Che bel xitun cy-altar aj Israel
10
Ic cyten ke aj Israel ic tzaꞌn jun tkan uva nim twitz, pero tej toc nim twitz cyawal, cub cybinchaꞌn mastl cy-altar; tej toc cytxꞌotxꞌ tbanilxix, ax icx tbanilxix e oc ke abj cyuꞌn, akeju in che cub ten cꞌulul cywitz. 2 Cabe tten cyximbetz aj Israel, atzun jaꞌlo cxel cychjoꞌn cyil. Che bel t-xitun Kman cy-altar ex che bel tbuchin ke abj, akeju in che cub ten cꞌulul cywitz.3 Atzun jaꞌlo oc cymaꞌ ke xjal lu: Mintiꞌ kreye porque miban ko nimane te Kman. Pero ¿alcye jun baꞌn jacu tbincha jun rey keye? Che chi. 4 Nok oꞌcx in che yolin wen, in xi cytziyan jun yol mya ax toc oc tbant tiꞌj jun cyyol tucꞌil juntl. Aju castiw ctzajel cyibaj ic tten ic tzaꞌn jun tal cꞌul puro venen in chꞌiy cyxol ke surc tuj cojbil.
5 Ke xjal ateꞌ tuj Samaria che tzajel luꞌlun, che jawil okꞌ tuꞌnju otok naj tilbilal tal tor aju in che cꞌulun twitz tuj lugar Bet-avén. Tiꞌjtzun jlu che jawil okꞌ tnam xjal ex ke pal, tuꞌnju otok naj tajwalil. 6 Ex tucꞌix ju tilbilal tal tor cxel kꞌiꞌn tuj Asiria tuꞌntzun t-xi kꞌoꞌn teju nintz rey. Cyjaꞌtzun che elel aj Efraín tuj cychꞌixwi: Ctzajel cychꞌixwi aj Israel tiꞌj tilbilal in che cꞌulun twitz. 7 Cbel naj ju rey te Samaria ic tzaꞌn jun ttxꞌiꞌlil tzeꞌ in xi ikan tuꞌn aꞌ. 8 Che bel xitun ke ja in che ajben te cycꞌulbil xjal cywi witz jatum in bant il cyuꞌn xjal aj Israel. Che tzajel chꞌiy ke chꞌiꞌx cꞌul cyucꞌix ke mastl chꞌiꞌx cyibaj cy-altar, ex cxel cymaꞌn xjal cye nmak witz: Ko cyewan cube, ex cxel cymaꞌntl cye ke tal witz: Cytzaj tzꞌake kibaje, che chilo.
Cub cysentens aj Israel tuꞌn Kman
9 Chi Kman in tmaꞌn: Naꞌnx t-xi cycolin aj Israel tuꞌn cybinchan il atxix tzaj keꞌ cyuꞌn tuj Gabaa; ax ma che cyaj ten tuj cyil. Cyjaꞌtzun cpol canun kꞌoj tuj Gabaa cyiꞌj ke binchal mya baꞌn. 10 Cbel cycastiw tnam xjal lu wuꞌne nok jtoj waje. Cjawil cychmon cyib ke nasyon kꞌojlel cyiꞌj oc tcub cycastiw wuꞌne tuꞌn tlaj ju nintz mya baꞌn otok cybincha.
11 Ke aj Efraín ic cyten ic tzaꞌn jun tal vac mansimaj at tgan tuꞌn tbet tibaj triw tuꞌn tel ttxcꞌomil. Atzun jaꞌlo ma cub nkꞌoꞌne yuw tibaj cykul tbanilxix, tuꞌn t-xi cyjawoꞌn carret; ke aj Judá cxel cyjawoꞌn punt tuꞌn cychꞌoquin ex ke tiyjil Jacob che paꞌl kꞌuban.
12 Xi nmaꞌne cye cyjaꞌ: Cyawan cuꞌxe aju tzꞌaklxix ex cychmon jawe aju cꞌujlalil ic tzaꞌn twitz awal. Cybinchame tten cyanmiye tuꞌn tchꞌexpet cymodiye ic tzaꞌn in jaw kꞌuꞌt acꞌaj txꞌotxꞌ tuꞌn tcuꞌx awet awal, porque ma pon tkꞌijlalil tuꞌn cyjyone tiꞌj Kman ocxi tul ex tuꞌn ttzaj tkꞌoꞌn xnakꞌtzbil cyeye tuꞌn cbinchanteye aju tzꞌaklxix. 13 Atzun cyeye ma cuꞌx cyawaꞌne ju mya baꞌn, ma jaw cychmoꞌne aju mya tzꞌaklxix ex ma tzaj xitbil cyiꞌje tuꞌn tlaj oc keꞌ cycꞌuꞌje tiꞌj nicꞌaj yol.
Tuꞌnju ma tzꞌoc keꞌ cycꞌuꞌje tiꞌj cyeye cynable ex cyiꞌj nimcu xinak at cyucꞌile cyuw cycꞌuꞌj tuj kꞌoj, 14 cyjaꞌtzun nimxix tkꞌajkꞌajel cywiꞌ aj kꞌoj che ul kꞌojlel cyiꞌje, ex cycyakil ja te cycolbil cyibe che bel xitun ic tzaꞌn tej tcub xitun aju lugar Bet-arbel tuꞌn rey Salmán, tej toc ten kꞌojlel tiꞌj ex tej cybaj paẍuꞌn ke txuybaj cyucꞌix cyal.
15 Chin ajele tuj nlugare ex max chin eletze ocxi tel cynicꞌ tiꞌj cyil ex ocxi cyul jyol weye. Oc ttzaj yajbil cyibaj, che oquel ten jyolte weye, chi Dios.