A Kman cꞌoquel te cawil tuꞌn cyten xjal tuj txubtxaj
4
Tuj bajsbil tkꞌijlalil cyjel kꞌukbaꞌn ju witz jatum tcubsaꞌn tja Kman, atzunju witz lu mas maꞌ twaꞌl; mas maꞌ twaꞌl cywitz ke mastl witz, ex cycyakil ke tnam che ul twiꞌ.2 Nimcu cyajlal nasyon che ul ex oc cymaꞌ: Cytzaje, ko jax twiꞌ ju witz etzan tuꞌn Kman, tuj tja Tdios Jacob, tuꞌntzun ttzaj tyecꞌun ke aju tbe ex tuꞌn kbet tuj, che chilo. Porque atzun ctzajel tkꞌoꞌn Kman xnakꞌtzbil tuj tnam Sión, ex tuj Jerusalén ctzajel tmaꞌn tyol.
3 Che oquel ke nasyon tuj xjel tuꞌn Kman, ex cxel tbinchaꞌn cyiꞌj nimcu nasyon nimxix cyipun, keju nikayin ateꞌ ex keju najchak ateꞌ, akeju in che kꞌojin cyxolx. Cbajel cybinchaꞌn ke cyspad tuꞌn cyoc te cypunt ex ke cylans tuꞌn cyoc te jobl triw. Mi jun tnam tuꞌn ttzaj tiꞌn juntl maj ke t-spad tuꞌn tkꞌojin tiꞌj juntl, ex mlay cycꞌam mastl xnakꞌtzbil tuꞌn cykꞌojin.
4 Cycyakil xjal che ankꞌil mintiꞌtl cyxobil, ex teylex te junjun cꞌojlal tjakꞌ t-xlecumal tkan t-uva ex tkan t-higo. Acu Kman aju Tajaw Tcyakil in kꞌmante jlu.
5 Masque in che niman ke mastl tnam cye ke cydios, atzun ke, te jumajx ko nimal te Kman aju Kdios.
Ke xjal etzan tuꞌn Kman che cletel tuꞌn
6 A Kman in kꞌmante jlu: Tuj tkꞌijlalil tzul che oquel nchmoꞌne ke xjal etzan wuꞌne, akeju tcub cycastiw wuꞌne nej, tuj bis ateꞌ ex otok che baj sputj. 7 Cyiꞌj ke jlu, ex cyiꞌj keju otok che cyaj ankꞌin, wuꞌne cbantel jun nasyon at tipun. Akine chin cawil cyibaj ke xjal etzan wuꞌne max twi witz Sión, te jaꞌlo ex te jumajx.
8 Atzun teya tnam Jerusalén, ic ttena ic tzaꞌn jun ja maꞌ twaꞌl te cycolbil cyib aj Sión, cꞌoquela te jun nintz tnam tuꞌn tten juntl maj rey tuja, ex cꞌoquela maꞌ toclena ic tzaꞌnx nej, chi Kman. 9 Atzun jaꞌlo, ¿Tikuꞌn in che schꞌine ic tzaꞌn jun xuꞌj cyjaꞌ tul itzꞌj tal? ¿Mintiꞌpetzun rey at cyxole? ¿Mapetzun che cyim ke kꞌol cynable? 10 Akeye aj Sión, cyẍoquin baj cyiꞌje ex cyjaw schꞌine tuꞌn taꞌw cꞌixcꞌoj ic tzaꞌn jun xuꞌj in jaw schꞌin tuꞌn taꞌw oc nnuꞌl itzꞌj tal, porque che elexe tuj cytanmiye ex cucx che tele tuj cojbil, ex max che pole tuj Babilonia. Atzun che cletele tuꞌn Kman ex che colpetele tuꞌn tuj cykꞌab aj kꞌoj cyiꞌje. 11 Atzun jaꞌlo, nimcu nasyon ma baj cychmon cyib tuꞌn cykꞌojin cyiꞌje ex in cymaꞌn: Ocxix ko tzalajel oc kqueꞌyinte oc tcub xitj tnam Jerusalén, che chi. 12 Pero akeju nasyon lu mintiꞌ baꞌn cyuꞌn alcyeju t-ximbetz Dios ex alcye ximamaj tuꞌn tbant tuꞌn; mintiꞌ baꞌn cyuꞌn ma che oc chmoꞌn tuꞌn Kman ic tzaꞌn in baj chmet triw tuj peꞌn tuꞌn tel ttxcꞌomil.
13 Chi Kman in tmaꞌn: Akeye aj Sión chux keye ex cywaban baje ke nasyon, ic tzaꞌn jun tor in baj twaban triw tuꞌn tel ttxcꞌomil, porque cxel nkꞌoꞌne cyipune ic tzaꞌn tipun jun tor mer cꞌuxbil tcach, ex mer kꞌan cꞌuxbil t-xpacꞌil tkan, ex cbajel cypaẍuꞌne nimcu tnam. Cꞌelel cyiꞌne cykꞌinumabl, aju el cyiꞌn cye mastl xjal, ex cꞌelel cypaꞌne tuꞌn tajben te weye, porque akine Tajaw Tcyakil twitz txꞌotxꞌ, chi Dios.