Cbel kꞌoꞌn cysentens keju nnoꞌc cykꞌon cyib te t-sanjel Dios
13
Tzaj yolin Kman wucꞌile ex tma cyjaꞌ: 2 Kꞌmanxa aju yol cxel nmaꞌne teya cyiꞌj ke xjal nnoꞌc cykꞌon cyib te nsanjele cyxol aj Israel, akeju in che yolin tuꞌn cyex cyximbetz, kꞌmanxa cye cyjaꞌ: Cybintze aju Tyol Kman: 3 Atzun jlu in tmaꞌn Kman: Ay becꞌbil cywitz keju mintiꞌ cynabl, nnoꞌc cykꞌon cyib te nsanjele, in che oc lpeꞌ tiꞌj cyex cyximbetz, ex aju in cymaꞌn mya ax toc at in tzaj yecꞌun cye tuꞌn Dios. 4 Akeye aj Israel, ke xjal ateꞌ cyxole, akeju nnoꞌc cykꞌon cyib te nsanjele, ic cyten ic tzaꞌn ke wech najl cyxol ttxꞌakan ja. 5 Mintiꞌ in che xkꞌukin jatum o cub tilj muro tiꞌjele tnam ex mintiꞌ in jaw cybinchaꞌn juntl maj, ex tuꞌntzun jlu mintiꞌ tumel tuꞌn cyclonte cyib aj Israel tuj kꞌoj oc tpon tkꞌijlalil castiw tuꞌn Kman. 6 Aju nnoꞌc cyqueꞌyin ic tzaꞌn tuj witzicꞌ mya ax toc, ex nicꞌaj yol aju tkanil in cymaꞌn. In cymaꞌn ka akine in chinx samante cye tuꞌn cyyolin, pero mya akine in chinx samante cye. Ex in che ayon tiꞌj tuꞌn tjapun cyyol ic tzaꞌnx otok txi cymaꞌn. 7 Aju nnoꞌc cyqueꞌyin ic tzaꞌn tuj witzicꞌ mya ax toc. Ex nicꞌaj yol aju tkanil in cymaꞌn. In cymaꞌn ka akine in chinx samante cye tuꞌn cyyolin, pero mintiꞌ jun o txi nmaꞌne cye. 8 Cyjaꞌtzun akine Dios cxel nmaꞌne jlu: In cymaꞌn ke yol mya ax toc ex aju nnoꞌc cyqueꞌyin ic tzaꞌn tuj witzicꞌ puro nicꞌaj yol, cyjaꞌtzun chin oquele aj kꞌoj cyiꞌj. Akine Dios in chin kꞌmante jlu. 9 Cbel nkꞌoꞌne cycastiw ke xjal nnoꞌc cykꞌon cyib te nsanjele, in cymaꞌn at in tzaj yecꞌun cye ic tzaꞌn tuj witzicꞌ pero mya ax toc cyuꞌn, ex nicꞌaj yol aju tkanil in cymaꞌn, mintiꞌ cyoclen ke jlu tuꞌn toc cychmon cyib cyucꞌil ke xjal etzan wuꞌne, ex mi tuꞌn tcuꞌx tzꞌibet cybi tuj libro jatum tzꞌibamaj cybi aj Israel, ex mi tuꞌn cypon juntl maj tuj cytxꞌotxꞌ aj Israel. Cꞌeleltzun cynicꞌe tiꞌj, akine Dios.10 Ax toc ke xjal etzan wuꞌne ma che cub sbuꞌn, in kꞌmanjtz cye cyjaꞌ: Ko tel tuj txubtxaj che chi, ex mintiꞌ ma che ten xjal tuj txubtxaj; ic cyten ic tzaꞌn jun xjal in jaw tbinchaꞌn jun tcajonil ja mya baꞌn binchben te ex nnoꞌc tkꞌoꞌn taꞌl txun tiꞌj. 11 Kꞌmanxa cye keju nnoꞌc cykꞌoꞌn taꞌl txun tiꞌj tcajonil ja, aju tcajonil ja lu cbel xitj. Tzul jbal tucꞌil nim tipun, ex tzul sakbakun ic tzaꞌn abj, ex ctzajel jun cykꞌikꞌ jbal nimxix tipun. 12 Octzun tcub tilj tcajonil ja oc cymaꞌ xjal cyeye cyjaꞌ: ¿Ti ma baj tiꞌj taꞌl txun oc cykꞌoꞌne tiꞌj? 13 Cyjaꞌtzun akine Dios cxel nmaꞌne jlu: Tuꞌn ntxꞌuꞌjile ctzajel xupin jun cykꞌikꞌ cyuwxix, ex tuꞌn ntxꞌuꞌjile ctzajel jbal cyuwxix, ex ctzajel sakbakun ic tzaꞌn abj, tuꞌntzun tcub baj xitj tcyakil. 14 Cbel nxitune tcajonil ja ma tzꞌoc cykꞌoꞌne taꞌl txun tiꞌj; biꞌx cbel nxitune tcajonil ja ex che cymele tjakꞌ ttxꞌakan. Cꞌeleltzun cynicꞌe tiꞌj, akine Dios. 15 Cjawitz baj nkꞌoje tiꞌj tcajonil ja ex cyiꞌj keju e oc kꞌonte taꞌl txun tiꞌj, ex cxel nmaꞌne cyeye cyjaꞌ: Mintiꞌ chꞌin tcajonil ja ma cyaj ten ex mi keju e oc kꞌonte taꞌl txun tiꞌj, 16 akeju nnoꞌc cykꞌon cyib te nsanjele cyxol aj Israel, in cymaꞌn ka at in tzaj yecꞌun cye mer ic tzaꞌn tuj witzicꞌ, pero mya ax toc jlu, ex in cymaꞌn tkanil cye aj Jerusalén: Che tele tuj txubtxaj che chi, pero mintiꞌ ma che ten tuj txubtxaj. Akine Dios in chin kꞌmante jlu.
