Cbel cycastiw keju in che yajlan cyiꞌj xjal
2
Ay becꞌbil cywitz ke xjal oc in cheꞌx tal in che oc ten ximal tiꞌj alcye mya baꞌn tuꞌn tbant cyuꞌn, ex octzun tjawil kꞌij in binchettzun cyuꞌn porque at cyipun tuꞌn tbant. 2 In pon cycꞌuꞌj tiꞌj cytxꞌotxꞌ xjal ex nneꞌl cyiꞌn, in pon cycꞌuꞌj tiꞌj tja cyucꞌil ex nneꞌl cyelkꞌaꞌn, in che baj cyyajlaꞌn ke xjal cyucꞌix keju ateꞌ tuj cyja ex nneꞌl cyetzin cytxꞌotxꞌ.3 Tuꞌntzun tlaj jlu in tmaꞌn Kman cyjaꞌ: Ax icx weye at jun nximbetze cyiꞌje: Tzul nsamaꞌne jun yajbil cyibaje ex mi jun ctzokpetel tuj yajbil lu. Mlay jaw cyniman cyibe porque tzul jun mya baꞌn cyiꞌje. 4 Tuj tkꞌijlalil lu cxel cybitzan xjal jun bitz te cyeye bisbajilxix, ex cxel cymaꞌn cyeye cyjaꞌ:
Jumajx ma ko naj, aju ktanmi etzan tuꞌn Kman ma chꞌexpet tajwil ex mi jun jacu tzꞌoc mayonte cye tiꞌj, ke kcojbil ma baj paꞌn cyxol ke xjal ma cub kiꞌj cyuꞌn, che chilo.
5 Tuꞌntzun tlaj jlu mintiꞌ cyoclen cycꞌwaꞌle tiꞌj cyetzbil oc tcub sipet txꞌotxꞌ juntl maj cyxol ke xjal etzan tuꞌn Kman.
Mya baꞌn cybinchben keju nnoꞌc cykꞌon cyib te t-sanjel Dios
6 Miꞌn tzaj cymaꞌne keye alcye yol in tzaj kꞌmaꞌn cyeye tuꞌn Kman, che chi xjal, porque aju yajbil mlay tzul canun kucꞌile. 7 ¿Baka o tma Dios tuꞌn tcub cycastiw ke tiyjil Jacob? ¿Baka ma baj tpasens Dios? ¿Baka ic tten te Dios tbinchben?, che chiye. Cyjaꞌtzun in tmaꞌn Kman cyjaꞌ: ¿Myapetzun baꞌn in tbinchaꞌn nyole teju xjal in bet tuj tumel?
8 Ma jaw cyiꞌn cyibe tuꞌn cykꞌojine cyiꞌj ke xjal etzan wuꞌne, ex nneꞌl cyiꞌne aju xbalun wiꞌyilxix toc cyiꞌj ke xjal in che ul meltzꞌaj tuj kꞌoj oc matok in che ximan tiꞌj ka otok che clet. 9 In che etz cylajoꞌne ke xuꞌj tuj cyja, aju nim in che tzalaj tiꞌj, ex te jumajx ma tzꞌel cyiꞌne ncyꞌiwbile cyibaj cyal. 10 Che weꞌctze ex che bete, porque aju lugar lu mya te ojlabl ex ma baj tzꞌilix tuꞌn mya baꞌn, cyjaꞌtzun te jumajx ma baj naj.
11 Ka at jun ma cub t-ximan tuꞌn tnicꞌan yol ex ka ma tma: In chin kꞌmane tkanil jlu: Ctel nim vin ex nim kꞌeꞌn te cycꞌaye, ka chi, atzunju xjal tuꞌnx nnoꞌc tkꞌon tib te nsanjele ex mas in che tzalaj xjal tiꞌj, chi Kman.
Tzaj ttziyan Dios tuꞌn cyclet ke xjal etzan tuꞌn
12 Che oquel nchmoꞌne cycyakile akeye tiyjil Jacob, ex che tzajel wiꞌne ke cab oxtl aj Israel ma che cyaj ten. Che oquel nchmoꞌne ic tzaꞌn in che oc chmet ẍneꞌl tuj cypeꞌn, ex ic tzaꞌn txkan ẍneꞌl tuj cojbil, ex nim che kꞌajtel tuꞌnju nimxix cybet, chi Dios.
13 Ate Dios cbel nej cywitz te jakol cybe, atzun cye che oquel lpeꞌ tiꞌj ex che eletz ttzi tpwertil tnam. Ate Kman cꞌoquel te cyrey, ex cbel nej cywitz cycyakil.