Aju tkꞌoj Kman cyiꞌj aj Israel
13
Tej cyyolin ke aj Efraín tzaj tchi cyiꞌj xjal, o nimanjtz cyyol cyuꞌn mastl cꞌloj cyiyjil aj Israel, pero e naj ke aj Efraín tuꞌn cyex cyil tuꞌnju e cꞌulun twitz tilbilal Baal. 2 Ex cucx cybinchan il. Nnoꞌcx cykꞌoꞌn sak pwak tuj kꞌakꞌ tuꞌn tcub ulj ex in cub cybinchaꞌn ke tilbilal tiꞌj ic tzaꞌnx cyajbil; cycyakil jlu cybinchben xjal at cynabl tuꞌn cybinchante.Ex in cymaꞌn cye xjal: Cykꞌonxe ke chojbil cye ex cytzꞌuban ele cywitz ke tilbilal ic che queꞌyin ic tzaꞌn jun tal tor, che chi. 3 Cyjaꞌtzun, ic che oquel ic tzaꞌn muj in cub juqueꞌ prim, ic tzaꞌn tkꞌab cheꞌw in cub twitz txꞌotxꞌ te prim, jurat in cub naj, ic tzaꞌn chꞌim in xi tikan cykꞌikꞌ ex ic tzaꞌn sib in bukin.
Jun nintz xitbil ctzajel cyibaj aj Israel
4 Chi Kman: Akine Cydiose aju Cymane atxix tej cytene tuj Ejipt. Miꞌn txi cynimane juntl dios, oꞌcx kine, ex oꞌcx akine clol cyeye. 5 Akine in cwentin cyeye tuj tzkij txꞌotxꞌ jatum at nim taꞌw cyak. 6 Pero tej tnoj cycꞌuꞌje jaw cyniman cyibe ex icꞌ nnaꞌle cyuꞌne. 7 Tuꞌntzun jlu ic chin oquele te cyeye ic tzaꞌn jun balun, ex ic tzaꞌn jun tigr chin cꞌoquel tzokpaje cyiꞌje tuj be. 8 Chin oquel tzokpaje cyiꞌje ic tzaꞌn jun ttxu oso otok cheꞌx elkꞌaꞌn ke tal, ex biꞌx cbajel npaẍuꞌne cyanmiye. Ex ic tzaꞌn in bant tuꞌn jun balun, ax che najel wuꞌne ma chixin; che najel wuꞌne ic tzaꞌn tuꞌn jun txcup.
9 Akeye aj Israel, che najele wuꞌne ex ¿alcye jacu onin cyiꞌje? 10 ¿Jatum taꞌ cyreye jaꞌlo tuꞌn tcolin cyiꞌje tuj tcyakil cytanmiye? ¿Jatum ateꞌ ke nejenel cyxole? Ax keye e tzaj kaninte weye tuꞌn toc nkꞌoꞌne jun cyreye ex ke nejenel cyxole. 11 Tej toc nkꞌoꞌne cyreye tzaj nkꞌoje cyiꞌje, ax icx tzaj nkꞌoje cyiꞌje tej tel wiꞌne cyreye.
12 Aju cybinchben aj Efraín mya baꞌn, cꞌaloꞌn tuj potzbil te ex cꞌuꞌn aju cyil. 13 Ma pon tkꞌijlalil tuꞌn cyoc aj Israel ic tzaꞌn jun cꞌwaꞌl cyjaꞌ tul itzꞌj, pero aju cꞌwaꞌl lu mintiꞌ tnabl, tcꞌiꞌ tuꞌn ttzaj pichꞌeꞌ tuꞌn tul itzꞌj. 14 Che colpetel wuꞌne tuꞌn miꞌn cypon tuj cynajbil cyimni ex che cletel wuꞌne te camic. Aya camic, ¿jatum taꞌ tipumala aju in baj naj nimcu tuꞌn? Aya cynajbil cyimni, ¿jatum taꞌ ju xitbil tuꞌna? Mlay tzaj tzꞌeꞌy ncꞌuꞌje cyiꞌj ke xjal lu. 15 Masque ic ma che oc aj Israel ic tzaꞌn ajlaj in chꞌiy naj, tzul jun cykꞌikꞌ tuj tjawitz kꞌij, aju cykꞌikꞌ lu in xumin wen, in tzaj tuj lugar tzkij txꞌotxꞌ, ex tcyakil aꞌ ex tcyakil twi aꞌ cꞌajel tzkij ex cbel baj tuꞌn. Cꞌelel kꞌiꞌn cykꞌinumabl tucꞌix tcyakilju wiꞌyilxix at cye. 16 Cbel cycastiw aj Samaria tuꞌnju ma jaw cyiꞌn cyib tuꞌn cykꞌojin tiꞌj Cydios. Che bel byoꞌn tuꞌn spad, ex che bel pekꞌchaꞌn ke cycꞌwaꞌl twitz txꞌotxꞌ ex ke cyxuꞌjil chꞌix tul cyal cbajel jakoꞌn cycꞌuꞌj tuꞌn spad, chi Kman.