3 Cubtzun be tuꞌn Jonás ex xiꞌ tuj tnam Nínive ic tzaꞌnx otok tma Kman te. Ma tijxix aju tnam Nínive, oxe kꞌij in xi tiꞌn tuꞌn tbaj kbetin tuj. 4 Ocxtzun Jonás tuj tnam ex jun kꞌij o bet in tmaꞌn cyuwxix wen:

—Tuj 40 kꞌij jaꞌlo cbajel xitj tnam Nínive.

5 Ke xjal aj Nínive e ocslan tiꞌj Dios, etz jun tkanil cyuꞌn tuꞌn tcub cyyoꞌn weꞌyaj, ex cycyakil, tzaꞌnx ke tij xjal ax icx ke cꞌwaꞌl, oc cykꞌoꞌn cyxbalun chꞌiꞌx twitz te jun techal ka otok tzꞌajtz tiꞌj cyanmi. 6 Tejtzun tpon tkanil tucꞌil rey te tnam Nínive, ax icx te jaw weꞌ tuj tkꞌukbil jatum in cawin, el tiꞌn t-xbalun tbanil, oc tkꞌoꞌn t-xbalun chꞌiꞌx twitz, ex cub keꞌ tuj tzaꞌj. 7 Entons ate rey cyucꞌix ke xjal maꞌ cyoclen ateꞌ ttxlaj, ex cykꞌoꞌn tkanil tuj tcyakil tnam tiꞌj jun ley in tmaꞌn cyjaꞌ: Mi jun xjal cwaꞌl, mi ke alumaj, ka ẍneꞌl ex ka wacẍ. Miꞌn che waꞌn ex miꞌn che cꞌan aꞌ. 8 Nok oꞌcx cykꞌoꞌn oque cyxbalune chꞌiꞌx twitz cyiꞌje tucꞌix cyiꞌj alumaj, ex che cubsane twitz Dios tuꞌn tcyakil cyipune, ex teyle junjun tuꞌn tcyaj tcolin tmod mya baꞌn ex ju mya baꞌn in cybinchaꞌn cyiꞌj mastl ma bet-xi kꞌij ex cucx jaꞌlo; 9 kape jacu tzaj chewix tcꞌuꞌj Dios ex kape jacu tzaj kꞌakꞌan tcꞌuꞌj kiꞌj tuꞌn miꞌn kcyim, che chi.

10 Tej ttil Dios aju cybincha xjal tuj Nínive, tzaꞌn tten oc tilil cyuꞌn tuꞌn tcyaj cycolin cybinchben mya baꞌn, cub t-ximan Dios tuꞌn miꞌn tbinchante mya baꞌn cyiꞌj, ex mintiꞌ tzaj tkꞌoꞌn castiw cyibaj, aju otok tma nej.