5 Chin yolile tuj cyanmi cycyakil aj Israel tuꞌn cyajtz meltzꞌaj juntl maj wucꞌile, akeju ma tzꞌel cypaꞌn cyib wiꞌje tuꞌn cylaj ke tilbilal. 6 Cyjaꞌtzun, kꞌmanxa cye aj Israel cyjaꞌ: Atzun jlu in tmaꞌn Kman: Tajtz tiꞌj cyanmiye, cypaꞌmil cyibe cyiꞌj ke tilbilal in che cꞌulune cywitz, ex cycolin cyaje ke cybinchbene icꞌbilxix. 7 Ka at jun aj Israel ex ka jun stranjer xjal ax najl cyxol aj Israel ma tzꞌel tpaꞌn tib wiꞌje, ex ma txi tkꞌon tib tuꞌn tcꞌulun cywitz ke tilbilal, ex ka toc twitz tiꞌj ju in xi kꞌinte te tuꞌn tcub tzꞌak tuj il, ex ka ma tzul kanil jun yol tucꞌil nsanjele, wuꞌnxe cxel nkꞌoꞌne tzakꞌwebl te. 8 Ctzajel nkꞌoje tiꞌj xjal lu ex cbel nkꞌoꞌne tcastiw te jun yecꞌbil cywitz mastl xjal, ex cucx ctzajel cynaꞌn, ex cnajel wuꞌne cyxol ke xjal etzan wuꞌne. Cꞌeleltzun cynicꞌe tiꞌj, akine Dios.

9 Ka at jun xjal nnoꞌc tkꞌon tib te nsanjele, ex oc t-xi tmaꞌn tkanil mya ax toc, axtzun kine otok chin cub sbuꞌnte te, cbel nkꞌoꞌne tcastiw, ex cnajel wuꞌne cyxol ke xjal etzan wuꞌne. 10 Aju xjal in kanin xjel, ax icx aju nnoꞌc tkꞌon tib te nsanjele, cycabil cbel cycastiw tuꞌn tlaj cyil. 11 Tuꞌntzun miꞌn tel cypaꞌn cyib aj Israel wiꞌje juntl maj, ex tuꞌn mi tbaj cytzꞌilsan cyib tuꞌnju cybinchben mya baꞌn. Che oqueltzun te jun tnam etzan wuꞌne ex atzun weye chin oquele te Cydios. Akine Dios in chin kꞌmante ju yol lu.

12 Tzaj yolin Kman wucꞌile ex tma cyjaꞌ: 13 Ka at jun nasyon ma binchan il nwitze, ex ka ma tzꞌel cypaꞌn cyib xjal wiꞌje, cbel cycastiw wuꞌne, ex cꞌelel wiꞌne cywa; ctzajel weꞌyaj cyibaj wuꞌne, ex che cymel ke xjal ex ke alumaj wuꞌne. 14 Ex nokwit a najl Noé, Daniel tucꞌix Job tuj txꞌotxꞌ lu, oꞌcxwitlo ox xjal lu jacu che clet, tuꞌnju tzꞌaklxix ke. Akine Dios in chin kꞌmante ju yol lu.

15 Ex ka ma cheꞌx nsamaꞌne ke txcup te tjakꞌ cꞌul tuj jun nasyon tuꞌn tcub cybyoꞌn ke xjal najl tuj, ex tuꞌn toc te jun lugar mintiꞌ xjal najl tuj, jatum mi jun xjal jacu tnimari tib tuꞌn ticꞌ bet tuꞌnju in xob tuꞌn cylaj ke txcup, 16 nokwit a najl ke ox xinak tuj nasyon lu, mlaywitlo che clet cycyꞌajal cyuꞌn, mi ke cymeꞌjel, oꞌcxwitlo ake jacu che clet, ex aju cytanmi jaculo cyaj ten te jun lugar mintiꞌ xjal tuj. Ax toc akine Dios in chin kꞌmante ju yol lu.

17 Ex ka ma che tzaj nsamaꞌne ke xjal kꞌojlel tiꞌj nasyon lu ex ka ma txi nmaꞌne tuꞌn cycyim ke xjal ex ke alumaj, 18 nokwit a najl ke ox xinak lu tuj ju nasyon lu, mlaywitlo che clet ke cycyꞌajal cyuꞌn, mi ke cymeꞌjel; oꞌcxwitlo ake jacu che clet tuꞌnju tzꞌaklxix ke. Ax toc akine Dios in chin kꞌmante jlu.

19 Ex ka ma txi nsamaꞌne txꞌuꞌj yabil tuj nasyon lu, ex ka ma tzaj nim ntxꞌuꞌjile tiꞌj tuꞌntzun cycyim ke xjal ex ke alumaj, 20 nokwit a najl Noé, Daniel ex Job tuj nasyon lu, mlaywitlo che clet ke cycyꞌajal cyuꞌn mi ke cymeꞌjel; oꞌcxwitlo ake jacu che clet tuꞌnju tzꞌaklxix ke. Ax toc akine Dios in chin kꞌmante jlu, chi Dios.

21 Atzun jlu in tmaꞌn Kman: Pyorlo oc ttzaj nsamaꞌne ke cyaje castiw xobajilxix tibaj tnam Jerusalén, atzun ke jlu: Kꞌoj, weꞌyaj, ke txcup te tjakꞌ cꞌul, ex txꞌuꞌj yabil, tuꞌn cycyim ke xjal ex ke alumaj. 22 Nicꞌxi junjun che cyjel ankꞌin ex che eletz kꞌiꞌn tiꞌjtze tnam cyucꞌil cycyꞌajal ex cymeꞌjel. Octzun cyul cyucꞌile, oc cyilaꞌye cymod ex cybinchben mya baꞌn ex ckebel cycꞌuꞌje tuꞌnju castiw otok cub nkꞌoꞌne tuj tnam Jerusalén. 23 Ckebel cycꞌuꞌje oc cylonteye tzaꞌn tten cymod ex alcye cybinchben. Cꞌeleltzun cynicꞌe tiꞌj mya nokx gan ju castiw cub nkꞌoꞌne tibaj tnam Jerusalén. Akine Dios in chin kꞌmante jlu.