Aju tkꞌoj Dios cyiꞌj aj Israel
6
Cybintze jaꞌlo aju in tmaꞌn Kman, chi cyjaꞌ: Che weꞌctze ex cychicꞌbantze aju cycolbil cyibe cywitz ke nmak witz, ex e tjaw tkꞌajkꞌajel cywiꞌye tuꞌntzun cybinte ke tal witz. 2 Cybintze, akeye nmak witz ex tkꞌukbil txꞌotxꞌ cyuwxix tten: Ke xjal etzan tuꞌn Kman che oquel tuj xjel tuꞌn tiꞌj cybinchben ex cꞌoquel ten xtisil cyiꞌj aj Israel.3 Chi Kman in tmaꞌn cyjaꞌ: Akeye xjal etzan wuꞌne, ¿Alcye mya baꞌn ma nbinchaye cyiꞌje ex ka alcye mya baꞌn ma tzꞌeꞌle tuj cywitze? Chin cytzakꞌwentze. 4 Akine etz kꞌinte cyeye tuj Ejipt tuꞌn miꞌn cytentle te cymajen, ex xi nsamaꞌne Moisés, Aarón ex Mariy te ẍaklul cyeye. 5 Akeye xjal etzan wuꞌne, cynaꞌntze jaꞌlo aju cub t-ximan Balac tuꞌn tbant cyiꞌje, aju cyrey aj Moab, ex cynaꞌntze alcyeju tzakꞌwebl tzaj kꞌoꞌn te tuꞌn Balaam aju tcyꞌajal Beor. Cynaꞌntze tej tcub be cyuꞌne tuj lugar Sitim tuꞌn cypone tuj Gilgal, tuꞌntzun tel cynicꞌe tiꞌj ju xtalbil o nbinchaye cyeye, chi Kman.
Aju taj Kman tuꞌn tbant cyuꞌn xjal
6 ¿Alcye tumel tuꞌn ncub tene cꞌulul twitz Kman aju Dios maꞌxix toclen? ¿Baꞌnpe tuꞌn ncub tene cꞌulul twitz tucꞌil jun tal wacẍ te jun abkꞌi, tuꞌn tcub nbyoꞌne ex tuꞌn tcub npatune te jun oyaj te Kman? 7 ¿Jacupe tzalaj Kman tiꞌj ka ma txi nkꞌoꞌne jun mil ẍneꞌl te jun oyaj te ex ka ma cub nkꞌoꞌne nimxix chibj aseyt twitz? ¿Cxelpe nkꞌoꞌne nej ncꞌwaꞌle te chojbil teju mya baꞌn in bant wuꞌne ex ju wile? Miꞌn. 8 Aya xjal, o tma Kman teya alcyeju baꞌn ex alcye taj tuꞌn tbinchanteya: Taj Kman tuꞌn tbinchanteya aju tzꞌaklxix ex tuꞌn tten tcꞌujlalila tiꞌj juntl ex tuꞌn tcub tmansin tiba twitz ju Tdiosa.
9 Ate Kman in txocon cyiꞌj ke xjal ateꞌ tuj tnam, ex aju xjal in xob twitz, at tnabl. Cykꞌontz cywiꞌye tiꞌj castiw ex tiꞌj ju in cub kꞌonte castiw. 10 Tuj tja xjal binchal mya baꞌn at kꞌinumabl mya tuj tumel in cambet, ex at malbil mya tzꞌakl; ake jlu icꞌun wuꞌne. 11 ¿Tzaꞌn tten tuꞌn tcub nnajsaꞌne til ju xjal in che ajben ke balans ex ke marc mya tzꞌakl tuꞌn? 12 Ke kꞌinun ateꞌ tuj tnam lu, cycyakil in che yajlan cyiꞌj ke meba, ex cycyakil ke xjal najlke tuj, puro nicꞌal yol ke ex sbul ke. 13 Cyjaꞌtzun cbel nkꞌoꞌne cycastiwoye; che najele wuꞌne tuꞌn tlaj cyile. 14 Che waꞌle, pero mlay noj cycꞌuꞌje, nok oꞌcx cucx che apale weꞌyaj; cjawil cychmoꞌne cywaye, pero mlay cyaj clet chꞌin cyuꞌne, ex katzun at chꞌin ma cyaj clet cyuꞌne, cxel nkꞌoꞌne cye keju che ul kꞌojlel cyiꞌje. 15 Che awale, pero mlay jaw cychmoꞌne twitz cyawale; cꞌelex cycheꞌne twitz olivo, pero mlay che nicꞌbene tiꞌj ju aseyt cꞌelel tiꞌj; cꞌelel cyyatzꞌoꞌne taꞌl twitz uva, pero mlay che cꞌane tiꞌj taꞌl. 16 Porque ma cheꞌx lpeꞌye cyiꞌj tmandamyent rey Omri ex tiꞌj tcyakilju o cybincha keju ateꞌ tuj tja rey Acab, ex ma cybinchaye aju cye o bant cyuꞌn. Cyjaꞌtzun cxel nkꞌoꞌne ambil tuꞌn cynaje ex tuꞌn cyoc xmayin keju najl tuj tnam ex che elel icꞌune cyuꞌn mastl tnam.