In cubsan twitz Oseas cywitz aj Israel tuꞌn cyajtz meltzꞌaj tucꞌil Kman
14
Akeye aj Israel, cyajtz meltzꞌaje juntl maj tucꞌil Kman aju Cydiose, porque ma che cub tzꞌake tuꞌn tlaj cyile. 2 Cyajtz meltzꞌaje tucꞌil Kman, ex cymanxe te tuj cynaꞌj Diose: Najsama tcyakil kbinchbene mya baꞌn ex cꞌmonxa tucꞌil tzalajbil aju akꞌbil chjonte in xi kkꞌoꞌne teya. 3 Porque mlay ko clete cyuꞌn aj Asiria ex mlay ko jaxe cyibaj chej tuꞌn kel oke. Miꞌn che oc kdiosintle ke tilbilal kuꞌnxe e bant, porque oꞌcx tucꞌila Kman in cnet kꞌakꞌbil cꞌuꞌjbaj cyuꞌn meba xjal, che chicuye.Xi ttziyan Kman jun acꞌaj chwinklal cye aj Israel
4 Chi Kman in tmaꞌn:
Cꞌelel wiꞌne ttxꞌuꞌjil cywiꞌ aj Israel: che oquel ncꞌujlaꞌne, masque mya baꞌn ke, porque mintiꞌtl nkꞌoje cyiꞌj.
5 Chin oquele te cye aj Israel ic tzaꞌn tkꞌab cheꞌw, atzun cye, ic che oquel ic tzaꞌn ke bech lirio nim cyxmacal, ex ic tzaꞌn ke tzeꞌ wiꞌten twi witz Líbano in xi bet cylocꞌ tuj txꞌotxꞌ.
6 Ic che oquel ic tzaꞌn jun wiꞌ tzeꞌ maꞌ ponin baj tkꞌab, ex tbanilxix ic tzaꞌn tkꞌab tzeꞌ olivo; aju tcꞌocꞌjal ic cꞌoquel ic tzaꞌn cycꞌocꞌjal ke tzeꞌ wiꞌten twi witz Líbano.
7 Che ajetz meltzꞌaj xjal tuꞌn cynajan tjakꞌ t-xlecumal, ex che chꞌiyil ic tzaꞌn in chꞌiy triw, che oquel ic tzaꞌn tkan uva oc nnoꞌc t-xmacal, ex cycyakil xjal che yolil baꞌn cyiꞌj, ic tzaꞌn in yolinjtz baꞌn tiꞌj vin in bant tuj Líbano.
8 Oc cymaꞌ ke aj Efraín cyjaꞌ: Mintiꞌtl kaje cyiꞌj ke tilbilal jaꞌlo, che chilo. Cxel nbiꞌne cykanbetz ex che oquel ncwentine ke. Ic chin oquele te cye ic tzaꞌn jun tzaj chaꞌx queꞌyin ex mintiꞌ in tzkij, wucꞌile taꞌ ju xtalbil cyibaj ke xjal etzan wuꞌne.
Aju mancbil yol
9 Aju xjal at tnabl ex at tojtzkibl, baꞌn tuꞌn tel tnicꞌ tiꞌj ju yol lu: Ke tbe Kman jikunxix cyiꞌj ex cucx in che bet ke xjal tzꞌaklxix cyuj; atzun ke xjal binchal mya baꞌn, in che jaw tzꞌak cyuj.