In tcꞌujlaꞌn Dios ke xjal etzan tuꞌn, masque miban che bin
11
Chi Kman in tmaꞌn cyjaꞌ: Tej matok cꞌwaꞌlx ke aj Israel, ten nim ncꞌujlalile cyiꞌj, ex e jaw nscꞌoꞌne ma tuj Ejipt tuꞌn cyoc te ncꞌwaꞌle. 2 Pero tej cucxtok in chin txocone cyiꞌj, nok nneꞌl cypaꞌn cyib wiꞌje. Ke xjal etzan wuꞌne xi cykꞌoꞌn chojbil cye Baal akeju cydios, ex cub cypatun storac cywitz ke tilbilal. 3 Masque icju, akine inx xnakꞌtzante cye aj Efraín tuꞌn tbant cybet ex akine inx ẍaklunte cye, pero mintiꞌ el cynicꞌ tiꞌj ka akine cwentil cye. 4 Tuꞌn tkꞌakꞌbil ncꞌuꞌje ex tuꞌn ncꞌujlalile e tzaj wiꞌne tuꞌn cyul wucꞌile; el wiꞌne aju iktz al tcubsaꞌntok cyibaj, ic tzaꞌn nneꞌl kꞌiꞌn yuw tibaj cykul wacẍ ex in cub tene cꞌaꞌchal cye.5 Pero mintiꞌ cyajbe tuꞌn cyajtz wucꞌile. Cyjaꞌtzun che ajel juntl maj tuj Ejipt ex aju cyrey aj Asiria ccawil cyibaj. 6 Tuꞌn spad che bel byoꞌn ke xjal cyuj cytanmi ex biꞌx che bajel naj ke tlamel tnam, che najel xjal tuꞌn tlaj ju cyximbetz mya baꞌn. 7 Ke xjal etzan wuꞌne cucx tel cypaꞌn cyib wiꞌje, in jax cyschꞌiꞌn twitz cyaꞌj, pero mi aꞌl jun in onin cyiꞌj.
8 ¿Tzaꞌn tten tuꞌn cycyaj ntzokpiꞌne, akeye aj Efraín? ¿Tzaꞌn ten tuꞌn cycyaj ncoline, akeye aj Israel? ¿Jacupe che naje wuꞌne ic tzaꞌn naj aju tnam Adma, ex ka tuꞌn nbinchanteye cyiꞌje ic tzaꞌn o bant wuꞌne cyiꞌj aj Zeboím? In tzaj nim taꞌw tuj wanmiye, tuꞌnju at nim tkꞌakꞌbil ncꞌuꞌje cyiꞌje.
9 Mlayx cub cycastiwoye wuꞌne ic tzaꞌnx nkꞌoje; ex mlay che naj juntl maj aj Efraín wuꞌne porque Dios we kin ex mya xjal. Akine xjan atine cyxole, ex mlayx chin ule xitul cyeye.
10 Ke xjal etzan wuꞌne che tzajel lpeꞌ wiꞌje ex chin jawil tzanune cyiꞌj ic tzaꞌn jun balun. Chin jawil tzanune, ex atzun ke xjal etzan wuꞌne che tzajel tuj telex kꞌij in che luꞌlun wen.
11 Che ajetz tuj Ejipt in che kelan wen mer ic tzaꞌn ke chyuꞌj; che tzajel tuj Asiria mer ic tzaꞌn ke palom; ex che tzajel wiꞌne tuꞌn cynajan juntl maj cyuj cyja. Akine Dios in chin kꞌmante jlu.
Aju mya baꞌn cybincha xjal etzan tuꞌn Dios
12 Txolin wiꞌje tuꞌn nicꞌaj yol cyuꞌn aj Efraín; txolin wiꞌje tuꞌn sbubl cyuꞌn aj Israel. Ma tzꞌel cypaꞌn cyib aj Judá wiꞌje, akine Xjan ex tzꞌaklxix.