Oseas 4

Aju tkꞌoj Kman cyiꞌj aj Israel

Akeye aj Israel cybintze aju yol in tmaꞌn Kman cyeye: Cxtisil Kman cyucꞌil xjal najl tuj txꞌotxꞌ lu, porque mintiꞌ in japun cyuꞌn aju in cymaꞌn, mintiꞌ cycꞌujlalil ex mintiꞌ cyojtzkibl tiꞌj Dios. 2 Nok oꞌcx in xi cytziyan jun yol, pero mintiꞌ in japun cyuꞌn, in che nicꞌan yol, in che cub byoꞌn xjal cyuꞌn, in che elkꞌan, aj pajil ke, in che oc tzokpaj cyiꞌj xjal ex cucx in che cub xjal cyuꞌn. 3 Cyjaꞌtzun, aju cytxꞌotxꞌ aj Israel puro bis taꞌ ex in baj cyipun keju najl tuj, in che cyim ke jil te tjakꞌ cꞌul ex ke chyuꞌj ex ke cyiẍ tuj mar.

In tzaj tmaꞌn Kman aju il cybincha ke pal

4 Chi Kman: Mi jun tzꞌoc ten kꞌmalte ka at til juntl ex mi jun tzꞌoc ten icꞌlelte juntl. Aju nkꞌoje oꞌcx toc cyiꞌje, akeye pal. 5 Tujxix tkan kꞌij che jawil tzꞌake, ax icx te konicꞌan che bel tzꞌak keju nnoꞌc cykꞌoꞌn cyib te nsanjele, ex che najel cycyakil aj Israel wuꞌne. 6 Ke xjal etzan wuꞌne mintiꞌ cyojtzkibl, cyjaꞌtzun ma che naj. Atzun cyeye akeye pal, tuꞌnju ma tzꞌel cyicꞌune aju ojtzkibl, cꞌelel wiꞌne cyoclene te pal. Tuꞌn tlaj ma tzicꞌ tnaꞌl nxnakꞌtzbile cyuꞌne, akine Dios, icxtzun weye cꞌicꞌel cynaꞌl ke cycꞌwaꞌle wuꞌne.

7 Oc in chmet mas cyajlal ke pal, mas in che binchan il nwitze; cyjaꞌtzun, cꞌelel wiꞌne ju nimbil cye ex cꞌelel cychꞌixwi. 8 In che ankꞌin tiꞌj chojbil cyil xjal etzan wuꞌne, tuꞌntzun jlu cyaj cucx tuꞌn cybinchan xjal il. 9 Tuꞌnju mya baꞌn in cybinchaꞌn, cycabil cbel cycastiw, tzaꞌnx ke xjal ax icx ke pal. 10 Tuꞌnju mintiꞌtl in che ajben weye, che waꞌl pero mlay noj cycꞌuꞌj, ex che yaẍil pero mlay chmet cybaj.

Oc cydiosin aj Israel ke tilbilal

11 Aju yaẍbil ex ju cꞌaj kꞌeꞌn biꞌx nneꞌl tiꞌn cynabl xjal. 12 Ke xjal etzan wuꞌne in xi cykanin cynabl cye tilbilal banimaj tiꞌj tzeꞌ, ex in ajben jun piẍ tzeꞌ cyuꞌn tuꞌn cykꞌijin. Tuꞌnju ma txi cytzokpin cyib tuꞌn cyyaẍin, ma che el tzpet tiꞌj cybe; in che yaẍin ex nneꞌl cypaꞌn cyib wiꞌje, akine Cydios. 13 In xi cykꞌoꞌn chojbil cywiꞌ ke nmak witz ex in cub cypatun storac cywiꞌ ke tal witz, ax icx in cybinchaꞌn tjakꞌ cyxlecumal ke tzeꞌ cꞌol, ke chjaj ex ke sicꞌl. Cyjaꞌtzun in che yaẍin cymeꞌjele, ex ke cylibe ma che oc te aj pajil.

14 Pero mlay cub nkꞌoꞌne cycastiw ke cymeꞌjele tuꞌnju in che yaẍin, mi ke cylibe tuꞌnju ma che oc te aj pajil, porque ax keye xinak in cheꞌxe cyucꞌil xuꞌj jawni cywitz cyucꞌil xinak ex oc t-xi cykꞌoꞌne jun oyaj cye tilbilal, nnoꞌc cyjunin cyibe cyucꞌil ke xuꞌj in che yaẍin, akeju ateꞌ cyuj cyja cydios. Cyjaꞌtzun cyjaꞌ txiꞌ tnam lu tuj najen tuꞌnju mintiꞌ cynabl xjal.

15 Akeye aj Israel, ma tzꞌel cypaꞌn cyibe wiꞌje tuꞌn cycꞌulune cywitz tilbilal, cuchiwt miꞌn tzꞌoc lpeꞌ Judá cyiꞌje tuꞌn tbinchan il. Miꞌn cheꞌxe cꞌulul cywitz tilbilal tuj lugar Gilgal, ax icx miꞌn che jaxe tuj lugar Bet-avén, ex miꞌn tzaj cynaꞌne nbiye tiꞌj jun yol in xi cytziyane. 16 Ke aj Israel miban che bin, ic cyten ic tzaꞌn jun tor txꞌuꞌj twiꞌ; tuꞌn jlu mlay che oc ncwentine tuj tbanil cꞌul ic tzaꞌn in che oc cwentin ke tal ẍneꞌl. 17 Ke aj Efraín jumajx ma txi cykꞌon cyib tuꞌn cycꞌulun cywitz tilbilal. E tbant cyuꞌn. 18 Cycyakil ma che cub tzꞌak ic tzaꞌn txkan cꞌal kꞌeꞌn. Cucx in cybinchaꞌn ic tzaꞌn jun xuꞌj jawni twitz cyucꞌil xinak ex mas cyajbil tuꞌn tcub cychꞌixwi twitzju tuꞌn cyjaw nimsaꞌn. 19 Che xel kꞌiꞌn tuꞌn tipumal cykꞌikꞌ, ex cbel cychꞌixwi tuꞌnju in che cꞌulun cywitz tilbilal.