Cyuwxix jun yol tzaj kꞌmaꞌn cye ke cawil mya baꞌn
3
Ax icx xi nmaꞌntle: Cybintze jaꞌlo akeye cawil ex nejenel cyxol aj Israel: ¿Myapetzun il tiꞌj tuꞌn tel cynicꞌe tiꞌj tuꞌn tbinchet aju tzꞌaklxix cyuꞌne ic tzaꞌnx in tmaꞌn ley? 2 Atzun cyeye nneꞌl cyicꞌune ju baꞌn ex in che tzalaje tiꞌj ju mya baꞌn; ic in che oc cykꞌoꞌne ke xjal etzan wuꞌne ic tzaꞌn ke ẍneꞌl biꞌx nneꞌl cytzꞌumal ex biꞌx nneꞌl baj cychibjal tiꞌj cybakil. 3 Ic in che tenba ke xjal cyuꞌne, akeju etzan wuꞌne, ic tzaꞌn in tenba jun ẍneꞌl tuꞌn jun txcup te tjakꞌ cꞌul, itzꞌx in xi tchyoꞌn, nneꞌl tiꞌn ttzꞌumal ex biꞌx in baj tpaꞌn tbakil; icxtzun cyeye nnoꞌc cykꞌoꞌne ke xjal etzan wuꞌne ic tzaꞌn chibj tuꞌn t-xiꞌ tuj cꞌil. 4 Tzul tkꞌijlalil tuꞌn cyoc tene txoquil tiꞌj Kman, pero mlay che tzaj tzakꞌweꞌne tuꞌn. Tuj tkꞌijlalil lu, cbel tewan tib cywitze tuꞌn tlaj mya baꞌn ma bant cyuꞌne.5 Ke xjal etzan wuꞌne in che el txalpuj tiꞌj ju be baꞌn, tuꞌn cylaj keju nnoꞌc cykꞌon cyib te nsanjele in che sbun cye, in cymaꞌn cye ke xjal in tzaj cykꞌoꞌn cywa: Miꞌn baj cycꞌuꞌje, che tele tuj txubtxaj, che chi; atzun cye keju mintiꞌ in che tzaj kꞌonte cywa in xi cymaꞌn cyjaꞌ: Tzul tkꞌoj Dios cyiꞌje, che chi. Cyjaꞌtzun chi Kman, in tmaꞌn cye keju nnoꞌc cykꞌon cyib te t-sanjel: 6 Mlayx tzaj yecꞌun jun yol cyeye ic tzaꞌn tuj witzicꞌ konicꞌan, ex mlay tzaj kꞌmaꞌntl jun tiꞌxti cyeye tuj klolj tiꞌj alcye tzul te tibajxi, porque chꞌix tbaj tuj cykꞌije ex tzul klolj cyibaje. 7 Te jumajx cbel cychꞌixwi ke xjal baꞌn che nabin ex keju baꞌn che kꞌijin. Cycyakil miꞌn che kꞌajt tuꞌnju mintiꞌ tzakꞌwebl tuꞌn Dios.
8 Atzun weye ma ncꞌame nim wipumale tuꞌn T-xew Kman, ex nneꞌl nnicꞌe tiꞌj alcye ju tzꞌaklxix in tmaꞌn Dios tuꞌn tbant cyuꞌn xjal, ex cyuw ncꞌuꞌje tuꞌn toc nmaꞌne tibaj cywitz aj Israel ka miban che bin ex tuꞌn toc nmaꞌne aju cyil. 9 Cybintze jlu jaꞌlo akeye cawil ex nejenel cyxol aj Israel, akeye miꞌn cyaje tuꞌn cybinchante ju tzꞌaklxix ex in baj cyẍocsaꞌne tcyakil aju tuj tumel taꞌ, 10 in baj cyyajlaꞌne ke xjal ex nneꞌl cyiꞌne chojenj cye nokx gan, tuꞌn tjaw cybinchaꞌne tnam Jerusalén aju tcub twi witz Sión. 11 Ke jwes tuj tnam in xi cybinchaꞌn cyiꞌj xjal nok tuꞌn pwak, ke pal in cykꞌoꞌn xnakꞌtzbil tiꞌj ley ax nok tuꞌn pwak, ex keju nnoꞌc cykꞌon cyib te nsanjele in che kꞌijin nok tuꞌn pwak; tuj cywitz ke jlu ka a Kman onil cye, ex in cymaꞌn: A Kman at kucꞌil, misicyer jun mya baꞌn jacu tzaj kiꞌj, che chi.
12 Tuꞌntzun jlu, nok tuꞌn cylaje cbel xitj tnam Jerusalén aju tcubsaꞌn twi witz Sión; nok ttxꞌakan cyjel buyeꞌ ex cbajel chꞌoquet ic tzaꞌn jun cojbil. Aju witz jatum tcubsaꞌn tja Dios, ctzajel chꞌiy cꞌul tuj.