2 Tzajtzun ttzakꞌweꞌn Kman weye cyjaꞌ: Tzꞌiban cuba twitz tzꞌlom aju yol cxel nmaꞌne teya, tuꞌntzun jurat tjaw schꞌit. 3 Masque atx taj tuꞌn tjapun ju witzicꞌ pero il tiꞌj tuꞌn tjapun. Masque yaj cjapunel pero ayona tiꞌj, porque cpol tkꞌijlalil tuꞌn tjapun ex mlay tzicꞌx tiꞌj. 4 Tzꞌiban cuba cyjaꞌ: Akeju binchal mya baꞌn in jaw cyniman cyib, atzunju xjal tzꞌaklxix, tuꞌn tocslabl cꞌankꞌil.

5 In cub sbuꞌn xjal tuꞌn vin in xiꞌ tuꞌn, in jaw tniman tib ex mintiꞌ in cub txuleꞌ, in pon tcꞌuꞌj tiꞌj nimcu ic tzaꞌn cynajbil cyimni mintiꞌ in noj, mintiꞌ in noj ic tzaꞌn camic mintiꞌ in baj tgan tuꞌn cycyim xjal tuꞌn, in che baj tchmoꞌn ke tnam tuꞌn cyten tjakꞌ tcawbil. 6 Pero cycyakil ke nasyon otok cub cyiꞌj tuꞌn, che oquel ten xmayil tiꞌj, ex cxel cymaꞌn tuj cybitz cyjaꞌ: Ay becꞌbil twitza, ma tzꞌoca te kꞌinun tuꞌn tcyakil kꞌinumabl mya teya. ¿Jtoj txi tcolina tuꞌn tel tiꞌna cykꞌinumabl xjal aju el tiꞌna cye mer ic tzaꞌn tchꞌexa?

7 Aju kꞌij mintiꞌ ximan tuꞌna, atzun che pol ke xjal kanil tchꞌexbena, che pol ke cꞌixbisal teya ex cꞌelel cyiꞌn tcyakilju at teya. 8 Cꞌoquel cychmon cyib ke nasyon tuꞌn cykꞌojin tiꞌja, ex cꞌelel baj tcyakilju at teya cyuꞌn, ic tzaꞌn el tiꞌna tcyakilju at cye. Cbajel yajlaꞌna cyuꞌn tuꞌn cylaj ke xjal e cub tbyoꞌna, ex tuꞌnju tbinchaya mya baꞌn tucꞌil nim ttxꞌuꞌjila tiꞌj cytanmi ex cyiꞌj ke tnam ex cyiꞌj keju najl ke cyuj.

9 Ay becꞌbil twitza tuꞌnju ma noj tjaya tuꞌn tcyakilju el telkꞌaꞌna, ma baj tcyuwsaꞌna tjaya tuꞌntzun tcleta te tcyakilju xobajil. 10 Tuꞌn jlu axa ma cub kꞌonte cychꞌixwi keju ateꞌ tuj tjaya ex tuꞌnx tiba cnajela, porque o che baj naj nimcu nasyon tuꞌna. 11 Jaꞌlo, ax ke abj tocsaꞌn te tkꞌukbil tjaya che jawil schꞌin, ax icx ke vig.

12 Ay becꞌbil twitza, in jaw tbinchaꞌna ttanmiya tuꞌn tcyakilju el tiꞌna cye xjal e cub tbyoꞌna, ex tuꞌnju nim mya baꞌn tbinchaya cyiꞌj. 13 Tuꞌn Kman aju Tajaw Tcyakil cnajel tuꞌn kꞌakꞌ tcyakil cyakꞌunben xjal; nokx gan otok che akꞌnan ex otok che sict ke nasyon. 14 Cycyakil xjal twitz txꞌotxꞌ cꞌelel cynicꞌ tiꞌj tajwalil Kman, ic tzaꞌn te mar nojni tuj tuꞌn aꞌ.

15 Ay becꞌbil twitza tuꞌnju in chyoꞌn cywiꞌ ke tvesina tuꞌna, in xi tkꞌoꞌna kꞌeꞌn smoꞌn twitz cye, tuꞌntzun tel cychꞌixwi oc cycyaj sbajeꞌ. 16 Aya cbel nim tchꞌixwiya te t-xelju tuꞌn tjaw nimsaꞌna, porque cxel kꞌoꞌn jun wik tcꞌaya tuꞌn Kman, ex tuꞌn jlu cyjel sbajeꞌya ex cbel tchꞌixwiya tuꞌnju otok tzꞌel tajwalila. 17 Jaw ttxꞌemina ke tzeꞌ twi witz Líbano, ax icx teya cjawil txꞌemina, ctzajel nim t-xobil tiꞌja tuꞌnju cycublen tbyoꞌna ke txcup twiꞌ ju witz lu. Tzul jlu tiꞌja tuꞌn tlaj e cub tbyoꞌna ke xjal ex baj t-xituna cytanmi ex tbinchaya nim mya baꞌn cyiꞌj ke xjal najl tuj.

18 ¿Ti tajben jun tilbilal in baj tbinchaꞌn jun xjal? ¿Ti tajben jun tilbilal ka oꞌcx in ajben te sbubl? Ke tilbilal mlayx bant cyyolin, ¿Tzaꞌntzun tten tuꞌn toc keꞌ tcꞌuꞌj xjal cyiꞌj, aju binchal cye? 19 Ay becꞌbil twitza, nnoꞌc tmaꞌna te jun tilbilal binchamaj tiꞌj tzeꞌ: Tzulx tnabla chiya, ex weꞌctza, chiya te jun abj miban yolin. ¿Jacupe tzaj cymaꞌn jun yol? Mlay, porque mintiꞌ cyxew, masque nojni cyiꞌj tuꞌn kꞌan pwak ex sak pwak. 20 Atzunte Kman at tuj tja xjan: Miꞌn che kꞌajte twitz akeye cycyakil xjal twitz txꞌotxꞌ.