—¿Ti ma tila, Amós?

—Ma wile jun chiꞌl twitz awal baꞌn tloꞌnjtz ma kꞌanix, nchiye.

Tzajtzun tmaꞌn Kman weye:

—Ake aj Israel ic cyten ic tzaꞌn twitz awal baꞌn tloꞌnjtz ma kꞌanix, mlayx cub nnajsaꞌntle cyil. 3 Tuj kꞌij lu, akeju bitzal tuj tja rey mlay che bitzantl, nok oꞌcx che oquel ten ayil. Nimcu xjal che cymel tuj tcyakil lugar ex mi jun ckꞌajtel oc cyetz xoꞌn. A Kman in kꞌmante jlu.

4 Cybintze aju yol lu, akeye in che yajlane cyiꞌj ke tal yaj xjal ex in che baj cycꞌixbisaꞌne ke meba xjal tuj cytanmiye. 5 In cymaꞌne: ¿Jtoj ban tbaj ninkꞌij acꞌaj xjaw tuꞌntzun kcꞌayin triw? ¿Jnicꞌ ban tex ju kꞌij te ojlabl tuꞌn t-xi kcꞌayin twitz awal ex tuꞌn tajben kmalbil chꞌin tuj, ex kmarc mya cabal talil, ex tuꞌn kcꞌayin car twiꞌ? 6 Che bajel kyajlaꞌn ke meba xjal ocxi ttzaj cycꞌayin cyib te majen tuꞌn tchjet cycꞌas, masque nok oꞌcx twiꞌ jun moj xjab cycꞌas; ax icx cxel kcꞌayin tbuchil triw mintiꞌ tajben, che chiye. 7 Ate Kman aju in jaw cynimsaꞌn aj Israel, xi ttziyan jun yol axix toc tuꞌnx tib, chi tma: Mlayx tzicꞌ tnaꞌl wuꞌne aju mya baꞌn o cybincha. 8 ¿Miꞌnpelo tzaj luꞌlun txꞌotxꞌ tuꞌn tlaj tcyakil jlu? ¿Miꞌnpelo txi cyokꞌjeꞌn cycyakil xjal najl twitz? Aju txꞌotxꞌ cjawil chꞌiy ex cbel lakꞌeꞌ, ic tzaꞌn oc in chꞌiy nima Nilo ex in cub tiꞌj. 9 Chi Kman Dios in tmaꞌn: Tuj tkꞌijlalil tzul, mer te chilcukꞌij cꞌelex kꞌij wuꞌne ex cꞌoquel yupj twitz txꞌotxꞌ. 10 Aju cyninkꞌije te tzalajbil cꞌoquel nkꞌoꞌne te okꞌel, ex ju cybitze cchꞌexpetel wuꞌne tuꞌn toc te okꞌel ic tzaꞌn in che okꞌ xjal tiꞌj cyimni, ex oc nbinchaꞌye tuꞌn toc cykꞌoꞌne cyxbalune chꞌiꞌx twitz ex tuꞌn tel baj cymatzoꞌn ttzmal cywiꞌye te jun techal tiꞌj cybise. Che okꞌele ic tzaꞌn otok cyim oꞌcxcu jun cycꞌwaꞌle, ex tcyakil cpol baj tuj cꞌixcꞌoj ex bis.

11 Chi Kman Dios: Tzul tkꞌijlalil tuꞌn ttzaj nsamaꞌne weꞌyaj twitz txꞌotxꞌ, pero mya weꞌyaj tuꞌn tlaj mintiꞌ wabj ex mya txketleꞌn tuꞌn tlaj mintiꞌ cꞌabj, nok oꞌcx weꞌyaj tuꞌn cybinte xjal tyol Dios, pero mi jun xjal ctzajel kꞌmante tyol Dios cye. 12 Che betjebil xjal in che jyon tiꞌj tyol Dios; che xeꞌl jyolte tuj tcyakil part ttzi mar, che xeꞌl jyolte tuj tbankꞌab kꞌij ex che pol baj max tuj tjawitz kꞌij, pero mlayx cnet cyuꞌn. 13 Tuj kꞌij lu, ke kꞌapoj tbanilxix che queꞌyin ex ke cuꞌxun che bel numj tuꞌn txketleꞌn. 14 Akeju in tzaj cynaꞌn cybi ke tilbilal ateꞌ tuj Samaria tuꞌn t-xi cymaꞌn jun cyyol ex in tzaj cynaꞌn tbi cydios aj Dan ex aj Beerseba tiꞌj jun yol in xi cytziyan, che bel tzꞌak ex mlay che jaw weꞌ juntl maj.