2 Nman, ¿Jteꞌ maj chin kanile onbil teya ex mintiꞌ in chin tzaj tbiꞌna? ¿Jteꞌ maj chin cubsale twitza tuꞌn tlaj cytxꞌuꞌjil xjal ex mintiꞌ in tzaja colpil keye? 3 ¿Tikuꞌn taja tuꞌn ticꞌ nwitze tiꞌj yajbil ex mya baꞌn in cybinchaꞌn xjal? Nwitze in tzaj nim cytxꞌuꞌjil xjal ex nim xitbil cyxol; tuj tcyakil part in baj cyicꞌlen cyib xjal ex in che kꞌojin. 4 Ya mintiꞌtl in ajben ley cye ex mintiꞌ in xi binchaꞌn cyiꞌj xjal tuj tumel; aju xjal mya baꞌn nnoꞌc ten yajlal tiꞌj ju xjal baꞌn, ex tuꞌntzun jlu in baj cytzacun ju ley.

5 Chitzun Kman cyjaꞌ: Cyqueꞌyinxe ke nasyon ateꞌ cytxlaje; cyqueꞌyinxe ke ex tzajx nim tchiylal cyiꞌje. Chꞌix woc tene binchal jun tiꞌxti aju mlay txi cyocslaꞌne ka at jun ma tzaj kꞌmante cyeye. 6 Che tzajel wiꞌne ke aj Babilonia kꞌojlel cyiꞌje, akeju jawni cywitz ex nok banin cyten tuꞌn cyxiꞌ kꞌojlel tuj tcyakil twitz txꞌotxꞌ tuꞌntzun cyoc te tajwil ke txꞌotxꞌ mya cye. 7 Jawni che xobtzan ex xobajilxix ke, mintiꞌ tchiylal mastl ley tuj cywitz, oꞌcx aju cye cyley, ex cyuꞌnx nnoꞌc cykꞌoꞌn cyoclen. 8 Mas cyuw che ojkelan ke cychej cywitz ke tigre ex mas jurat in tzyet cycanb cywitz ke xoꞌj in che bet konicꞌan. Nim cybet ke cychej tjax xjal cyibaj, najchak in che tzaj ojkelan tuꞌn cyoc tzokpaj kꞌojlel ic tzaꞌn jun tꞌiw in tzaj lipan cyuw wen tzyul tcanb. 9 Tcyakil in baj naj cyuꞌn tuj cybe ex in che jaw xob xjal cyuꞌn. Ke xjal in cheꞌx cytzyuꞌn tuꞌn t-xi cyiꞌn pres mas nim cybaj twitz ttxaꞌ tzꞌaꞌn ttzi mar. 10 In che oc ten xmayil cyiꞌj ke rey ex cyiꞌj ke xjal maꞌ cyoclen. In che oc ten tzeꞌl cyiꞌj ke nmak ja tjawsaꞌn te cycolbil cyib xjal, porque jurat naj in jaw cybuyin txꞌotxꞌ te cyxweꞌtzbil tuꞌn cyocx tujxi ex tuꞌn cyoc tzokpaj cyiꞌj. 11 Jurat naj in che icꞌ ic tzaꞌn jun nintz cykꞌikꞌ; mintiꞌ cyaj tiꞌj juntl dios, nok oꞌcx aju cyex cyipumal nnoꞌc cykꞌoꞌn te cydios, chi Kman.

12 Nman, ¿Myapetzun cucx ttena te jumajx? Aya Ndiose ex xjana. Mlay ko cyime Nman, aya colol weye, ma txi tkꞌoꞌna cyipumal ke aj Caldey tuꞌn tcub cykꞌoꞌn kcastiwoye. 13 Xjanxix teya ex mintiꞌ in tzalaja tiꞌj ju mya baꞌn, ex mintiꞌ in tzalaja tiꞌj oc in che yajlan xjal cyiꞌj cyucꞌil. ¿Tzaꞌntzun tten mintiꞌ in kꞌajta cyiꞌj ke xjal in cybinchaꞌn tcyakil txcaj mya baꞌn, ex tikuꞌntzun in xi tkꞌoꞌna ambil cye ke binchal mya baꞌn tuꞌn cynaj xjal cyuꞌn, akeju mas baꞌn ke cywitz? 14 ¿Tikuꞌn in che oc tkꞌoꞌna ke xjal ic tzaꞌn ke cyiẍ ex ic tzaꞌn ke jil tuj mar, mi aꞌl jun nejenel cye? 15 In cub cyiꞌj mastl nasyon cyuꞌn aj Babilonia ic tzaꞌn ke tzyul cyiẍ in che tzyet cyiẍ cyuꞌn; in che tzyet cyuꞌn tuꞌn xucbil cyiẍ ex tuꞌn xyub, ex octzun cychmet cyuꞌn, nim in che jaw tzalaj tiꞌj. 16 Tuꞌntzun jlu ke xjal tzyul cyiẍ in cub cykꞌoꞌn chojbil twitz cyxuyb ex in cub cypatun storac te nimbil te, tuꞌnju nok tuꞌn in tzaj kꞌoꞌn cychiꞌ tbanil ex nimxix. 17 ¿Cucxpetzun cxeꞌl tuꞌn cycamban ke aj Babilonia kiꞌje ic tzaꞌn in che tzyet ke cyiẍ tuj xyub? ¿Cucxpetzun che bel byoꞌn ke xjal cyuꞌn ex mintiꞌ tuꞌn ttzaj tzꞌeꞌy cycꞌuꞌj cyiꞌj?