Tzul xitbil cyibaj aj Israel
6
Ay becꞌbil cywitze akeye in che ankꞌine tuj achbil tuj tnam Sión. Ay becꞌbil cywitze akeye kꞌukl cycꞌuꞌje tiꞌj tnam Samaria, akeye nejenel te nasyon mas nim toclen, ex in che ul aj Israel kanil onbil cyucꞌile. 2 Cyxiꞌye tuj tnam Calne tuꞌn cyqueꞌyine ti ma baj tiꞌj; bix che icꞌe tuj tnam Hamat aju mas ma tij, ex tkanx che cuꞌxe tuj tnam Gat, aju cytanmi aj Filistey. ¿Maspetzun baꞌn keye cywitz ke tnam lu? ¿Maspe nim cytxꞌotxꞌ ke tnam lu twitz cyeye cytxꞌotxꞌ? 3 Mintiꞌ cyaje tuꞌn cyximane tiꞌj tkꞌijlalil castiw tzul, pero tuꞌnju cybinchbene mya baꞌn jurat naj tzul cyiꞌne xitbil cyuwxix cyibaje. 4 In che tane cyibaj tbanil watbil toc marfil cyiꞌj, in xi cychꞌalin cyibe cyibaj tbanil kꞌukbil ex in che chyoꞌne cyiꞌj ẍneꞌl ex tal wacẍ ulni cynabl; 5 in che bitzane lepchkeꞌque tiꞌj tkꞌajkꞌajel twi arpa ex nneꞌl cycanoꞌne tiꞌj David, in baj cybinchaꞌne txkantl txcaj chnab; 6 in che cꞌane vin cyuj ke nmak cꞌabl, tbanilxix aju perjum in ajben cyuꞌne, ex misicyer in tzaj cybise tiꞌj xitbil tzul tiꞌj cytanmiye. 7 Akeye che xel kꞌiꞌn tnejel tuꞌn cyxiꞌye tuj juntl tnam najchak ex atzun cpol baj twi nintz waꞌn nnoꞌc cyuꞌne ex ju cyachbile in bant.8 Ma txi ttziyan Kman jun yol axix toc tuꞌnx tib: Ate Kman aju Dios Tajaw Tcyakil in tmaꞌn: Icꞌun wuꞌne aju cynimbil cyib tiyjil Jacob, cyucꞌix ke cyja xjal ma tij, ex cxel nkꞌoꞌne tnam lu tuj cykꞌab aj kꞌoj tucꞌix tcyakilju at tuj, chi Kman.
9 Ka ma che cyaj ten laj xjal tuj jun ja, cycyakil che cymel. 10 Oc tjaw tiꞌn jun xjal t-ximlal ktzan terman tuꞌn tex tiꞌn ttxaꞌn peꞌn tuꞌn tcub tpatun, cxel tkanin te juntl tucꞌil tocx tuja: ¿Atxpe juntl xjal itzꞌx ma cnet tuꞌna? Mintiꞌ, chi juntl ctzajel ttzakꞌweꞌn. Atzunju tnejel cxel tmaꞌn: Miꞌn kꞌajta, porque mya baꞌn tuꞌn ttzaj knaꞌn tbi Kman Dios. 11 Porque ctzajel tmaꞌn Kman tuꞌn ttzaj castiw cyibaj ke ja nmak ex cyibaj ke ja chꞌin, ex il tiꞌj tuꞌn cybaj xitj cycyakil.
12 ¿Jacupe che jax ke chej twitz pic? ¿Jacupe bant cychꞌoquin xjal twitz pic? Icxtzun cyeye, mintiꞌ ma txi cybinchaꞌne cyiꞌj xjal tuj tumelxix ex nnoꞌc cykꞌoꞌne ley te mintiꞌ tajben.
13 In jaw cyniman cyibe tuꞌnju o cub tiꞌj tnam Lo-debar cyuꞌne, ex in cymaꞌne cyjaꞌ: ¿Myapetzun tuꞌn kex kipumal cub tiꞌj tnam Kornaim kuꞌn?
14 Akeye aj Israel, cykꞌoꞌnque cwent tiꞌj, porque ate Dios aju Tajaw Tcyakil in tmaꞌn cyjaꞌ: Ctzajel wiꞌne jun nasyon tuꞌn tkꞌojin cyiꞌje, tuꞌntzun cyyajlanjtzxixe tuꞌn, ex max ctzajel keꞌ yajbil ttxaꞌn cytxꞌotxꞌe tuj tnam Hamat tuꞌn tpon baj max tuj juntl pacꞌ ttxaꞌn cytxꞌotxꞌe tuj tkꞌab xak Arabá.