O wajbeye tuꞌn cyten tuj baꞌn ke xjal etzan wuꞌne
7
O wajbeye tuꞌn cyoc nkꞌanine ke aj Israel, akeju aj Efraín ex ke aj Samaria, pero o cnet nimxix cyil wuꞌne tucꞌix cybinchben mya baꞌn, porque cycyakil baꞌn che nicꞌan yol, in che ocx tuj cyja xjal ic tzaꞌn ke elekꞌ ex in che oc tzokpaj cyiꞌj xjal tuj cay.2 Mintiꞌ in che ximan tiꞌj ka cucx naꞌn tcyakil cyil wuꞌne. Jaꞌlo peꞌnin cyiꞌj tuꞌn cyex cybinchben ex kꞌanchaꞌl tcyakil jlu nwitze.
Aju mya baꞌn cybincha ke cawil
3 Nok tuꞌnju mya baꞌn in bant cyuꞌn ke xjal etzan wuꞌne ex tuꞌnju cynicꞌaj yol, in jaw tzalaj ju rey ex ke nejenel. 4 Cycyakil ke jlu biꞌx ma tzꞌel cypaꞌn cyib wiꞌje; ic cyten ic tzaꞌn jun jorni, nok oꞌcx oc tjaw cꞌant kꞌakꞌ tuj mintiꞌtl nnoꞌcx tyucun aju in akꞌnan tiꞌj, acux in bant tten tkꞌotjil pan.
5 Tuj ninkꞌij te rey biꞌx yabt tuꞌn vin xi cykꞌoꞌn nejenel te. Ex junx ela cyucꞌil keju in che xmayin. 6 In baj cyximan xjal lu nimcu mya baꞌn tuj ewaj, ic cyten ic tzaꞌn jun jorni cheba in cꞌant te konicꞌan, atzun prim te juntl kꞌij in cꞌant-xix wen.
7 Ax toc, cycyakil in che cꞌant ic tzaꞌn jun jorni ex keju in che cawin cyibaj o che cub cyuꞌn. Cycyakil ke cyrey o che cub cybyoꞌn ex mi aꞌl jun cyxol ma tzaj kaninte onbil weye.
Aju tnam el tpaꞌn tib tiꞌj Tdios
8 Ma baj cysmon cyib aj Efraín cyucꞌil txkantl tnam. Ic cyten aj Efraín ic tzaꞌn jun wabj nok junx pacꞌ in tzkꞌaj. 9 Ma tzꞌel baj cyipun cyuꞌn xjal cyuj mastl nasyon ex mintiꞌ ma tzꞌel cynicꞌ tiꞌj. Aju ttzmal cywiꞌ ma sakix tuꞌn tijin ex mintiꞌ nneꞌl cynicꞌ tiꞌj. 10 Ax ju cynimbil cyib aj Israel ma tzꞌoc te testiw cyiꞌjx. Masque icju, pero mintiꞌ ma che ajtz meltzꞌaj tucꞌil Kman aju Cydios, ex mintiꞌ ma che jyon tiꞌj.
11 Ic cyten aj Efraín ic tzaꞌn jun palom otok tzꞌeꞌlel tuj twitz ex mintiꞌ tnabl. In xi cykanin onbil cye aj Ejipt ex jurat in cheꞌx kanil onbil cye aj Asiria. 12 Octzun cyxiꞌ ma chixin, cxel nxoꞌne nxuybe cyibaj, che bel tzꞌak wuꞌne ic tzaꞌn ke chyuꞌj in che lipan twitz cyaꞌj; cbel cycastiw wuꞌne tuꞌn tlaj cybinchben mya baꞌn.
13 Ay becꞌbil cywitz tuꞌnju ma tzꞌel cypaꞌn cyib wiꞌje. Ctzajel xitbil cyibaj tuꞌnju ma jaw cyiꞌn cyib wiꞌje. Wajbile tuꞌn ncoline cyiꞌj, atzun cye in che nicꞌan yol wiꞌje. 14 Masque in che ayayan oc cycub ten twitz watbil, pero mintiꞌ in che cubsan nwitze tuꞌn tcyakil cyanmi.
Oc t-xi cykanin triw ex vin, in baj cykesin cyximlal ic tzaꞌn ke xjal mya nimal Dios, ex ma jaw cyiꞌn cyib wiꞌje.
15 Akine in xnakꞌtzante cye, ex wuꞌne xi nkꞌoꞌne tipun cykꞌab, atzun cye cub cyximan tuꞌn cybinchante mya baꞌn wiꞌje. 16 E aj meltzꞌaj cꞌulul cywitz ke tilbilal; ic cyten ic tzaꞌn jun xobl plech ẍoꞌc tiꞌj, oc in xi xoꞌt jun plech, txuc nneꞌx tiꞌjxi aju otok txi umlet. Tuꞌnju cyyol te cynimbil cyib che najel ke nejenel cye tuꞌn spad, ex cycyakil aj Ejipt che oquel ten xmayil cyiꞌj.