AMÓS
Tzul castiw cyibaj ke nasyon cyvesin cyib cyucꞌil aj Israel
1
Atzun tkanil jlu tzaj tmaꞌn Dios te Amós aju pastor ẍneꞌl tuj tnam Tecoa; in yolin cyiꞌj aj Israel tej atxtok cab abkꞌi tuꞌn ttzaj cyaknajnab tuj tkꞌijlalil Uzías aju rey cye aj Judá, ex tuj tkꞌijlalil Jeroboam aju tcyꞌajal Joás ex rey cye aj Israel.2 Chi in tmaꞌn:
Oc ttzaj tkꞌajkꞌajel twi Kman in julin wen max twi witz Sión tuj Jerusalén, aju lugar te cywabl alumaj cbajel tzkij ex cbajel tzkij tiwitz txꞌotxꞌ Carmelo.
3 Atzun yol lu in tmaꞌn Kman: Nimcu mya baꞌn ma cybincha aj Damasco, cyjaꞌtzun mlayx tzicꞌx tiꞌj wuꞌne tuꞌn miꞌn tcub cycastiw tuꞌn tlaj ma che oc ten yajlal cye xjal aj Galaad, ex ic ma che oc cyuꞌn ic tzaꞌn in baj wabat triw tuꞌn cꞌuxbil cyuꞌn chej oc nneꞌl bajut. 4 Tuꞌn tlaj jlu cꞌoquel nkꞌoꞌne tkꞌakꞌal tja rey Hazael, ex tuꞌn kꞌakꞌ lu che bajel tzꞌeꞌy ke tja Ben-hadad jatum in cawin. 5 Cꞌoquex npaꞌne tlamel tnam Damasco ex cnajel rey wuꞌne, aju in cawin tuj chkꞌajlaj Avén, tucꞌix ju rey in cawin tuj Bet-edén; atzun ke xjal aj Siria che xel kꞌiꞌn pres tuj txꞌotxꞌ Kir, chi Kman.
6 Atzun yol lu in tmaꞌn Kman: Nimcu mya baꞌn ma bant cyuꞌn aj Gaza, cyjaꞌtzun mlay tzicꞌx tiꞌj wuꞌne tuꞌn miꞌn tcub cycastiw, tuꞌnju ma txi cyiꞌn pres enter jun tnam xjal ex ma cheꞌx cycꞌayin cye aj Edom tuꞌn cyoc te majen. 7 Tuꞌn tlaj jlu cꞌoquel nkoptzꞌiꞌne kꞌakꞌ tiꞌj muro toc tiꞌjele tnam Gaza, ex tuꞌn kꞌakꞌ lu che bajel tzꞌeꞌy ke tja rey jatum in cawin. 8 Cnajel rey tuj tnam Asdod wuꞌne, tucꞌix ju cawil at tuj tnam Ascalón. Tuꞌn tcyakil wipumale chin oquel tzokpaje tiꞌj tnam Ecrón ex misicyer jun aj Filistey cyjel ankꞌin, chi Kman Dios.
9 Atzun yol lu in tmaꞌn Kman: Nimcu mya baꞌn ma cybincha aj Tiro, cyjaꞌtzun mlay tzicꞌx tiꞌj wuꞌne tuꞌn miꞌn tcub cycastiw, tuꞌnju ma txi cycꞌayin enter tnam xjal cye aj Edom tuꞌn cyoc te majen ex mintiꞌ ma japun cyuꞌn aju cyyol cyaj bant tiꞌj cyucꞌil mastl tnam ka tuꞌn cyonin cyib. 10 Tuꞌn tlaj jlu, cꞌoquel nkoptzꞌiꞌne kꞌakꞌ tiꞌj muro toc tiꞌjele tnam Tiro, ex tuꞌn kꞌakꞌ lu che bajel tzꞌeꞌy ke tja rey jatum in cawin.
11 Atzun yol lu in tmaꞌn Kman: Nimcu mya baꞌn ma cybincha aj Edom, cyjaꞌtzun mlay tzicꞌx tiꞌj wuꞌne tuꞌn miꞌn tcub cycastiw, tuꞌnju e oc lpeꞌ cyiꞌj aj Israel akeju cyerman, e kꞌojin cyiꞌj tucꞌil cyspad tuj cykꞌab tuꞌn tcub cyiꞌj cyuꞌn. Mintiꞌ tzaj kꞌakꞌan cycꞌuꞌj cyiꞌj cyerman, cucx e kꞌojin cyiꞌj ex biꞌx ma txi cycꞌuꞌn cytxꞌuꞌjil tuj cyanmi. 12 Tuꞌn tlaj jlu cꞌoquel nkoptzꞌiꞌne kꞌakꞌ tiꞌj tnam Temán, ex tuꞌn kꞌakꞌ lu che bajel tzꞌeꞌy ke tja rey jatum in cawin tuj tnam Bosra.
13 Atzun yol lu in tmaꞌn Kman: Nimcu mya baꞌn ma cybincha aj Amón, cyjaꞌtzun mlay tzicꞌx tiꞌj wuꞌne tuꞌn miꞌn tcub cycastiw, porque nok tuꞌn tel lakꞌeꞌ cytxꞌotxꞌ cuꞌx cyjakoꞌn cycꞌuꞌj ke xuꞌj otok tzꞌoc ten cyal ateꞌ tuj txꞌotxꞌ Galaad. 14 Tuꞌn tlaj jlu cꞌoquel nkoptzꞌiꞌne kꞌakꞌ tiꞌj muro toc tiꞌjele tnam Rabá, ex tuꞌn kꞌakꞌ lu che bajel tzꞌeꞌy ke tja rey jatum in cawin oc matok in che schꞌin ke xjal tuj kꞌoj ex in xumin cykꞌikꞌ jbal wen. 15 Atzunte rey cxel kꞌiꞌn tuj juntl tnam najchak junx cyucꞌil ke xinak at cyoclen ttxlaj, chi Kman.