5 Cub ten T-xew Kman wibaje ex tzaj tmaꞌn weye tuꞌn t-xi nmaꞌne cye cyjaꞌ: Atzun jlu in tmaꞌn Kman: Atzun jlu in che ximane tiꞌj, akeye aj Israel. Baꞌn wuꞌne alcye cyximbetze. 6 Nimcu xjal ma cub cybyoꞌne tuj tnam lu ex ma noj cyuj cay cyuꞌne cyuꞌn cyximlal cyimni. 7 Cyjaꞌtzun, akine Dios cxel ncyuwsaꞌne jlu cyeye: Aju tnam Jerusalén cꞌoquel ic tzaꞌn jun cꞌil, pero mya akeye che oquel te chibj, nok oꞌcx che oquel te chibj cyximlal cyimni akeju ma che cub cybyoꞌne, atzun cyeye che eletz wiꞌne tuj tnam. 8 ¿Tzinpe in che xobe te kꞌoj? Ctzajel kꞌoj cyiꞌje wuꞌne. Akine Dios ma chin kꞌmante ju yol lu. 9 Cbel cycastiwoye wuꞌne: Che elex wiꞌne tzalu, ex che xel nkꞌoꞌne tuꞌn cytene tjakꞌ cycawbil ke stranjer xjal. 10 Che cymele tuꞌn spad. Cbel cysentense wuꞌne tuj tmojonil cytanmiye, cꞌeleltzun cynicꞌe tiꞌj, akine Dios. 11 Aju tnam mlay tzꞌajben cyeye ic tzaꞌn jun cꞌil, ex mi akeye che oquel ic tzaꞌn chibj, wuꞌne cbel cysentense tuj tmojonil cytanmiye, akeye aj Israel. 12 Cꞌeleltzun cynicꞌe tiꞌj, akine Dios. Mintiꞌ in che bete ic tzaꞌnx o txi nmaꞌne cyeye, ex mintiꞌ in che japun ke nleye cyuꞌne. Nok oꞌcx ma cheꞌx lpeꞌye tiꞌj cybinchben ke nasyon ateꞌ cyiꞌjeleye, chicuya cye, chi Kman weye.

13 Tej matok in xi nmaꞌne cye aju otok tzaj tmaꞌn Kman, biꞌx cyim Pelatías aju tcyꞌajal Benaías. In cubtzun mocꞌeꞌye tejxi tpon tacl tibaj nwitze twitz txꞌotxꞌ, ex in jaw schꞌine cyuwxix wen, ex xi nmaꞌne cyjaꞌ: Ay Nman. ¿Maj che bajel naj tuꞌna ke chꞌintl aj Israel ateꞌx?

14 Tzaj yolin Kman wucꞌile ex tma cyjaꞌ: 15 Ke xjal ma che cyaj ten tuj Jerusalén in che yolin cyiꞌj ke aj Israel ateꞌ tucꞌila, akeju t-xjalila ex termaniya, ex in cymaꞌn cyjaꞌ: Ke aj Israel o cheꞌx kꞌiꞌn tuj Babilonia najchak ateꞌ tiꞌj Kman. Mya ic tzaꞌn ke ma tzaj tkꞌoꞌn Kman ju txꞌotxꞌ te ke tuꞌn koc te tajwil, che chi. 16 Cyjaꞌtzun kꞌmanxa cye: Atzun jlu in tmaꞌn Kman: Akine inx samante cye tuj juntl txꞌotxꞌ najchak ex e baj nsputune cyxol ke nasyon, cyxol ke tnam mintiꞌ ojtzkiꞌn cyuꞌn, pero nok te nicꞌxi kꞌij. Atzun jaꞌlo ax kine chin tele cyucꞌil cyuj ke tnam jatum o che pon kꞌiꞌn. 17 Ax icx kꞌmanxa cye cyjaꞌ: Atzun jlu in tmaꞌn Kman. Akine chin ajetz kꞌinte cye cyuj ke txꞌotxꞌ ex cyuj ke nasyon jatum o che baj nsputune, che oquel nchmoꞌne ex cxel nkꞌoꞌne cytxꞌotxꞌ juntl maj tuꞌn cyoc te tajwil. 18 Che pol meltzꞌaj juntl maj tuj cytxꞌotxꞌ, ex cxel cycolin tuꞌn cycꞌulun cywitz ke tilbilal, ex miꞌn cybinchatl tcyakil aju icꞌbilxix in bant cyuꞌn nej. 19 Cꞌelel wiꞌne aju cyanmi cyuwxix ic tzaꞌn abj, ex cxel nkꞌoꞌne jun cyanmi acꞌaj ex baꞌn niman, ex jun cyximbetz acꞌaj. 20 Che ankꞌil ic tzaꞌnx in cymaꞌn ke nleye ex che japunel ke nmandamyente cyuꞌn; che oquel te jun tnam etzan wuꞌne, atzun weye chin oquele te Cydios. 21 Atzun keju in che cꞌulun cywitz ke tilbilal ex cucx in cybinchaꞌn mya baꞌn aju icꞌbilxix, cbel cycastiw wuꞌne tuꞌn tlaj cybinchben mya baꞌn. Akine Dios in chin kꞌmante jlu, chi Kman, chicuya cye.

22 E jaw lipan ke querubín twitz cyaꞌj, ax icx ke rwed e jaw junx cyucꞌil. Ex tcubtok tajwalil Cydios aj Israel cyibaj. 23 Jawtzun tajwalil Dios twitz cyaꞌj ex el tpaꞌn tib tiꞌj tnam Jerusalén, ex cub ten twi witz ttxlaj tnam tuj tjawitz kꞌij. 24 In jaw kꞌiꞌne tuꞌn tipumal Kman, ex in aj meltzꞌaje tuꞌn tuj Babilonia jatum otok che pon kꞌiꞌn ke aj Israel. A jlu o wile ic tzaꞌn tuj jun witzicꞌ, aju tzaj tyecꞌun T-xew Dios weye. Tbajlenxi jlu cub naj ju witzicꞌ, 25 ex tcyakil aju otok tzaj tyecꞌun Kman weye xi nchicꞌbaꞌne cye aj Israel, akeju otok che pon kꞌiꞌn tuj Babilonia.