2
Atzun yol lu in tmaꞌn Kman: Nimcu mya baꞌn ma cybincha aj Moab, cyjaꞌtzun mlay tzicꞌx tiꞌj wuꞌne tuꞌn miꞌn tcub cycastiw, tuꞌnju cub cypatun tbakil rey cye aj Edom tejxi tcub tzaꞌjix. 2 Tuꞌn tlaj jlu cꞌoquel nkoptzꞌiꞌne kꞌakꞌ tiꞌj txꞌotxꞌ Moab ex che bajel tzꞌeꞌy ke tja rey tuj tnam Queriot, ke kꞌojlel che schꞌil wen tuj kꞌoj, tucꞌix chun in kꞌajt cyuꞌn, ex che cymeltzun aj Moab cyuꞌn aj kꞌoj cyiꞌj. 3 Cꞌelel wiꞌne cyrey aj Moab ex cymel wuꞌne, cyucꞌix keju at cyoclen ttxlaj, chi Kman.4 Atzun yol lu in tmaꞌn Kman: Nimcu mya baꞌn ma cybincha aj Judá, cyjaꞌtzun mlay tzicꞌx tiꞌj wuꞌne tuꞌn miꞌn tcub cycastiw, tuꞌnju mintiꞌ ma txi cyniman ke nxnakꞌtzbile, akine Cyman, ex mintiꞌ ma txi cyniman ke nleye, nok oꞌcx ma che el tzpet tuꞌnju in che cꞌulun cywitz ke tilbilal, akeju e cꞌulun cyxeꞌchel cywitz. 5 Tuꞌn tlaj jlu, cꞌoquel nkoptzꞌiꞌne kꞌakꞌ tiꞌj txꞌotxꞌ Judá, ex tuꞌn kꞌakꞌ lu che bajel tzꞌeꞌy ke tja rey jatum in cawin tuj Jerusalén.
Tzul castiw cyibaj aj Israel
6 Atzun yol lu in tmaꞌn Kman: Nimcu mya baꞌn ma cybincha aj Israel, cyjaꞌtzun mlay tzicꞌx tiꞌj wuꞌne tuꞌn miꞌn tcub cycastiw, tuꞌnju in xi cycꞌayin aju xjal mintiꞌ til tuꞌn tlaj tcꞌas ex ju meba xjal in xi cycꞌayin nok tuꞌn jun moj xjab. 7 In che yajlan cyiꞌj ke xjal meba ex mintiꞌ in xi cybinchaꞌn cyiꞌj ke xjal mans. Jun cuꞌxun tucꞌil tman in che cub tan tucꞌil junx kꞌapoj, ex tuꞌntzun jlu nnoꞌc cykꞌoꞌn nbiye xjan te mintiꞌ tajben. 8 Twitz nok alcyex altar in che cub coẍeꞌ tibaj xbalun otok cyaj cyiꞌn te prent, ex tuj tja cydios in cheꞌx cꞌal vin otok tzaj cylakꞌoꞌn tuꞌn cymult xjal.
9 Atzun weye e baj naj aj Amorrey wuꞌne cywitze, masque ma tij cywaꞌl ic tzaꞌn twaꞌl tzeꞌ wiꞌten ex puro cyuw ke ic tzaꞌn tzeꞌ cꞌol, pero biꞌx e baj naj wuꞌne te jumajx. 10 Atzun cyeye e jeꞌtz wiꞌne tuj Ejipt ex 40 abkꞌi e ẍaklunjtze wuꞌne tuj tzkij txꞌotxꞌ tuꞌn t-xi nkꞌoꞌne cytxꞌotxꞌ aj Amorrey te cyeye. 11 Cyxol ke cycyꞌajale e jaw nscꞌoꞌne junjun tuꞌn cyoc te nsanjele ex junjuntl e oc nkꞌoꞌne te Nazarey. ¿Myape ax toc jlu, akeye aj Israel? Chi Kman.
12 Atzun cyeye oc cylajwersine ke Nazarey tuꞌn t-xi cycꞌaꞌn vin ex e oc cymayoꞌne ke nsanjele tuꞌn miꞌn t-xi cypacbaꞌn nyole. 13 Cybintze, oc nbinchaꞌye tuꞌn cybaj betzꞌane cyuꞌn ke aj kꞌoj cyiꞌje, ic tzaꞌn in cub betzꞌkꞌaj txꞌotxꞌ tjakꞌ jun carret nojni wen tuꞌn nimcu cheꞌl triw. 14 Masque cye che ojkelane wen, pero mlay che tzokpaje; aju xjal at tipun, cbajel tipun, ex ke xjal cyuw cycꞌuꞌj tuj kꞌoj, mlay che clet. 15 Aju xjal at t-xobl plech mlay cub weꞌ twitz aj kꞌoj tiꞌj, ke xjal cye che ojkelan, mlay che clet ex mi ke xjal cyjax cyibaj chej, ax icx mlay che clet. 16 Tuj tkꞌijlalil lu, aju xjal mas cyuw tcꞌuꞌj tuj kꞌoj che cyjel t-xoꞌn ke tmacbil in che ajben tuj kꞌoj tuꞌntzun tbant tkelan oc tel ok. Ate Kman ma kꞌmante yol lu.