Aju cycastiw aj Israel o kꞌmanjtz tuꞌn Oseas
9
Miꞌn che tzalaje akeye aj Israel, miꞌn che jaw tꞌicpaje tuꞌn tzalajbil ic tzaꞌn cye mastl tnam, porque ma cyaj cycoline aju Cydiose tuꞌn cycꞌulune cywitz tilbilal. Cyuj ke lugar jatum nneꞌl ttxcꞌomil triw, atzun cyganiye tuꞌn ttzaj cycꞌmoꞌne aju twi cycꞌuꞌje tiꞌj ju cyyaẍbile. 2 Mlay canun triw te cywa xjal ex mi taꞌl twitz uva, ex aju acꞌaj taꞌl twitz uva nok cbel naj. 3 Che ajel meltzꞌaj ke aj Efraín tuj Ejipt ex che chyoꞌl cyiꞌj ke chibj tuj Asiria, akeju mayoꞌn tuꞌn tley Dios. Mlay che najantl tuj txꞌotxꞌ etzan tuꞌn Kman; 4 mlay cub cykoꞌntl taꞌl twitz uva tibaj altar te jun oyaj te Kman, ex mlay txi cykꞌoꞌn ke chojbil ma chixin. Aju pan cxel cywaꞌn ic tten ic tzaꞌn pan te bis tiꞌj jun cyimni, ex alcye oc t-xi waꞌnte, biꞌx ctzꞌilixtel. Ax ke che waꞌl tiꞌj pan lu, ex mlay txi cyiꞌn tuj tja Kman. 5 ¿Ti oc cybinchaꞌye oc tul canun ninkꞌij, aju ninkꞌij maꞌ toclen te Kman? 6 Ma che el ok twitz ju xitbil, che oquel chmoꞌn cyuꞌn aj Ejipt ex atzun che belex makuꞌn tuj tnam Menfis. Aju cykꞌinumabl aju sak pwak cnajel tuꞌn chꞌiꞌx cꞌul, ex tuj lugar jatum otok che cub ten ctzajel chꞌiy chꞌiꞌx.7 Ma pon tkꞌijlalil tuꞌn ttzaj cycastiw. Ma pon tkꞌijlalil tuꞌn tcub kꞌot cycastiw tiꞌj cybinchben. Cꞌelel cynicꞌ aj Israel tiꞌj oc tul canun jlu. Atzun cyeye in cymaꞌne: Mintiꞌ tnabl t-sanjel Dios, ex aju xinak in yolin tiꞌj ju in tzaj tmaꞌn Dios, tzcajte, che chiye. In cymaꞌne icju tuꞌnju nimxix cybinchbene mya baꞌn ex nimxix in che icꞌune cyiꞌj. 8 Ma cub tkꞌoꞌn Dios t-sanjel te xkꞌukil cye aj Efraín, atzun cyeye in cub cykꞌoꞌne cꞌobil tuj tbe, ax icx in che icꞌune tiꞌj oc tocx tuj tja Dios. 9 Ma che naj aj Efraín te jumajx, ic tzaꞌn tuj cykꞌijlalil ke aj Gabaa. Ctzajel tnaꞌn Kman aju cybinchben mya baꞌn ex cbel cycastiw tuꞌn tlaj cyil.
Cbel cycastiw aj Israel tuꞌn tlaj cyil
10 Chi Kman in tmaꞌn: Tej cycnet aj Israel wuꞌne in jaw tzalaje cyiꞌj mer ic tzaꞌn jun xjal in cnet twitz uva tuꞌn tuj lugar tzkij txꞌotxꞌ. Ke cyxeꞌchele ic e ela tuj nwitze ic tzaꞌn ke tnejel twitz higo. Pero tej cypon tuj lugar Baal-peor, xi cykꞌon cyib te juntl dios chꞌixbajilxix, ex e oc te icꞌbilxix ic tzaꞌnx ju tilbilal cꞌujlaꞌnxix cyuꞌn.
11 Aju cyajwalil ke aj Efraín cbel naj ic tzaꞌn jun chyuꞌj in xi lipan ex in cub naj. Mlay che itzꞌj mastl cꞌwaꞌl, ex mlay tzꞌoc tentl cyal ke xuꞌj. 12 Ex masque che chꞌiy ke cycꞌwaꞌl, pero akine chin elel kꞌinte cye ex mi jun cyjel nkꞌoꞌne. Ay becꞌbil cywitz ke xjal lu oc tel npaꞌn wibe cyiꞌj. 13 Ke aj Efraín ic tzaꞌnx in wile ic cyten ic tzaꞌn tnam Tiro tcubsan tuj jun chkꞌajlaj tbanilxix, pero cꞌeletz cyiꞌn cycꞌwaꞌl tuꞌn cycub byoꞌn.
14 Nman, kꞌonxa aju at tuꞌn t-xi tkꞌoꞌna cye. Binchama tuꞌn miꞌn ttzaj cyal ke xuꞌj ex tuꞌn miꞌn tten taꞌl cyim.
Aju tkꞌoj Kman cyiꞌj aj Efraín
15 Chi Kman in tmaꞌn: Tuj Gilgal cybincha tcyakil mya baꞌn, ex atzun tzaj keꞌ tuꞌn ttzyet wicꞌune cyiꞌj. Tuꞌnju cybinchben mya baꞌn che elex wiꞌne tuj njaye; mlay che oc ncꞌujlaꞌntle, porque cycyakil ke nejenel cyxol miban che niman. 16 Ke aj Efraín at ẍil cyiꞌj, ic cyten ic tzaꞌn jun wiꞌ tzeꞌ tzkij tlocꞌ ex mintiꞌtl twitz nnoꞌc. Masque tzaj cycꞌwaꞌl, pero che najel wuꞌne.
17 Ke xjal lu cycꞌiꞌ tuꞌn t-xi cyniman tyol Ndiose; cyjaꞌtzun che elel icꞌun tuꞌn, ex nok che betjebel cyuj mastl nasyon.