Tzaj yecꞌun te Ezequiel tuꞌn tcub cycastiw aj Jerusalén
9
Te tibajxi o nbiye jun tkꞌajkꞌajel cyuwxix wen chi cyjaꞌ: Che lakꞌetze akeye che bel kꞌonte cycastiw ke xjal najl tuj tnam, teyle te junjun cyeye kꞌiꞌn tmacbil in ajben tuj kꞌoj tuꞌn tajben te xitbil, chi tkꞌajkꞌajel.2 O wile tej cyoctz kak xinak ttzi ja tjaw jawni, aju xiꞌyni twitz tumlal tuj tbankꞌab kꞌij, teyle te junjun kꞌiꞌn jun tmacbil in ajben te biybil, ex tucꞌix jun xinak cyucꞌil toc t-xbalun sak queꞌyin, ex cꞌaloꞌntok jun tcubil tint tcꞌuꞌj, te tzꞌibel. E ocxtzun tujxi ex e cub ten junx ttxlaj altar kꞌan cꞌuxbil. 3 Jaw lakꞌeꞌ tajwalil Cydios aj Israel tibaj cyilbilal querubín jatum tcubtok tcyakil maj, ex cyjaꞌ xiꞌ ttzi tpwertil tja Dios. Atzunte Kman tzaj ttxcoꞌn aju xinak toc t-xbalun lino, aju cꞌaloꞌntok tcubil tint tcꞌuꞌj, te tzꞌibel, 4 ex xi tmaꞌn Kman teju xinak cyjaꞌ: Txiꞌya ex betin baja tuj tnam Jerusalén, ex kꞌoꞌnca jun techal tibaj cywitz keju in che bisun ex in che okꞌ tuꞌn tlaj tcyakil mya baꞌn icꞌbilxix in binchanjtz tuj tnam lu, chi Kman.
5-6 Ex o nbiye tej t-xi tmaꞌn Kman cye keju kaktl xinak: Cyxi lpeꞌye tiꞌj ju xinak lu ex cybetin baje tuj tnam txiꞌx keꞌ cyuꞌne tiꞌj njaye, cybyoncuye ke tij xjal, ke cuꞌxun, ke kꞌapoj, ke cꞌwaꞌl ex ke xuꞌj, ex miꞌn tzaj kꞌakꞌan cycꞌuꞌje cyiꞌj. Pero miꞌn cub cybyoꞌne ke xjal toc techal tibaj cywitz, chi Kman. Tzyettzun cybyonjtz ke cytijil xjal cyuꞌn, akeju ateꞌtok twitz tja Dios.
7 Te tibajxi xi tmaꞌn Kman cye cyjaꞌ: Cyxiꞌye tuj njaye ex cytzꞌilsaꞌn baje, cynojsaꞌn baje tcyakil ttxaꞌn peꞌn tuꞌn cyximlal xjal otok che cub byoꞌn, chi Kman.
E etztzun ke xinak lu ex tzyettzun cybyonjtz ke xjal cyuꞌn tuj tnam. 8 Ex tej matok in che byet xjal cyuꞌn, atzun weye in cyaj tene njunalxe. In cub ẍmejeꞌye tejxi tpon tacl tibaj nwitze twitz txꞌotxꞌ, ex tuꞌn nim bis in jaw schꞌine ex nmaye cyjaꞌ: Ay Nman Dios, ¿maj che bel tbyoꞌna chꞌintl xjal aj Israel ateꞌx, tuꞌn tkꞌoja ma tzaj tibaj tnam Jerusalén? Nchiye.
9 Atzunte Kman tzaj ttzakꞌweꞌn weye cyjaꞌ: Ma tijxix ju il ma cybincha aj Israel ex aj Judá. Nojni tuj tnam cyuꞌn byol xjal; nimcu mya baꞌn in cybinchaꞌn tuj tnam, ex in cymaꞌn cyjaꞌ: Ma cyaj tcolin Kman ktanmi ex mintiꞌ in til aju in bant kuꞌn, che chi. 10 Cyjaꞌtzun mlay tzaj kꞌakꞌan ncꞌuꞌje cyiꞌj, nok oꞌcx che oquel tuj xjel wuꞌne tiꞌj cybinchben mya baꞌn.
11 Aju xinak toc t-xbalun sak queꞌyin ex cꞌaloꞌntok jun tcubil tint tcꞌuꞌj, te tzꞌibel, ul meltzꞌaj ex tma cyjaꞌ: Ma japun baj wuꞌne aju yol tzaj tmaꞌna weye, chi xjal te Kman.