Aju tkanil in tmaꞌn Ezequiel tiꞌj tuꞌn cyxiꞌ kꞌiꞌn aj Jerusalén pres tuj Babilonia
12
Tzaj yolin Kman wucꞌile ex tma cyjaꞌ: 2 Aya xjal najliya cyxol ke xjal miban che bin. At tbakꞌ cywitz tuꞌn cyqueꞌyin, pero mintiꞌ in cyil, at cyẍcyin tuꞌn cybin pero mintiꞌ in cybiꞌn, porque jumajx chcyin cywiꞌ ke xjal lu. 3 Cyjaꞌtzun binchama tten tikatza, mer ic tzaꞌn tuꞌn t-xi kꞌiꞌna tuj juntl tnam najchak, bincham ttena kꞌijl ex cywitz cycyakil xjal, texa tuj tjaya ex txiꞌya tuj juntl lugar; balo jacu tzꞌel chꞌin cynicꞌ xjal tiꞌj, porque jumajx miban che bin. 4 Kꞌiꞌn etza tikatza kꞌijl ex cywitz cycyakil xjal, mer ic tzaꞌn tuꞌn t-xi kꞌiꞌna tuj juntl tnam najchak; octzun toc kax, texa cywitz cycyakil xjal mer ic tzaꞌn tuꞌn t-xi kꞌiꞌna tuj juntl tnam najchak. 5 Te tibajxi, kꞌoꞌmixa jun toyꞌ ja cywitz xjal ex texa tuj, tucꞌix tikatza. 6 Octzun toc yupj twitz txꞌotxꞌ, kꞌoꞌn jaxa tikatza twi t-semila, ex texa cywitz xjal. Maksiꞌn oc twitza tuꞌntzun mi ttila twitz txꞌotxꞌ. Porque ma tzꞌoca te jun techal tiꞌj ju mya baꞌn tzul cyibaj aj Israel, chi Dios tzaj tmaꞌn weye.7 Bajtzun nbinchaꞌne wikatze ic tzaꞌnx otok tzaj tmaꞌn Kman weye, ex kꞌijl in exe tucꞌil wikatze, mer ic tzaꞌn tuꞌn nxi kꞌiꞌne tuj juntl tnam najchak. Te kale ex nkꞌoꞌne jun toyꞌ ja, tejtzun toc yupj jax nkꞌoꞌne wikatze twi nsemile, in extzune cywitz xjal.
8 Te prim te juntl kꞌij tzaj yolin Kman wucꞌile ex tma cyjaꞌ: 9 Ax toc ma tzaj cykanin aj Israel teya, akeju miban che bin, ¿ti in baj teya? Che chi. 10 Pwes kꞌmanxa cye cyjaꞌ: A jlu jun tkanil in yolin tiꞌj rey tuj tnam Jerusalén ex cyiꞌj cycyakil aj Israel akeju najlke tuj, chicuya, chi Kman. 11 Kꞌmanxa cye cyjaꞌ: Akine ma chin oque te jun techal tiꞌj mya baꞌn ctzajel cyiꞌje, ex cbantel cyuꞌne ic tzaꞌnx weye xbant wuꞌne, porque che xel kꞌiꞌne pres tuj juntl tnam najchak. 12 Aju cawil cyibaj cjawix tkꞌoꞌn tikatz twi t-semil, octzun koc yupj cꞌelex tuj toyꞌ muro aju otok bant cyuꞌn xjal. Maksiꞌn twitz oc tex tuꞌntzun miꞌn ttil twitz txꞌotxꞌ. 13 Cbel nkꞌoꞌne jun cꞌobil tiꞌj ex ctzyetel tuꞌn. Cxel wiꞌne tuj Babilonia, tuj cytanmi ke aj Caldey, mlay til ju txꞌotxꞌ lu ex axtzun cymel. 14 Cycyakil keju ateꞌ ttxlaj tuꞌn cycolin tiꞌj cyucꞌix cycyakil ke t-soldad, che xel nsputune tuj tcyakil pacꞌ twitz txꞌotxꞌ, chin xel lpeꞌye cyiꞌj tuꞌn cynaj wuꞌne tuꞌn spad tocxsaꞌn tuj nkꞌabe. 15 Octzun cybaj nsputune cyuj txkantl tnam ex nasyon, cꞌelel cynicꞌ tiꞌj, akine Dios. 16 Pero at junjun che cletel wuꞌne, miꞌn che cyim tuj kꞌoj, mi tuꞌn weꞌyaj ex mi tuꞌn txꞌuꞌj yabil, tuꞌntzun t-xi cytxꞌolbaꞌn tiꞌj cybinchben mya baꞌn cye ke nasyon jatum che pol, ex tuꞌn tel cynicꞌ tiꞌj, akine Dios, chi Dios tzaj tmaꞌn weye.
