Tzul tkꞌoꞌn Dios jun cawil tuꞌn tten cyxol aj Israel
5
Atzun jaꞌlo, akeye aj Jerusalén cybincham cytene tuꞌn cyclonte cyibe, porque ma baj cytxolban cyib aj kꞌoj kiꞌj, ex tuꞌn tzeꞌ cꞌoquel cyjatoꞌn tkꞌoꞌtx aju nejenel cye aj Israel.2 Chi Kman in tmaꞌn cyjaꞌ: Atzun teya tnam Belén Efrata, masque tal chꞌina cyxol mastl tnam tuj Judá, pero tuja tzul itzꞌj wuꞌne jun cawil cyibaj aj Israel, aju atxix ojtxi ttzajlen xeꞌt t-xeꞌchel, chi Kman.
3 Pero che cyjel tcolin Kman ke xjal etzan tuꞌn, ocxi tul itzꞌj tal ju xuꞌj in ayon tiꞌj tuꞌn tul itzꞌj. Atzun ke terman otok che pon kꞌiꞌn tuj juntl tnam najchak cꞌoquel cychmon cyib juntl maj cyucꞌil aj Israel. 4 Octzun tul, cpastoril cyiꞌj ke xjal etzan tuꞌn, nok tuꞌn tipumal ex tajwalil Kman aju Tdios, ex ke xjal che ankꞌil tuj txubtxaj, porque cjawil nimsaꞌn Kman tuj tcyakil twitz txꞌotxꞌ. 5 Ex tuꞌn che cyjel ten xjal tuj txubtxaj.
Oc tcub tiꞌj ktanmi cyuꞌn aj Asiria ex oc cyocx cyuj ke nmak ja te kcolbil kib, che xel ksamaꞌn wuk nejenel ex wajxak xjal maꞌ cyoclen tuꞌn cyxiꞌ kꞌojlel cyiꞌj. 6 Atzun ke jlu che cawil tuj tnam Asiria, aju ttanmi Nimrod, cbel cyiꞌj aj Asiria cyuꞌn tuꞌn spad, ex ko cletel cyuꞌn tuj cykꞌab aj Asiria, akeju otok che octz tuj tmojonil ktxꞌotxꞌ tuꞌn cykꞌojin kiꞌj.
7 Ke tiyjil Jacob che cyjel ankꞌin cyxol nimcu nasyon, che oquel te jun cyꞌiwbil ic tzaꞌn tkꞌab cheꞌw in tzaj t-samaꞌn Kman, ex ic tzaꞌn jbal in cub tibaj cꞌul, mya tuꞌn jun xjal in tzaj t-samaꞌn. 8 Ex ke tiyjil Jacob che cyjel ankꞌin cyxol nimcu nasyon, che oquel ic tzaꞌn jun balun cyxol ke txcup te tjakꞌ cꞌul, ex ic tzaꞌn jun balun cyxol txkan ẍneꞌl oc toc noj cyiꞌj, in xi tꞌicpaj cyiꞌj ex biꞌx in che baj ttzakun ex mi jun in tzokpaj. 9 Cyjaꞌxtzun che oquel tzokpaj aj Israel cyiꞌj cycyakil aj kꞌoj cyiꞌj ex che najel cyuꞌn.
10 Chi Kman in tmaꞌn cyjaꞌ: Tuj tkꞌijlalil tzul, che najel ke cycheje wuꞌne ex biꞌx che bajel xitj cycarwaje in che ajben tuj kꞌoj; 11 che bajel nxitune ke cytanmiye ex ke nmak ja in che ajben te cycolbil cyibe; 12 wuꞌne che bajel naj ke aj cyꞌaꞌ ateꞌ cyxole ex mlay che tentl aj kꞌij cyxole; 13 cbajel nbuchine ke tilbilal in che cꞌulune cywitz, cyucꞌix ke abj in che oc cydiosine, ex miꞌntltzun che cꞌulune cywitz ke dios cyuꞌnxe e bant. 14 Che jawitz nbakoꞌne ke tilbilal Asera aju nnoꞌc cydiosine, ex jumajx che bajel naj ke cytanmiye wuꞌne. 15 Tucꞌil nim ntxꞌuꞌjile cꞌoquel t-xel wuꞌne cyiꞌj ke nasyon mintiꞌ xi cyniman nyole, chi Kman.