Txocbil tuꞌn Dios cyiꞌj xjal tuꞌn cyajtz meltzꞌaj tucꞌil
5
Cybintze nyole akeye aj Israel; cybintze bitz bisbajilxix in chin bitzane cyiꞌje:2 Ic cyten aj Israel ic tzaꞌn jun tal kꞌapoj naꞌnx tlonte xinak; ma che cub tzꞌak ex mlay che jaw weꞌtl; ax ma che cub txꞌayeꞌ twitz cyex cytxꞌotxꞌ ex mi aꞌl jun baꞌn tjaw wabante cye.
3 Chi Kman Dios in tmaꞌn cye aj Israel: Ka at jun tnam ma txi t-samaꞌn jun mil xinak tuj kꞌoj, nok jun syent che ul meltzꞌaj, ex ka at jun tnam ma txi t-samaꞌn jun syent, nok lajx che ul meltzꞌaj.
4 Chi Kman cye aj Israel: Chin cyjyome tuꞌntzun cyankꞌine. 5 Miꞌn cheꞌxe kanil onbil tuj Betel, miꞌn cheꞌxe tuj Gilgal ex miꞌn cheꞌxe tuj Beerseba, porque ke xjal tuj Gilgal che xel kꞌiꞌn pres najchak ex mlayx tzicꞌx tiꞌj, atzunju tnam Betel cbajel xitj.
6 Che jyone tiꞌj Kman tuꞌntzun cyankꞌine; katzun miꞌn ma bant cyuꞌne icju, ctzajel t-samaꞌn Kman kꞌakꞌ cyibaj aj Israel ex mi aꞌl jun tuj Betel jacu yupj kꞌakꞌ lu tuꞌn. 7 Ay becꞌbil cywitze tuꞌnju mintiꞌ in xi cybinchaꞌne cyiꞌj xjal tuj tumel, ex nnoꞌc cykꞌoꞌne ley te mintiꞌ tajben.
8 Ate Kman binchante cye cheꞌw Woꞌtz cybi ex ke cheꞌw Tkan Kꞌinbil cybi, in chꞌexpaj konicꞌan tuꞌn tuꞌn toc te kꞌijtl, ex aju kꞌij tuꞌn toc te konicꞌan puro klolj; in txocon tiꞌj aꞌ tuꞌn tjatz tuj mar, ex in tzaj kojl tuꞌn tibaj txꞌotxꞌ; Kman, atzun tbiju.
9 Keju at nim cyipun nok minaben in che naj tuꞌn ic tzaꞌn tuꞌn kꞌancyok, ex in che baj naj ke cwartel tuꞌn.
10 Ay becꞌbil cywitze akeye in che el icꞌunte cye keju in che binchante tiꞌj xtis tuj tumelxix, ex nneꞌl cyicꞌune aju testiw in yolin tuj tumelxix. 11 Mlay che najane tuj cyjaye abj xpeꞌlimaj ma jaw cybinchaꞌne, ex mlay txi cynicꞌbeꞌne taꞌl twitz uva tbanilxix ma cuꞌx cyawaꞌne, tuꞌnju in che yajlane cyiꞌj ke meba ex nim twitz awal nneꞌl cykanine cyiꞌj te taꞌl txꞌotxꞌ. 12 Ma tzꞌel nnicꞌe tiꞌj nimcu mya baꞌn in cybinchaꞌne, nicꞌlopun il in bant cyuꞌne: In che yajlane cyiꞌj keju tzꞌaklxix, in tzaj cycꞌmoꞌne pwak nok tuꞌn miꞌn tcub cysentens xjal cyuꞌne ex mintiꞌ in xi cybinchaꞌne cyiꞌj ke meba tuj tumelxix tuj jusgad. 13 Cyjaꞌtzun, aju xjal at tnabl mintiꞌ in kꞌajt, tuꞌnju mya baꞌn in cybinchaꞌn xjal tuj tkꞌijlalil lu.
