Cub cysentens aj Israel tuꞌn tlaj oc cydiosin ke tilbilal
8
Kꞌajtzaꞌnca aju chun kꞌiꞌn tuꞌna; ke aj kꞌoj che oquel tzokpaj cyiꞌj xjal etzan wuꞌne ic tzaꞌn nnoꞌc tzokpaj jun tꞌiw tiꞌj tcanb. Porque ma che icꞌ tibaj ju yol cyaj bant tiꞌj wuꞌne cyucꞌil ex cycꞌiꞌ txi cyniman nleye. 2 In jaw tkꞌajkꞌajel cywiꞌ aj Israel: Kman Dios, ojtzkiꞌna kuꞌne, che chi. 3 Ke aj Israel ma tzꞌel cyicꞌun aju baꞌn, ex cyjaꞌtzun che oquel lpeꞌ ke aj kꞌoj cyiꞌj tuꞌn cytzyet.4 Mintiꞌ tzaj cymaꞌn weye tej toc cykꞌoꞌn cyrey ex tej toc cykꞌoꞌn nejenel cyxol, icx mintiꞌ chin bine tiꞌj. O tzaj cyiꞌn sak pwak ex kꞌan pwak at cyucꞌil tuꞌn cybant ke tilbilal, ex tuꞌn jlu cyuꞌnx cyib che najel. 5 Akeye aj Samaria, nneꞌl wicꞌune aju tilbilal tal tor in che cꞌulune twitz. Nimxix nkꞌoje ma tzaj cyiꞌje. ¿Jtoj ban cysakixe? 6 Cyuꞌnx aj Israel ul cyiꞌn tilbilal tal tor aju at tuj Samaria. Mya Dios te jlu. Binchaꞌmaj tuꞌn jun xjal baꞌn binchan nok alcyex tilbilal, cyjaꞌtzun cbajel buchin.
7 Ma cybincha aju mintiꞌ tajben, ex tuꞌn jlu ctzajel nimxix cycastiw; tuj cycojbil mintiꞌ twitz awal cꞌoquel ex mlay tzꞌel chꞌin arin tiꞌj twitz triw porque mintiꞌ tuj, ex katzun ma tzꞌel cyuꞌn, cbajel waꞌn cyuꞌn xjal tuj juntl nasyon.
8 Ma che naj aj Israel cyuꞌn mastl nasyon. Ex tuj cywitz mastl nasyon ic cyten jaꞌlo ic tzaꞌn jun xar mintiꞌ tajben. 9 Porque o cheꞌx aj kanil onbil cye aj Asiria, ic cyten ic tzaꞌn jun bur te tjakꞌ cꞌul puro cyuw twiꞌ. Xi cykꞌoꞌn aj Efraín oyaj cye mastl nasyon tuꞌntzun cycolin cyiꞌj. 10 Masque xi cykꞌoꞌn oyaj cye nasyon, jaꞌlo che oquel nchmoꞌne tuꞌn cyyajlanjtz chꞌin tjakꞌ tcawbil rey ex ke nejenel.
11 Porque ma jaw cybinchaꞌn aj Efraín nimxix altar tuꞌn cybinchan il ex oꞌcx cyajben ke altar cye tuꞌn cybinchan il. 12 Masque xi ntzꞌibane nimcu xnakꞌtzbil cye, pero oc cykꞌoꞌn ic tzaꞌn jun tiꞌxti mintiꞌ ojtzkiꞌn cyuꞌn. 13 Nimxix cygan tuꞌn t-xi cykꞌoꞌn chojbil ex in bant cyuꞌn, ex in xi cychyoꞌn cychibjal alumaj in cheꞌx kꞌoꞌn te chojbil; atzun weye, mintiꞌ in chin tzalaje cyiꞌj. Ctzajel nnaꞌne aju cybinchben mya baꞌn in cybinchaꞌn, ex cbel nkꞌoꞌne cycastiw tuꞌn tlaj cyil, ex che ajel meltzꞌaj wuꞌne tuj Ejipt. 14 Ma jaw cybinchaꞌn aj Israel cyja rey, pero nnicꞌ tnaꞌl cyuꞌn aju Pokꞌsal cye. Ma jaw cybinchaꞌn aj Judá nimcu tnam toc muro cyiꞌj, pero cꞌoquel nkꞌoꞌne kꞌakꞌ cyiꞌj ex che bajel tzꞌeꞌy ke tja rey.