Tzaj tmaꞌn Kman juntl maj weye: Txiꞌya ex cꞌujlama aju xuꞌj at tyaẍ ex aj pajil, ic tzaꞌn in che oc ncꞌujlaꞌne ke aj Israel masque in che oc lpeꞌ cyiꞌj junxitl dios, ex in che loꞌn tiꞌj twitz uva tzkijsaꞌmaj aju in pon cyiꞌn te oyaj cywitz cydios, chi Dios tzaj tmaꞌn weye. 2 Cnettzun jun xuꞌj wuꞌne tuꞌn toc te nxuꞌjile, ex chjet olaj tajlal sak pwak twiꞌ ex jun iktz tucꞌ mey sebad. 3 Xi nmaꞌne te: Nim tyemp ctele wucꞌile, cyjaꞌtzun miꞌn yaẍina ex miꞌn txiꞌya tucꞌil juntl xinak, ax icx weye oc nbinchaꞌye teya icju, nchiye te. 4 Porque nim tyemp che tel aj Israel mintiꞌ cyrey ex mintiꞌ nejenel cyxol, mlay txi cykꞌoꞌn chojbil te Dios ex mlay che cꞌulun cywitz abj xjansamaj, mintiꞌ tcapiẍay pal ctel cyucꞌil ex mintiꞌ tilbilal ctel tuj cyja. 5 Te tibajxi jlu che ajetz meltzꞌaj aj Israel juntl maj, ex che oquel ten jyolte Kman aju Cydios ex jyolte David aju cyrey. Tuj mancbil tkꞌijlalil che ul tucꞌil Kman ex tucꞌil tchiylal che nimal te, ex cxel cycꞌmoꞌn aju t-xtalbil cxel tkꞌoꞌn cye.