu mya baꞌn otok cybinchaye. 44 Akeye aj Israel, oc nbinchaꞌye xtalbil cyeye tuꞌn tjaw nimsaꞌn nbiye, ex mlay cub cycastiwoye wuꞌne ic tzaꞌn cybinchbene mya baꞌn ex plojxix, cꞌeleltzun cynicꞌe tiꞌj, akine Dios, chi Kman Dios.

45 Tzaj yolin Kman wucꞌile ex tma cyjaꞌ:

46 Aya xjal, queꞌyinxa tumlal txꞌotxꞌ tuj tnayaj kꞌij, kꞌmanxa tyola tiꞌj, kꞌmanxa aju yol cxel nmaꞌne teya tiꞌj chcꞌul at tuj tnayaj kꞌij, 47 ex kꞌmanxa cyjaꞌ: Atzun jlu in tmaꞌn Kman: Akine chin oquel koptzꞌinte kꞌakꞌ tiꞌja ex che bajel tzꞌeꞌy cycyakil ke tzeꞌ chaꞌx ex tzkij tuꞌn; ccꞌantel kꞌakꞌ ex mlayx yupj, ex cbajel tzꞌeꞌy cywitz cycyakil xjal tuꞌn, cxel keꞌ tuj txꞌotxꞌ tuj tbankꞌab kꞌij, max cpol baj tuj txꞌotxꞌ tuj tnayaj kꞌij. 48 Ex oc cyilaꞌ cycyakil xjal, akine Dios otok chin oc kꞌonte kꞌakꞌ tiꞌj, ex aju kꞌakꞌ lu mlayx yupj, chi Dios.

49 Xi ntzakꞌweꞌne: Ay Nman, ke xjal lu in cymaꞌn wiꞌje cyjaꞌ: Aju yol in tmaꞌn xjal lu, mi jun nneꞌl tnicꞌ tiꞌj, che chi.