5
Akeye pal cybintze jlu, ex cykꞌontz cywiꞌye tiꞌj akeye aj Israel; bintza rey, ax icx akeye at cyxilene tucꞌil rey: Cyibaje tzul castiw tuꞌnju ma che oque te jun tramp tuj lugar Mizpa, ex ic tzaꞌn jun xyub tcubsaꞌn te cꞌobil twiꞌ witz Tabor, 2 ex ic tzaꞌn jun jul maꞌ t-xeꞌ binchaꞌn tuj lugar Sitim. Tuꞌntzun tlaj jlu cbel nkꞌoꞌne cycastiw. 3 Ojtzkiꞌn ke aj Efraín wuꞌne; ex atzun ke aj Israel mlay cub cyewan cyib nwitze. Akeye aj Efraín ma tzꞌel cypaꞌn cyibe wiꞌje tuꞌn cycꞌulune twitz tilbilal; atzun ke aj Israel ma baj cytzꞌilsan cyib, chi Dios.4 Tuꞌn tlaj cybinchben mya baꞌn mintiꞌ tumel tuꞌn cyajtz meltzꞌaj juntl maj tucꞌil Cydios. Ex tuꞌnju oꞌcx in che ximan tuꞌn cycꞌulun cywitz tilbilal, mintiꞌ nneꞌl cynicꞌ tiꞌj Kman. 5 Ax ju cynimbil cyib aj Israel in yecꞌunte cyil; ke aj Israel ex ke aj Efraín tujx cybinchben mya baꞌn in che jaw tzꞌak, ax icx ke aj Judá che jawil tzꞌak junx cyucꞌil. 6 Cxel cyiꞌn cyẍneꞌl ex cywacẍ te jun chojbil oc cyxiꞌ jyolte Kman, pero mlay cnet cyuꞌn porque ma tzꞌel tpaꞌn tib cyiꞌj. 7 Ma tzꞌel cypaꞌn cyib tiꞌj Kman, cyjaꞌtzun, mya te Dios ke cycꞌwaꞌl. Tuꞌn tlaj mintiꞌ ma japun tyol cyuꞌn, tuj junx xjaw cbajel naj cytxꞌotxꞌ.
Cbel cycastiw aj Israel cyucꞌix aj judá
8 Cykꞌajtzaꞌn oque tcach ẍneꞌl te jun tkanil kꞌoj tuj tnam Gabaa, ex cykꞌajtzaꞌn oque chun tuj Ramá. Che kꞌajte te jun tkanil kꞌoj tuj lugar Bet-avén. Cymanxe tkanil cye aj Benjamín tuꞌn tbant cyten tuj kꞌoj. 9 In xi nmaꞌne tkanil cyxol cycyakil cꞌloj cyiyjil aj Israel alcye il tiꞌj tuꞌn ttzaj cyibaj: Che najel ke aj Efraín tuj tkꞌijlalil castiw.
10 Chi Kman in tmaꞌn: Ke nejenel cye aj Judá ic cyten ic tzaꞌn ke xjal in che ocx tuj tmojonil juntl txꞌotxꞌ. Pero biꞌx che najel wuꞌne tuꞌn nkꞌoje. 11 Puro tuj bis ateꞌ ke aj Efraín ex ma tzꞌel kꞌiꞌn cyoclen tuꞌnju oꞌcx in che oc lpeꞌ cyiꞌj ke tilbilal. 12 Chin oquele ic tzaꞌn pocꞌ cye aj Efraín ex cye aj Judá, porque che najel wuꞌne.
13 Tej cynaꞌnte aj Efraín taꞌw yabil cyiꞌj, ex tej cyqueꞌyinte aj Judá ju ẍil cyiꞌj, e jeꞌxtzun ke aj Efraín tuj Asiria tuꞌn cykaninte onbil te jun nintz rey, pero mlay che oc kꞌanan tuꞌn, ex mlay tzꞌoc tkꞌanan ju ẍil cyiꞌj. 14 Ic tzaꞌn nnoꞌc tzokpaj jun balun tiꞌj tcanb, icxtzun chin oquel tzokpaje cyiꞌj aj Efraín ex cyiꞌj aj Judá; ax kine chin bajel paẍunte cye, ex te tibajxi chin icꞌele; che tzyetel wuꞌne ex mi aꞌl jun jacu colpinte cye. 15 Chin ajele tuj nlugare ex max chin eletze ocxi tel cynicꞌ tiꞌj cyil ex ocxi cyul jyolte weye. Oc ttzaj yajbil cyibaj che oquel ten jyolte weye, chi Dios.