2 Chi Kman in tmaꞌn: Cymanxe te cytxuꞌye aju il in bant tuꞌn, cymanxe, porque aju xuꞌj lu ya mya nxuꞌjile ex ya mya akine tchmil. Baꞌn tuꞌn tchꞌexpet tmod, tuꞌn miꞌn toc tkꞌon tib te jun xuꞌj jawni twitz cyucꞌil xinak, ex baꞌn tuꞌn cycyaj tcolin ke tyaẍ. 3 Katzun mi ma tbincha icju, biꞌx cyjel nskitbaꞌne tiꞌj: Cꞌoquel wuꞌne ic tzaꞌn tej tul itzꞌj, cꞌoquel nkꞌoꞌne ic tzaꞌn jun lugar mintiꞌ cynajbil xjal tuj ex ic tzaꞌn tzkij txꞌotxꞌ, ex cymel wuꞌne tuꞌn txketleꞌn. 4 Mlay tzaj kꞌakꞌan ncꞌuꞌje cyiꞌj ke tal, porque sicꞌaj cꞌwaꞌl ke. 5 Aju cytxuꞌ ma yaẍin cyucꞌil xinak, ma tzaj tiꞌn tchꞌixwi porque o tma: Ma chinxe jyol cye ke xinak at nim cygan wiꞌje, akeju in che tzaj kꞌonte nwaye ex aju aꞌ in ajben wuꞌne, ex in tzaj cykꞌoꞌn nlane ex nnokꞌe lino, tucꞌix nchiꞌye aseyt ex ncꞌaꞌye, chi cytxuꞌ.

6 Cyjaꞌtzun cmaksetel tbe wuꞌne tuꞌn chꞌiꞌx, ex cbajel nbinchaꞌne peꞌn tiꞌj tuꞌn miꞌn tcnet be tuꞌn. 7 Cꞌoquel lpeꞌ cyiꞌj ke xinak at nim tgan cyiꞌj, pero mlay pon canun cyiꞌj; cꞌoquel ten jyol cye, pero mlay che cnet tuꞌn. Ex octzun tmaꞌ: Chin ajel meltzꞌaje juntl maj tucꞌil nej nchmile, porque mas baꞌn in tene tucꞌil twitzju in baj wiꞌje jaꞌlo, chilo.

8 Pero ate xuꞌj lu mintiꞌ el tnicꞌ tiꞌj ka akine inx kꞌonte triw te, tucꞌix taꞌl twitz uva, tucꞌix tchiꞌ aseyt, ex mintiꞌ el tnicꞌ tiꞌj ka wuꞌne chmet sak pwak ex kꞌan pwak, akeju e ajben tuꞌn tuꞌn tbaj tbinchaꞌn ke tilbilal Baal. 9 Tuꞌntzun jlu cꞌajetz wiꞌne juntl maj ntriwoye ex taꞌl twitz n-uvaye tuj tkꞌijlalil oc tjaw tchmoꞌn twitz tawal, ex cꞌajetz wiꞌne juntl maj nlane ex nnokꞌe lino aju otok txi nkꞌoꞌne te tuꞌn cybant t-xbalun. 10 Cbel nskitbaꞌne tiꞌj cywitz ke xinak at nim tgan cyiꞌj ex misicyer jun ccolpilte te tuj nkꞌabe. 11 Cbajel ttzalajbil wuꞌne ex ke tninkꞌij ex ke ninkꞌij oc ttzaj queꞌyin acꞌaj xjaw ex ke kꞌij te ojlabl ex tcyakil mastl ninkꞌij. 12 Cbajel naj tkan t-uva ex tkan t-higo wuꞌne, aju in tmaꞌn tiꞌj: Atzun chojbil weye jlu tzaj cykꞌoꞌn ke xinak at nim cygan wiꞌje, chi xuꞌj. Pero cꞌoquel nkꞌone jlu tuꞌn ttzaj chꞌiy cꞌul tuj, ex che loꞌl ke jil te tjakꞌ cꞌul tiꞌj. 13 Cbel nkꞌoꞌne tcastiw tuꞌnju nim kꞌij cub tpatun storac cywitz ke tilbilal, ex tuꞌnju baj tbinchan tib tuꞌn xmulkꞌabaj ex uwj tuꞌn t-xi lpeꞌ cyiꞌj ke xinak at nim tgan cyiꞌj, ex atzun weye icꞌ nnaꞌle tuꞌn. Akine Dios in chin kꞌmante ju yol lu.

14 Che oquel nxmoxine ke aj Israel tuꞌn cyxi wiꞌne tuj lugar mintiꞌ xjal tuj ex tuꞌn tcyakil ncꞌujlalile chin xel yoline cye. 15 Ctzajel chꞌiy juntl maj tkan cy-uva wuꞌne, ex aju chkꞌajlaj Acor jatum tzaj yajbil cyiꞌj, cꞌoquel nkꞌoꞌne te jun oybil cye tuꞌn tkeꞌ cycꞌuꞌj tiꞌj. Atzun ctzajel cykꞌoꞌn cyyol weye ic tzaꞌn tej kꞌapojxtok ke, tuj kꞌij tej cyetz tuj Ejipt. 16 Cꞌoqueltzun cymaꞌn weye cyjaꞌ: Aya Kchmile che chilo, ex ya mlay tzꞌoc cykꞌoꞌn nbiye Baal (ex ka patrón). Akine Dios in chin kꞌmante ju yol lu. 17 Ex mlay txi nkꞌoꞌne ambil cye tuꞌn cyyolin mastl cyiꞌj cydios xjal baal cybi.

18 Tuj tkꞌijlalil tzul cbantel tiꞌj jun nyole cyucꞌil ke jil te tjakꞌ cꞌul ex ke chyuꞌj ex ke lobaj, tuꞌn miꞌn cybinchan mya baꞌn cyiꞌj aj Israel; che bel ntokine ke xobl plech ex ke spad tuj tnam lu ex biꞌx cwebel kꞌoj, tuꞌntzun cyten xjal tuj txubtxaj, akeju etzan wuꞌne.

19 Akeye aj Israel, axix toc che oquele te nxuꞌjile te jumajx ic tzaꞌnx in tmaꞌn ley, porque cꞌujlaꞌn keye wuꞌne ex at tkꞌakꞌbil ncꞌuꞌje cyiꞌje. 20 Che oquele te nxuꞌjile ex cjapunel nyole cyucꞌile, octzun cꞌelel cynicꞌe wiꞌje, ka akine Cymane. 21 Akine Cymane in chin kꞌmante yol lu: Tuj tkꞌijlalil tzul ctzajel ntzakꞌweꞌne aju cynaꞌj Dios aj Israel ex ctzajel nkꞌoꞌne jbal tibaj txꞌotxꞌ, 22 tuꞌn ttzaj tkꞌoꞌn triw ex twitz uva ex twitz olivo nneꞌl aseyt tiꞌj. 23 Ke xjal etzan wuꞌne che cyjel nkꞌoꞌne tuj txꞌotxꞌ te jumajx tuꞌn cyoc te weye; ctzajel kꞌakꞌan ncꞌuꞌje cyiꞌj aj Israel. Mintiꞌ tzaj kꞌakꞌan ncꞌuꞌje cyiꞌj nej. Nej xi nmaꞌne cye: Mya etzan keye wuꞌne, nchiye, atzun jaꞌlo cxel nmaꞌne cye: Etzan keye wuꞌne, ex atzun cye ctzajel cymaꞌn weye: Aya Kdiose.