4
Cybintze jlu, akeye xuꞌj aj Samaria maꞌ cyoclene ex tbanilxix che queꞌyine, akeye in che oc tene yajlal cye ke meba ex in che oc tene yajlal cye keju mintiꞌ at cye ex in xi cymaꞌne te cychmile: Cyiꞌntze vin tuꞌn kcꞌan tiꞌj, che chiye. 2 Ma tzaj ttziyan Kman Dios Xjan jun yol axix toc lu: Tzul tkꞌijlalil tuꞌn cyxi kꞌiꞌne pres ex che tzyetele tuꞌn ganch; cycyakile che tzyetele mer ic tzaꞌn in che tzyet cyiẍ tuꞌn ganch. 3 Cycyakile che elex kꞌiꞌne jatum otok jaket muro toc tiꞌjele tnam, txolin cytene che elex kꞌiꞌne ex che xel kꞌiꞌne tuꞌn cypone tumlal witz Hermón. A Kman ma kꞌmante jlu.Jun yol te xmaybil cye xjal tiꞌj ju in bant cyuꞌn
4 Cyxiꞌye tuj Betel ex che binchane il ex cyxiꞌye tuj Gilgal ex che binchane mastl mya baꞌn. Cyiꞌnxe chojbil te Dios cycyakil prim ex cyiꞌnxe tlajiꞌn tuj tcyakil toxin kꞌij. 5 Cykꞌonxe ke pan at t-samel cyuj te cyoyaje te akꞌbil chjonte ex cykꞌmanxe tkanil tuj tcyakil lugar tiꞌj cyoyaje in xi cykꞌoꞌne tuꞌn cyexe tbis cycꞌuꞌje, porque tiꞌjtzun jlu mas in che tzalaje, chi Kman Dios.
Masque cub cycastiw aj Israel, pero mintiꞌx el cynicꞌ tiꞌj
6 Wuꞌne tzaj weꞌyaj tuj tcyakil cytanmiye ex wuꞌnxe mintiꞌ o canun cywaye tuj tcyakil cylugare, pero mintiꞌx e ajtz meltzꞌaje wucꞌile, chi Kman. 7 Ax icx mintiꞌ tzaj jbal wuꞌne tej atxtok ox xjaw tuꞌn tjaw chmet twitz cyawale; tzaj jbal wuꞌne tuj jun tnam, atzun tuj juntl mintiꞌ tzaj; tzaj jbal tuj jun cojbil, atzun tuj juntl cojbil tcyakil o tzkij tuꞌn tlaj mintiꞌ tzaj jbal; 8 e betjeꞌye jyol aꞌ cyuj ke tnam, ex aju chꞌin cnet cyuꞌne mintiꞌ canun tuꞌn tkꞌajen txketleꞌn cyiꞌje, atzun cyeye mintiꞌ e ajtz meltzꞌaje wucꞌile, chi Kman.
9 Tzaj nsamaꞌne cykꞌikꞌ cyiꞌje nim taꞌw cyak ikan tuꞌn, ex tzaj nsamaꞌne soj tiꞌj cyawale; wuꞌne e tzkij cyawale cyucꞌix tkan cy-uvaye, ex ke tkan higo awaꞌn cyuꞌne e naj cyuꞌn ẍplon, cyucꞌix ke tkan olivo. O nbinchaye tcyakil jlu, pero mintiꞌx e ajtz meltzꞌaje wucꞌile, chi Kman.
10 Tzaj nsamaꞌne jun cꞌixbisabl cyibaje ic tzaꞌn xi nsamaꞌne cyibaj xjal aj Ejipt; o che cyim ke cycuꞌxune wuꞌne tuj kꞌoj ex xi nkꞌoꞌne ambil cye aj kꞌoj cyiꞌje tuꞌn cyoc te cyajwil cycheje; o che sakone cyiꞌj cyxewil cyimni tuj lugar jatum e cub ten ke soldad, pero mi tuꞌn icju, mintiꞌ e ajtz meltzꞌaje wucꞌile, chi Kman.
11 E naj nimcu cyeye wuꞌne ic tzaꞌn e baj naj aj Sodoma ex aj Gomorra, atzun ke txkantl ic e oc ic tzaꞌn jun ttxꞌan siꞌ nneꞌtz tuj kꞌakꞌ otok baj tzꞌeꞌy tiꞌj. Masque icju pero mintiꞌx e ajtz meltzꞌaje wucꞌile, chi Kman.
12 Cyjaꞌtzun akeye aj Israel icxtzun che telbiye wuꞌne, ex tuꞌnju cbantel wuꞌne cyiꞌje icju, cyjaꞌtzun cybincham cytene tuꞌn cycꞌlunte cyibe wucꞌile, tuꞌn cyoque tuj xjel wuꞌne, chi Dios.
13 Tuꞌn Kman e bant ke witz ex ax o binchante cykꞌikꞌ, in tzaj tchicꞌbaꞌn cye xjal alcye t-ximbetz ex in chꞌexpaj spicꞌun tuꞌn tuꞌn toc te klolj; in baj tbetin cycyakil lugar tiwitz txꞌotxꞌ: Kman aju Tajaw Tcyakil, atzun tbiju.