Aju o til Amós ic tzaꞌn tuj witzicꞌ cyiꞌj ẍplon
7
Atzun jlu tzaj tyecꞌun Kman Dios weye: O wile e jaw tpokꞌsaꞌn nimxix ẍplon tej matok in tzaj chꞌiy awal yaj nnuꞌl tkꞌij, tjawlenxi baj chmet te rey. 2 Tejtzun tbaj cywaꞌn ẍplon tcyakil awal, xi nmaꞌne cyjaꞌ:—Ay, Nman Dios, najsama kile. ¿Tzaꞌn tten cꞌicꞌelex cyuꞌn ke tiyjil Jacob, baka nim cybaj? Nchiye.
3 Atzunte Kman tzaj chewix tcꞌuꞌj ex tma:
—Ya mlay tzaj nsamaꞌne castiw lu.
Aju o til Amós ic tzaꞌn tuj witzicꞌ tiꞌj kꞌakꞌ
4 Atzun jlu tzaj tyecꞌun Kman Dios weye: O wile tej ttzaj t-samaꞌn kꞌakꞌ tuꞌn tcub cycastiw xjal, ex biꞌx baj tzꞌeꞌy ju mar maꞌ t-xeꞌ tuꞌn, ex cyjaꞌtok tcub baj tzꞌeꞌy cycojbil xjal tuꞌn. 5 Atzun weye xi nmaꞌne te:
—Nman Dios, binchama xtalbil tuꞌn tweꞌ jlu tuꞌna. ¿Tzaꞌn tten cꞌicꞌelex cyuꞌn ke tiyjil Jacob, baka nim cybaj? Nchiye.
6 Atzunte Kman tzaj chewix tcꞌuꞌj ex tma:
—Ax icx ju castiw lu mlay tzaj nsamaꞌne.
Aju o til Amós ic tzaꞌn tuj witzicꞌ tiꞌj jun plom in ajben cyuꞌn albañil
7 Ax icx tzaj tyecꞌuntl Kman jlu weye: Lu Kman waꞌl ttxlaj jun muro ex kꞌiꞌn jun plom tuꞌn aju in ajben cyuꞌn albañil. 8 Tzajtzun tkanin weye: ¿Ti ma tila, Amós?
—Ma wile jun plom in ajben cyuꞌn albañil, nchiye, xi ntzakꞌweꞌne.
—Tuꞌnju plom lu cꞌelel nnicꞌe tiꞌj ka tuj tumel in che bet aj Israel akeju etzan wuꞌne. Mlay cub nnajsaꞌntle cyil. 9 Biꞌx che najel wuꞌne ke lugar cywi witz akeju in che ajben te cycꞌulbil tiyjil Isaac, biꞌx che bel xitj ke ja wuꞌne jatum in che cꞌulun aj Israel cywitz cydios ex che najel ke tiyjil rey Jeroboam wuꞌne tuꞌn nspadiye, chi Dios.
Oc icꞌlen Amasías tuꞌn Amós
10 Ate Amasías aju pal te tnam Betel xi t-samaꞌn tkanil lu tucꞌil Jeroboam aju rey cye aj Israel: In bet Amós cyxol aj Israel ex in yolin tiꞌja, ka tuꞌn tel kꞌiꞌn toclena. Mya baꞌn ka cucx ma yolin, 11 porque in tmaꞌn: Cymel Jeroboam tuꞌn spad ex cycyakil aj Israel che xel kꞌiꞌn najchak tuj juntl nasyon, chi Amós, chi Amasías.
12 Xitzun tmaꞌn Amasías te Amós:
—Texa tzalu Amós, aya baꞌn nabin tuꞌn Dios. Ka taja tuꞌn twaꞌna tiꞌj ju yol in pacbana tiꞌj, txiꞌya pacbal tuj Judá, 13 ex miꞌn pacbana mastl tuj Betel, porque atzun taꞌ ja te cꞌulbil banimaj tuꞌn rey tuj tnam lu, aju ja maꞌ toclen te cycꞌulbil cycyakil xjal, chi Amasías. 14 Atzunte Amós xi ttzakꞌweꞌn:
—Myatok t-sanjel Dios kine ex mya t-xnakꞌtzben t-sanjel Dios kine. Nok oꞌcx pastoril alumaj kine ex in chin kꞌintoke twitz higo te tjakꞌ cꞌul, 15 pero ate Kman o tzꞌel kꞌinte weye tiꞌj pastorj alumaj ex tma weye: Txiꞌya cyxol aj Israel akeju etzan wuꞌne, ex pacbanxa nyole cye. 16 Cyjaꞌtzun bintza aju tyol Kman. Teya in tmaꞌna weye: Miꞌn txi tmaꞌna tyol Dios cye aj Israel, ka tuꞌn tcub cycastiw, ex miꞌn txi tmaꞌna jun yol mya baꞌn cyiꞌj ke tiyjil Isaac, chitzuna, 17 atzunte Kman in tmaꞌn teya: Aju t-xuꞌjila cꞌoquel te cyyaẍ xinak tuj tnam lu, atzun ke tcyꞌajala ex ke tmeꞌjela che cymel tuꞌn spad. Cjawil kꞌiꞌn swert tiꞌj ttxꞌotxꞌa tuꞌn tbaj sipan cyxol xjal, ax icx teya cymela tuj cytxꞌotxꞌ stranjer xjal, atzun ke aj Israel che xel kꞌiꞌn tuj juntl txꞌotxꞌ najchak, chi Amós.