3
Ay becꞌbil twitza tnam Nínive, porque nim xjal o che cub tbyoꞌna, nojni tuja tuꞌn nicꞌaj yol ex cyuꞌn byol xjal; nimxix wen o tzꞌelkꞌana. 2 Binxa tkꞌajkꞌajel asyal ex cykꞌajkꞌajel ke rwed, tucꞌix tkꞌajkꞌajel cykan chej in che lipan, jawoꞌn ke carwaj cyuꞌn. 3 Ke xjal cyjax cyibaj ke chej in che oc tzokpaj tiꞌj tnam. In che txilcꞌaj ke spad ex ke lans. Nimcu xjal ikan ẍil cyuꞌn, ex buyl cub cyximlal cyimni. Aju cyximlal ke cyimni mlay bant cyajlanjtz; in che jaw tolj ke xjal cyiꞌj. 4 Tcyakil jlu ma tzaj tiꞌj tnam Nínive tuꞌn tlaj ic oc ic tzaꞌn jun xuꞌj jawni twitz cyucꞌil xinak, tbanilxix queꞌyin ex mejor xmoxin, xnakꞌtzamaj tuꞌn tcyꞌaꞌn; tuꞌnju tyaẍben ex tuꞌnju baꞌn cyꞌaꞌn ma che cub t-sbuꞌn ke tnam ex ke nasyon.5 Ate Kman aju Tajaw Tcyakil chi in tmaꞌn cyjaꞌ: Lu kine in chin kꞌojin tiꞌja: Cbel nim tchꞌixwiya wuꞌne cywitz ke nasyon ex ke cawbil, ic tzaꞌn in tzaj tchꞌixwi jun xuꞌj ka ma tzꞌel kꞌiꞌn t-xbalun cywitz xjal. 6 Cxel nxoꞌne ttzꞌilil tiꞌja; cbel nkꞌoꞌne tchꞌixwiya, ex che labil xjal tiꞌja. 7 Cycyakil keju che oquel queꞌyinte teya che elel ok tiꞌja ex oc cymaꞌ cyjaꞌ: Ma cub xitj tnam Nínive. ¿Alcye ctzajel tzꞌeꞌy tcꞌuꞌj tiꞌj? ¿Jatum ctzajel jun kꞌukbalte tcꞌuꞌj? Che chilo. 8 ¿Maspetzun mejor teya twitz tnam Tebas aju tcubtok ttzi nima Nilo, aju camunintok tiꞌjele tuꞌn nimcu aꞌ toctok ju nima te tcolbil tib, mer ic tzaꞌn tapayiꞌn tiꞌj tuꞌn nima? 9 Ke aj Etiopía cyucꞌix ke aj Ejipt, atzun ke e kꞌonte tipumal nimxix; ke aj Fut ex ke aj Libia, atzun ke onil te. 10 Masque icju, pero e jeꞌx kꞌiꞌn pres ke xjal najl ke tuj tnam Tebas, e cub pachꞌuꞌn ke tal cꞌwaꞌl cyuj cyscyin cay; jaw swert cyiꞌj ke xjal maꞌ cyoclen ex e baj cꞌaloꞌn ke nejenel cye tuꞌn caden. 11 Ax icx teya cxel kꞌoꞌn kꞌeꞌn teya tuꞌn tchyoꞌn twiꞌya ex cxel tewan tiba; ax icx cjyola tiꞌj jun lugar te colbil tiba tuꞌn cylaj ke aj kꞌoj tiꞌja. 12 Cycyakil ke lugar te colbil tiba ic cyten ic tzaꞌn ke tkan higo nojni cyiꞌj tuꞌn twitz, jurat nnuꞌl tkꞌij; ka ma cheꞌx yucun in tzaj tzak twitz tuj ttzi ju cxel loꞌnte cye. 13 Ke t-soldadiya mer ic tzaꞌn xuꞌj ke mintiꞌ cyipun; ma che jaket ke tlamel ttanmiya cywitz ke aj kꞌoj tiꞌja ex ma che baj tzꞌeꞌy tuꞌn kꞌakꞌ ke t-xtocal tlamela. 14 Chmon baja aꞌ tuꞌntzun tweꞌya cywitz ke aj kꞌoj ma baj cytxolban cyib tiꞌjela; cyuwsan baja ke ja te colbil tiba. Kꞌoncx tiba tuj xokꞌl, waban baja ju xcab txꞌotxꞌ, tzyuma molt tuꞌn tbant lagriy. 15 Atzun cbajel tzꞌeꞌya tuꞌn kꞌakꞌ ex cnajela te jumajx tuꞌn spad, ic tzaꞌn in baj naj awal cyuꞌn ẍplon, cyjaꞌtzun chmet-x cybaje ic tzaꞌn ke ẍplon. 16 Chmet-xix nim cybaj ke comersyant ateꞌ tuja, mer ic tzaꞌn ke cheꞌw ateꞌ twitz cyaꞌj. Mer ic tzaꞌn ẍplon ke, in baj tcyakil cyuꞌn ex in che icꞌtzun. 17 Ke xkꞌukil teya ic cyten ic tzaꞌn ẍplon ex ke nejenel teya ic cyten ic tzaꞌn txkan ẍplon in che oc weꞌ cywitz ke tapya tuj tkꞌijlalil cheꞌw; octzun tjawil kꞌij in che icꞌtzun ex mi jun baꞌn tuꞌn tzaꞌn in cheꞌx.
18 Aya rey te Asiria, ma che cyim ke cwentil t-xjalila. Ax icx ma che cyim ke xjal at cyoclen ttxlaja, cysputin cyib ke t-xjalila cywi witz ex mi aꞌl jun baꞌn toc chmonte cye. 19 Mintiꞌ kꞌanbil tiꞌj xitbil teya; mintiꞌ kꞌanbil tiꞌj ẍil toc tiꞌja. Cycyakil ke xjal in cybiꞌn aju ma tzaj tiꞌja in tzꞌajin cykꞌab tuꞌn tzalajbil tuꞌnju cycyakil o che cꞌixbi tuꞌn nim mya baꞌn o tbinchaya.