Aju mya baꞌn cybincha aj Israel
7
Becꞌbil nwitze, ic kine ic tzaꞌn jun xjal in xiꞌ sucwil tjawlenxi baj twitz awal; mintiꞌtl in cnet twitz uva tuꞌn ex mi twitz higo aju tajtok tuꞌn tloꞌn tiꞌj. 2 Twitz txꞌotxꞌ mintiꞌtl jun xjal baꞌn niman Dios ex mintiꞌ jun xjal tzꞌaklxix; cycyakil in che ayon tiꞌj tuꞌn cyoc ten byol cye xjal; cywitzx cyib in baj cycꞌobin cyib. 3 At cynabl tuꞌn tbant mya baꞌn cyuꞌn; ke nejenel nneꞌl cykanin pwak cyiꞌj xjal, ke jwes in xi cycꞌmoꞌn cyoyaj xjal nok tuꞌn miꞌn tcub cysentens ke xjal at cyil, ke xjal maꞌ cyoclen in cymaꞌn nok alcye cyajbil tuꞌn tbant ex in mojeꞌ cyyol cyxolx tiꞌj alcye tuꞌn tbant cyuꞌn. 4 Aju xjal mas baꞌn nneꞌla tuj cywitz cyxolx, ic tten ic tzaꞌn jun chꞌiꞌx mintiꞌ tajben, ex aju xjal tzꞌaklxix nneꞌla tuj cywitz cyxolx, ic tten ic tzaꞌn jun chꞌiꞌx cꞌul.Pero tzul tkꞌijlalil tuꞌn tcub cycastiw, ic tzaꞌn tzaj cymaꞌn ke xkꞌukil akeju t-sanjel Dios; cjawiltzun naj cynabl. 5 Miꞌn txi tnimana tyol tvesina; miꞌn tzꞌoc keꞌ tcꞌuꞌja tiꞌj jun tamiwoya; ax icx ten tcwenta tiꞌj alcye yol cxel tmaꞌna te t-xuꞌjila aju cꞌujlaꞌn tuꞌna. 6 Porque in che el icꞌun ke mambaj cyuꞌnx cycyꞌajal ex in che oc ten ke txin kꞌojlel tiꞌjx cytxuꞌ, ke txin alibaj in che oc ten kꞌojlel tiꞌj xuꞌj cylib, ex ke aj kꞌoj tiꞌj jun xjal, ax keju ateꞌ tuj tja.
7 Atzun weye, chin ayole tiꞌj Kman; cꞌoquel keꞌ ncꞌuꞌje tiꞌj Dios aju Clol weye, porque chin tzajel biꞌne tuꞌn.
Che cletel aj Israel tuꞌn Dios
8 Akeye aj kꞌoj kiꞌje, miꞌn che tzalaje tuꞌnju mya baꞌn ma tzaj kiꞌje; masque ma ko cub tzꞌake, pero ko jawil weꞌye; masque txolin kiꞌje tuꞌn klolj, pero ate Kman spicꞌun keye. 9 Ma ko binchane il twitz Kman, tuꞌntzun jlu cꞌicꞌex tkꞌoj kuꞌne acux nnuꞌl colol kiꞌje ex acux in bant kiꞌje tuꞌn. Ko xel kꞌiꞌne tuꞌn Kman tuj spicꞌun ex oc kilaꞌye oc tcub cyiꞌj aj kꞌoj kiꞌje tuꞌn. 10 Ax icx cꞌoquel cyqueꞌyin ke aj kꞌoj kiꞌje, ex tuꞌntzun jlu ctzajel cychꞌixwi keju o che kꞌmante keye cyjaꞌ: ¿Jatumtzun taꞌ Cydiose? Che chi. Atzun jaꞌlo cꞌoquel kqueꞌyine oc cybaj waban ic tzaꞌn xokꞌl tcub cyuj cay.
11 Akeye aj Jerusalén, lu tzul kꞌij tuꞌn cyjaw binchet juntl maj ke muro ateꞌc tiꞌjele cytanmiye ex cꞌelel lakꞌeꞌ tmojonil cytanmiye. 12 Tuj tkꞌijlalil lu, tuj tcyakil part che ul ke xjal tucꞌila; che tzajelx tuj Asiria ex cpol baj max tuj Ejipt, che tzajelx tuj Ejipt ex cpol baj max ttzi nima Éufrates; che tzajelx cytziꞌyile mar ex cywiꞌyile witz. 13 Cꞌoquel twitz txꞌotxꞌ te tzkij txꞌotxꞌ tuꞌn cylaj keju najlke twitz, tuꞌn tlaj mya baꞌn otok cybincha.
14 Nman, che tcwentin oca ke xjal etzan tuꞌna, ic tzaꞌn nnoꞌc tcwentin pastor ke t-ẍneꞌl akeju najl tjakꞌ cꞌul oꞌcx cye, txolin cyiꞌj tuꞌn txꞌotxꞌ tbanilxix. Kꞌinxa ke tuj txꞌotxꞌ Basán ex Galaad jatum at cywabl, ic tzaꞌn tuj tkꞌijlalil ojtxi.
15 Binchama ke binchben nim cyipumal, tuꞌntzun toc cyqueꞌyin ic tzaꞌn tej cyetz tiꞌna tuj Ejipt. 16 Ax icx cꞌoquel cyqueꞌyin ke txkantl nasyon, ex ctzajel cychꞌixwi tiꞌj cye cyipumal. Che oquel ic tzaꞌn jun xjal men ex chquin twiꞌ. 17 Che bel mutzeꞌ tuj kuk ic tzaꞌn lobaj ex ic tzaꞌn ke mastl jil in xi cyjakuꞌn cycꞌuꞌj twitz txꞌotxꞌ, in che luꞌlun oc cyetz cyuj ja maꞌ cywaꞌl te cycolbil cyib ex tucꞌil nimxix cyxobil che ul tucꞌil Kman Dios.
In cub tnajsaꞌn Dios cyil ke xjal etzan tuꞌn
18 Mintiꞌ juntl Dios at ic tzaꞌn teya porque in cub tnajsaꞌna aju mya baꞌn in cybinchaꞌn ke xjal etzan tuꞌna, akeju o che cyaj ankꞌin, ex nnicꞌ tnaꞌl cyil tuꞌna, in tzaj tyecꞌuna tcꞌujlalila keye, ex mya cucx in ten tkꞌoja te jumajx. 19 Ctzajel kꞌakꞌan juntl maj tcꞌuꞌja kiꞌje ex cbelex tmakuꞌna kbinchbene mya baꞌn. Cbelex t-xoꞌna tcyakil kile max t-xeꞌpun mar. 20 Cjapunel tuꞌna aju tyola ex tcꞌujlalila, aju tzaj ttziyana atxix ojtxi cye ke kxeꞌchele Abraham ex Jacob.