Juntl maj tkanil tiꞌj castiw
17 Tzaj yolin Kman juntl maj wucꞌile ex tma cyjaꞌ: 18 Aya xjal, oc twaꞌna ax icx oc tcꞌana, bix jaw luꞌluna tuꞌn t-xobila ex tuꞌnju in baj tcꞌuꞌja tuꞌn tbisa. 19 Ex kꞌmanxa cye cycyakil aj Israel: Atzun jlu in tmaꞌn Kman cyiꞌj ke xjal najl tuj tnam Jerusalén, ex cyiꞌj cycyakil aj Israel: Che waꞌl tucꞌil secꞌpajleꞌn, ex cxel cycꞌaꞌn cycꞌa tucꞌil cyxobil; che bel xitj ke tnam tuj Israel, mintiꞌtl xjal cyjel ten najal cyuj, tuꞌn tlaj nimcu mya baꞌn in cybinchaꞌn xjal cyiꞌj cyucꞌil. 20 Cycyakil tnam jatum najl ke xjal cyuj, che cbel xitj; mi jun xjal cyjel ten najal cyuj. Cꞌeleltzun cynicꞌ tiꞌj, akine Dios, chi Dios.
21 Tzaj yolin Kman wucꞌile ex tma cyjaꞌ: 22 ¿Ti t-xilen ju cyyol aj Israel in cymaꞌn cyjaꞌ: Cucx tel kꞌij, ex aju yol in tmaꞌn t-sanjel Dios mintiꞌ in japun? Che chi. 23 Kꞌmanxa cye cyjaꞌ: Atzun jlu in tmaꞌn Kman: Oc nbinchaꞌye tuꞌn miꞌn t-xi cymaꞌn aj Israel juntl maj ju yol lu. Ax icx kꞌmanxa cye, nikayin taꞌ kꞌij tuꞌn tjapun tcyakil aju o kꞌmanjtz tuꞌn nsanjele. 24 Porque cyxol aj Israel mlay che tentl keju nnoꞌc cykꞌon cyib te nsanjele, ex mi keju baꞌn che kꞌijin tuꞌn cysbun. 25 Porque akine Dios oc chin yolile, ex aju cxel nmaꞌne, jurat naj cjapunel ex ax keye che queꞌyilte, akeye xjal miban che bine; akine chin yolil, ex cjapunel wuꞌne aju cxel nmaꞌne. Akine Dios in chin kꞌmante jlu, chi Dios.
26 Tzaj yolin Kman wucꞌile ex tma cyjaꞌ: 27 Ke aj Israel in cymaꞌn cyjaꞌ: Aju o tzaj yecꞌun te Ezequiel ic tzaꞌn tuj witzicꞌ cjapunel, pero yajxi wen che chi, 28 cyjaꞌtzun kꞌmanxa cye cyjaꞌ: Atzun jlu in tmaꞌn Kman: Ke nyole mya atxcu taj tuꞌn cyjapun; aju o txi nmaꞌne cjapunel naj. Akine Dios in chin kꞌmante ju yol lu, chi Dios tzaj tmaꞌn weye.