—Bintza Nman, atzun jlu o nmaye tej atinxtoke tuj ntanmiye. Cyjaꞌtzun cub nximane tuꞌn nxi ok naje tuj tnam Tarsis, porque baꞌn wuꞌne aya jun Dios jurat in cub tcꞌuꞌja ex in tzaj kꞌakꞌan tcꞌuꞌja, mya jurat naj in jaw kꞌojla ex at nim tcꞌujlalila, in tmaꞌna tuꞌn ttzaj castiw, pero jurat in chꞌexpet t-ximbetza tuꞌn miꞌn ttzaj. 3 Cyjaꞌtzun Nman, in chin cubsane twitza tuꞌn ncyime tuꞌna. Mas baꞌn te weye tuꞌn ncyime twitzju tuꞌn wankꞌine.

4 Atzunte Kman tzaj ttzakꞌweꞌn:

—¿Baꞌnpe in tbinchaꞌna tuꞌnju in jaw kꞌojla?

5 Etztzun Jonás tuj tnam ex cub ten ttxaꞌn tnam tuj tjawitz kꞌij, jaw tbinchaꞌn jun tal t-xmuꞌj ex cub keꞌ tjakꞌ t-xlecumal, in ayon tiꞌj alcye tuꞌn tbaj tiꞌj tnam. 6 O tbincha Kman Dios tuꞌn ttzaj chꞌiy jun wiꞌ akꞌ tibaj t-xmuꞌj Jonás, tuꞌntzun tten t-xlecumal tibaj twiꞌ, tuꞌntzun puro baꞌn tuꞌn tela tnaꞌn; ex nimxix o tzalaj Jonás tiꞌj tkan akꞌ. 7 Tejtzun kskix te juntl kꞌij, tzaj t-samaꞌn Dios jun ẍukꞌ tuꞌn toc twaꞌn t-xe tlocꞌ ex biꞌx tzkij akꞌ. 8 Tejtzun tkoptzꞌaj kꞌij, tzaj t-samaꞌn Dios jun nintz cykꞌikꞌ nim tcyakal tzaj tuj tjawitz kꞌij; ax icx nnoꞌctok taꞌw kꞌij wen tiꞌj twiꞌ Jonás, ex tuꞌn jlu el baj tipun ex o tajbe tuꞌn tcyim. Cyjaꞌtzun o tma cyjaꞌ:

—Mas baꞌn te weye tuꞌn ncyime twitzju tuꞌn wankꞌintle, chi Jonás.

9 Pero tzaj ttzakꞌweꞌntl Dios:

—¿Baꞌnpe in tbinchaꞌna tuꞌnju in jaw kꞌojla tiꞌj tkan akꞌ ma tzkij? Chi Dios.

—Ax toc baꞌn, in chin kꞌojle wen ex wajbile tuꞌn ncyime, chi Jonás.

10 Atzunte Kman tzaj tmaꞌn:

—Teya ma tzaj tzꞌeꞌy tcꞌuꞌja tiꞌj tkan akꞌ ex mya aya xcuꞌx awante, ex mya tuꞌna xchꞌiy; tuj junx konicꞌan xjawil pokꞌl, ex te juntl konicꞌan ma tzkij. 11 Cyjaꞌtzun tuj tumel tuꞌn ttzaj tzꞌeꞌy ncꞌuꞌje tiꞌj tnam Nínive, porque tuj nintz tnam lu at mas te jun syent tucꞌ winkin mil cꞌwaꞌl mintiꞌ cyil ex nimcu alumaj, chi Kman.