Aju cyakꞌun t-sanjel Dios
3
Akeye aj Israel, cybinxe aju in tmaꞌn Kman cyiꞌje, aju etz kꞌinte cyeye cycyakile tuj Ejipt, chi cyjaꞌ:2 Oꞌcx akeye ma che jaw nscꞌoꞌne cyxol mastl cyiyjil xjal twitz txꞌotxꞌ, cyjaꞌtzun cbel nkꞌoꞌne cycastiwoye tuꞌn tlaj tcyakil cybinchbene mya baꞌn.
3 ¿Tzinpe in che bet cabe xjal junx ka mya mojl cyyol? 4 ¿Tzinpe in tzanun jun balun tjakꞌ cꞌul ka mintiꞌ jun tcanb tcub twitz? ex ¿tzinpe in tzanun jun tal tman balun tuj tjul ka mintiꞌ otok cub jun tcanb? 5 ¿Jacupe tzyet jun chyuꞌj ka mintiꞌ jun cꞌobil tcub? ¿Tzinpe in cub tzꞌak jun cꞌobil twitz txꞌotxꞌ ka mintiꞌ otok tzꞌocx jun tcanb? 6 ¿Mintiꞌpe in che jaw xob xjal ka ma kꞌajt chun tuj tnam? ex ka at jun mya baꞌn ma tzaj tuj tnam, ¿myape a Kman in tzaj samante te? 7 Mlay tbincha Kman jun tiꞌxti ka naꞌnxtok ttzaj tmaꞌn cye t-sanjel. 8 ¿Alcye jun mlay tzaj luꞌlun tuꞌn t-xobil ka in tzanun jun balun? ¿Alcye jun mlay txi tmaꞌn tyol Kman cye xjal ka ax Kman Dios otok kꞌmante?
Cbel xitj tnam Samaria
9 Cymanxe jlu cyuj ke tja rey tuj tnam Asdod ex cyuj ke tja rey tuj tnam Ejipt: Cytzaje cywiꞌ ke witz te Samaria ex cyqueꞌyinxe aju mya baꞌn in baj tuj ex tzaꞌn tten nim in che yajlanjtz xjal cyuꞌn mastl cyucꞌil, che chicuye.
10 Chi Kman in tmaꞌn: Mintiꞌ nneꞌl cynicꞌ tiꞌj tzaꞌn tten tuꞌn cybinchante aju tzꞌaklxix, in xi cycꞌuꞌn cyuj ke nmak ja tcyakilju nneꞌl cyelkꞌaꞌn lajwers cye mastl xjal.
11 Tuꞌntzun jlu, chi Kman Dios in tmaꞌn: Cbajel cytxolban cyib aj kꞌoj tiꞌjele cytanmiye, cbajel cyxitun ke ja maꞌ cywaꞌl te cycolbil cyibe ex cxel cyiꞌn tcyakilju at cyuj tja rey.
12 Chi Kman in tmaꞌn: Ic tzaꞌn te pastor nneꞌl t-xcꞌayin cabe piẍ tkan alumaj, ex ka jun piẍ t-ẍcyin tuj ttzi balun, icxtzun che tembil ke aj Israel najl tuj Samaria, nok junjun che cletel, mer ic tzaꞌn jun piẍ tkan watbil ex ka jun piẍ tkan siy in cyaj ten. 13 Chi Kman aju Tajaw Tcyakil: Cybintze ex cyoque testiw cyiꞌj tiyjil Jacob, tiꞌj cybinchben mya baꞌn; 14 tuj kꞌij oc tcub cycastiw aj Israel tuꞌn tlaj cyil, che bel nxitune ke altar tuj tnam Betel; che elel txꞌemit ke tcach altar ex che bel tzꞌak twitz txꞌotxꞌ. 15 Cbel nxitune cyja xjal jatum in che ten tuj tkꞌijlalil cheꞌw, tucꞌix cyja jatum in che ten tuj tkꞌijlalil cyak; che najel ke ja tocsaꞌn marfil twitz cycajonil te tujxi ex che najel cycyakil ke nmak ja wuꞌne jatum najl ke xjal maꞌ cyoclen, chi Kman.