2 At tkꞌoj Kman cyiꞌj aj Judá. Cbel cycastiw tiyjil Jacob tuꞌn tiꞌj cybinchben; cxel tkꞌoꞌn chojbil cye tiꞌj cybinchben mya baꞌn. 3 Tej naꞌnxtok titzꞌj Jacob, cub ttzyuꞌn t-xe t-suꞌẍil tkan ttzic, ex tej toc tcꞌuꞌj o kꞌojin tucꞌil Dios. 4 O malin tucꞌil jun anjel ex o cub tiꞌj tuꞌn; jaw okꞌ ex xi tkanin tuꞌn tcub cyꞌiwlaꞌn. Oc noj Dios tiꞌj Jacob tuj Betel ex o yolin tucꞌil ma chixin. 5 Ate Kman Dios tajaw tcyakil ex Kman tbi. 6 Cyjaꞌtzun, akeye aj Israel cyajtz meltzꞌaje tucꞌil Dios aju jaw scꞌonte cyeye, ten cycꞌujlalile ex cybinchame aju tzꞌaklxix, ex cucx keꞌc cycꞌuꞌje tiꞌj Dios.

7 Chi Kman in tmaꞌn: Ke xjal etzan wuꞌne ic cyten ic tzaꞌn ke comersyant aj Canaán, in che ajben ke malbil mya tzꞌaklxix cyuꞌn porque at cygan tuꞌn cysbun cyiꞌj xjal. 8 Ke aj Efraín in cymaꞌn: Ax toc ma ko oque kꞌinun, ma cnet kkꞌinumable; pero mi jun jacu kꞌmante ka tucꞌil sbubl otok kcambaye, che chi. 9 Akine Dios aju Cymane atxix tej ateꞌye tuj Ejipt, cbantel wuꞌne tuꞌn cynajane juntl maj cyuj ke ja xbalun ja, ic tzaꞌn in banttok cyuꞌne ojtxi tej cytene tuj tzkij txꞌotxꞌ.

10 In yoline cyucꞌil ke nsanjele ex xi nyecꞌune nimxix cye mer ic tzaꞌn tuj witzicꞌ, ex in yoline cyucꞌil tuj techal tuꞌn t-xi cymaꞌn cye xjal. 11 Aj il ke aj Galaad ex mintiꞌ cyajben. Tuj Gilgal in cub cybyoꞌn ke tor te chojbil; cyjaꞌtzun che bajel xitj cy-altar; ic che oquel ic tzaꞌn ke byuj abj cycub tuj cojbil chꞌoquimaj, chi Kman.

12 Xi ok Jacob tuj txꞌotxꞌ Aram, o tzꞌakꞌnan te pastoril ẍneꞌl nok tuꞌn tcnet t-xuꞌjil. 13 Nok tuꞌn jun t-sanjel Kman e jeꞌtz kꞌiꞌn ke xjal aj Israel tuj Ejipt ex e oc cwentin tuꞌn. 14 Ma tzajxix tkꞌoj Kman cyuꞌn aj Efraín. Cyjaꞌtzun cbel cycastiw tuꞌn Kman, tuꞌn tlaj nim xjal ma cub cyuꞌn ex cbel cycastiw tuꞌnju ma tzꞌel tchꞌixwi Kman cyuꞌn.