Ex o wile tej tocx ju xinak. 3 Otok che pon weꞌ ke querubín ttxlaj tja Dios tuj bankꞌabaj, ex aju ttxaꞌn peꞌn tcub twitz tja Dios biꞌx noj tuꞌn muj. 4 Jaw lakꞌeꞌ tajwalil Kman cyibaj ke querubín, ex cyjaꞌ xiꞌ tuꞌn tpon ttzi ja; ex biꞌx noj tuj tja Kman tuꞌn muj, ex biꞌx ul koptzꞌaj ttxaꞌn peꞌn tuꞌn t-spicꞌumal tajwalil Kman. 5 Aju tkꞌajkꞌajel cyxicꞌ ke querubín o binjtz max ttxaꞌn peꞌn tiꞌjxi twitz tja Dios. Mer acu tkꞌajkꞌajel oc tyolin Dios aju at tipumal tuꞌn tbant tcyakil tuꞌn. 6 Xi tmaꞌn Kman teju xinak, aju toc t-xbalun sak queꞌyin, tuꞌn tetz tiꞌn kꞌakꞌ cyxol ke rwed ex cyxol ke querubín. Ocxtzun ju xinak ex cub weꞌ cytxlaj ke rwed. 7 Jun cye keju querubín xi tnukpiꞌn tkꞌab tibaj kꞌakꞌ in cꞌant cyxol, tzaj ttzyuꞌn chꞌin xkꞌaꞌl in cꞌant kꞌakꞌ tiꞌj, ex cub tkꞌoꞌn tuj tkꞌab ju xinak toc t-xbalun sak queꞌyin. Tzajtzun ttzyuꞌn xinak aju xkꞌaꞌl lu ex ex tuja. 8 Tjakꞌ cyxicꞌ ke querubín kꞌanchaꞌl jun tilbilal ic queꞌyin ic tzaꞌn tkꞌab xinak. 9 Junx cyucꞌil ke querubín o wile cyaje rwed, jun rwed tcubsaꞌn ttxlaj junjun cye. Ex ke rwed lu in koptzꞌaj cyiꞌj, mer ic tzaꞌn ke tal abj topasio cybi. 10 Ke cyaje rwed lu junx taꞌ queꞌybil cye, ex aju queꞌybil cye mer ic tzaꞌn kꞌeꞌl tex juntl rwed tujxi juntl. 11 Octzun cyxi bet ke querubín nok jatum, ka cubni, ka jawni, ka elni ex ka ocni, mintiꞌ in kꞌon welt cyximlal, oꞌcx in cheꞌx lpeꞌ tiꞌj jun nejni cywitz. 12 Nim tbakꞌ witzbaj toc cyiꞌjele cyximlal, ex tiꞌj ttzal cyiꞌj, ex tiꞌj cykꞌab ex tiꞌj cyxicꞌ, ax icx cyiꞌj ke cyaje rwed. 13 O nbiye tej t-xi kꞌmaꞌn cye rwed cyjaꞌ: Che sutine. 14 Teylex te junjun querubín at cyaje cywitz: Aju tnejel cywitz ic queꞌyin ic tzaꞌn twitz jun tor; aju tcabin cywitz ic queꞌyin ic tzaꞌn twitz jun xinak; aju toxin cywitz ic queꞌyin ic tzaꞌn twitz jun balun; aju tcyajin cywitz ic queꞌyin ic tzaꞌn twitz jun tꞌiw. 15 Ax ke querubín lu otok che oc nqueꞌyine ttzi nima Quebar. Ex e jaw lipan twitz cyaꞌj, 16 oc cybet ke querubín ax icx ke rwed in che bet cytxlaj, ex oc cyjaw lipan twitz cyaꞌj mintiꞌ nneꞌl cypaꞌn cyib ke rwed cyiꞌj. 17 Oc cyweꞌ ke querubín ax icx ke rwed biꞌx in che weꞌ; ex oc cyjaw lipan twitz cyaꞌj ax icx ke rwed in che jaw twitz cyaꞌj junx cyucꞌil, porque ax cychwinklal ke querubín at cyuj ke rwed lu.

18 El tpaꞌn tib tajwalil Kman tibaj ttzi ja, ex cub ten cyibaj ke querubín. 19 Xitzun cylicꞌun querubín cyxicꞌ ex e jaw lipan twitz cyaꞌj. O wile tej cyjaw lipan cyucꞌix ke rwed ateꞌ cytxlaj, ex o wile tej cyweꞌ ttzi tja Kman, aju xiꞌyni twitz tuj tumlal tjawitz kꞌij. Ex tcubtok tajwalil Cydios aj Israel cyibaj. 20 Ax ke querubín lu otok che oc nqueꞌyine ttzi nima Quebar, akeju tcubsaꞌn Dios cyibaj. Eltzun nnicꞌe cyiꞌj, atzun ke jlu querubín cybi. 21 Teylex te junjun attok cyaje cywitz ex cyaje cyxicꞌ, ex tjakꞌ cyxicꞌ kꞌanchaꞌl ke tilbilal ic che queꞌyin ic tzaꞌn tilbilal tkꞌab jun xinak. 22 Ke cywitz icx che queꞌyin ic tzaꞌn che queꞌyin cywitz ke querubín otok che oc nqueꞌyine ttzi nima Quebar. Teylex te junjun xi bet tumlal jatum in xi cyqueꞌyin.