Cbel cycastiw ke xuꞌj nnoꞌc cykꞌon cyib te t-sanjel Dios
17 Atzun jaꞌlo aya xjal, txiꞌya ex kꞌmaꞌnca tibaj cywitz ke xuꞌj ateꞌ tuj ttanmiya, akeju in cymaꞌn ka wuꞌne in xi nmaꞌne tkanil cye pero in che yolin tuꞌn cyex cyximbetz, 18 ex kꞌmanxa cye cyjaꞌ: Atzun jlu in tmaꞌn Kman: Becꞌbil cywitz ke xuꞌj baꞌn mañ cyuꞌn tuꞌn cycambante cyiꞌj xjal; in baj cyslapun jun piẍ xbalun tuꞌn toc cykꞌoꞌn tkul cykꞌab xjal tuꞌn miꞌn cycyim, che chi, ex in cub cybinchaꞌn xbalun tuꞌn tjax cykꞌoꞌn tuj cywiꞌ xjal. Ex tuj cyximbetz ka jacu che ankꞌin xjal cyuꞌn, akeju etzan wuꞌne, ex ka jacu che cyim, ic tzaꞌnx cyajbil. 19 Nneꞌl nchꞌixwiye cyuꞌne cywitz ke xjal etzan wuꞌne nok tuꞌn tcnet junjun yub sebad ex junjun piẍ pan cyuꞌne; in che cyim xjal cyuꞌne, akeju mintiꞌ tuꞌn cycyim, ex in che cyaj ankꞌin xjal cyuꞌne, akeju mintiꞌ tuꞌn cycyaj ankꞌin. Cyjaꞌtzun in cub cysbuꞌne ke xjal etzan wuꞌne, in xi cyniman tcyakil nicꞌaj yol in cymaꞌne. 20 Cyjaꞌtzun akine Dios cxel nmaꞌne jlu: Ma chin oque aj kꞌoj cyiꞌje tuꞌn tlaj xbalun nnoꞌc cykꞌoꞌne tkul cykꞌab xjal, porque in che tzyet ke xjal cyuꞌne ic tzaꞌn in che tzyet ke chyuꞌj tuj cꞌobil. Pero che elel ntzakune ke xbalun tocsaꞌn cyiꞌj, ex che tzokpetel ke xjal wuꞌne, akeju otok che tzyet cyuꞌne, ic tzaꞌn in che etz tzokpaj ke chyuꞌj tuj cꞌobil. 21 Che elel ntzakune ke xbalun oc cycꞌaloꞌne tuj cywiꞌ xjal, ex che tzokpetel tuj cykꞌabe ke xjal etzan wuꞌne ex mlay che tzyet juntl maj cyuꞌne. Cꞌeleltzun cynicꞌe tiꞌj, akine Dios. 22 Nok tuꞌn nicꞌaj yol cyuꞌne ma baj cycꞌuꞌj ke xjal tzꞌaklxix, a jlu miꞌn waje tuꞌn tbant icju, atzun cye xjal binchal mya baꞌn ma txi cycyuwsaꞌne mastl cycꞌuꞌj tuꞌn cucx cybinchante mya baꞌn, tuꞌntzun miꞌn cyclet. 23 Cyjaꞌtzun mlay txi cymaꞌntle ka at in tzaj yecꞌun cyeye ic tzaꞌn tuj witzicꞌ mya ax toc, ex mi tuꞌn cymanteye tkanil nicꞌaj yol. Che cletel ke xjal etzan wuꞌne tuj cykꞌabe ex cꞌeleltzun cynicꞌe tiꞌj, akine Dios.