In che yolin aj Israel tuꞌn cyaj meltzꞌaj tucꞌil Kman
6
Cytzaje cycyakile, baꞌn tuꞌn kaj juntl maj tucꞌil Kman. Ma ko baj tpaẍuꞌn, pero jacu ko banix juntl maj tuꞌn; ma ko cꞌixbisanjtz tuꞌn, pero jacu ko oc tkꞌanan. 2 Tuj cabe kꞌij ko banixel naj tuꞌn ex tuj toxin kꞌij ko jawil twaban tuꞌn kten tucꞌil. 3 Kkꞌoꞌnc tilil tuꞌn kojtzkinte Kman. Ax toc tzul Kman kucꞌil ic tzaꞌn in jawil koptzꞌaj kꞌij, ex ic tten tzul ic tzaꞌn in baj acꞌset txꞌotxꞌ tuꞌn jbal tuj ttzi jbalil ex oc tjaw jbal.Aju tzakꞌwebl tuꞌn Kman
4 Chi Kman: ¿Ti cꞌoquel cyiꞌje wuꞌne akeye aj Efraín? ¿Ti cꞌoquel cyiꞌje wuꞌne akeye aj Judá? Porque aju cycꞌujlalile wiꞌje ic tten ic tzaꞌn muj in cub te prim ex ic tzaꞌn ttxa cheꞌw in cub ulj naj oc tjawil kꞌij. 5 Cyjaꞌtzun, ma che naje wuꞌne cyuꞌn nsanjele, ex tuꞌn nyole ma che baj nbyoꞌne. Aju castiw wuꞌne ic tten ic tzaꞌn tkan kꞌij nim tipun. 6 Aju wajbile cyeye, atzun tuꞌn tten cycꞌujlalile, ex mya tuꞌn ttzaj cykꞌoꞌne jun chojbil weye, wajbile tuꞌn tel cynicꞌe wiꞌje ka akine Dios, ex mya tuꞌn tcub cypatune ke alumaj te chojbil weye.
7 Pero ke xjal etzan wuꞌne ma cybincha ic tzaꞌn o tbincha Adán, ma che icꞌ tibaj ju yol cyaj bant tiꞌj wuꞌne cyucꞌil, mintiꞌ ma txi cyniman nyole. 8 Ke xjal aj Galaad binchal mya baꞌn ke, nojni tuj tnam tuꞌn cychcꞌel xjal otok che cub cyuꞌn. 9 Ic cyten ke pal ic tzaꞌn jun cꞌloj elekꞌ in xi cyewan cyib tuꞌn cyetz tzokpaj cyiꞌj xjal, in che cub xjal cyuꞌn tuj be in xi tuj tnam Siquem ex in cybinchaꞌn nimcu mya baꞌn. 10 Xobajilxix aju ma wile in bant cyuꞌn aj Israel, ma tzꞌel cypaꞌn cyib aj Efraín wiꞌje tuꞌn cycꞌulun cywitz ke tilbilal ex ma baj cytzꞌilsan cyib aj Israel. 11 Ax icx cyeye, akeye aj Judá, ma bant tiꞌj wuꞌne alcye kꞌij tuꞌn tcub cycastiwoye.