14 Cyjyome aju baꞌn ex mya aju mya baꞌn, tuꞌntzun cyankꞌine, cyjaꞌtzun ctel Kman cyucꞌile, aju Tajaw Tcyakil, ic tzaꞌn in cymaꞌne. 15 Cyicꞌun ele aju mya baꞌn ex cycꞌujlame aju baꞌn. Cybinchanxe tiꞌj xtis tuj tumelxix tuj jusgad, kapelo jacu tzaj kꞌakꞌan tcꞌuꞌj Kman Dios aju Tajaw Tcyakil cyiꞌj aj Israel, akeju otok che cyaj ankꞌin.
16 Chi Kman Dios aju Tajaw Tcyakil, in tmaꞌn cyjaꞌ: Tuj tcyakil part cꞌoquel okꞌel, ex tuj tcyakil cay che schꞌil ke xjal tuꞌn taꞌw cꞌixcꞌoj. Che tzajel txcoꞌn akꞌnal xjal tuꞌn cyokꞌ junx cyucꞌil, cyucꞌix ke aj okꞌel tuꞌn cyul okꞌel. 17 Tjakꞌ tcyakil tkan uva cꞌoquel okꞌel oc wule kꞌolte castiw cyibaje, chi Kman.
18 Ay becꞌbil cywitz keju in cyajbeꞌn tuꞌn tul tkꞌijlalil tuꞌn ttzaj castiw tuꞌn Kman. ¿Baꞌnpe cyuꞌne tzaꞌn ctelba kꞌij lu te cyeye? Aju tkꞌijlalil lu puro klolj ex mya spicꞌun. 19 Ic ctelba ic tzaꞌn oc nneꞌl ok jun xjal twitz jun balun tuꞌn tclet, pero nnoꞌc tcꞌulban naj tib twitz jun txcup oso, ex ka ic tzaꞌn jun xjal nnoꞌcx ok tuj tja tuꞌn tclet, ex oc toc tkꞌoꞌn tkꞌab twitz ja, nnoꞌc txꞌaꞌn tuꞌn jun lobaj. 20 Ax toc, tuj tkꞌijlalil Kman cbel kloljxix twitz txꞌotxꞌ ex mintiꞌ spicꞌun, puro kxopin cꞌoquel ex misicyer chꞌin spicꞌun ctel.
21 Chi Kman cyjaꞌ: Icꞌun wuꞌne ke ninkꞌij in cub cyicꞌsaꞌne ex misicyer in chin tzalaje tiꞌj buyj tibil maꞌ t-xilen nnoꞌc cyuꞌne. 22 Masque cub cypatune alumaj te nimbil weye, ex masque tzul cyiꞌne twitz cyawale te cyoyaje te weye, mintiꞌ waje cyiꞌj; mlay ncꞌame ke tal wacẍ ulni cynabl oc tul cyiꞌne te cyoyaje te mojbabl tibil. 23 Cyel lakꞌeꞌye wiꞌje tuꞌn miꞌn nbinteye tkꞌajkꞌajel cybitze; ncꞌiꞌye tuꞌn nbinteye tkꞌajkꞌajel twi cychinbe arpa. 24 Atzun waje, tuꞌn cybinchanteye tzꞌaklxix tcyakil kꞌij ic tzaꞌn jun nima mintiꞌ nnaꞌj tzkij, ex cucx tuꞌn cybete tuj tumelxix ic tzaꞌn jun twiꞌ aꞌ cucx in pulwin.
25 Akeye aj Israel, ¿baka weye tzaj cykꞌoꞌne chojbil ex cyoyaje tbanilxix tej cytene 40 abkꞌi tuj tzkij txꞌotxꞌ? 26 Nok oꞌcx xi cyikane tilbilal Sicut aju oc cykꞌoꞌne ic tzaꞌn jun cyreye, ex ju tilbilal cheꞌw Quiún, akeju tilbilal cydiose lu, cyuꞌnxe e bant. 27 Cyjaꞌtzun, che xel wiꞌne pres max tiꞌjxi Damasco, chi Kman aju Dios Tajaw Tcyakil; atzun tbiju.