Mas tbanil cꞌoquel tja Dios cbantel
2
Tuj 21 tajlal twukin xjaw tzaj yolin Kman juntl maj te Hageo aju t-sanjel, 2 ex xi tmaꞌn te tuꞌn t-xi tmaꞌn te Zorobabel, te Josué ex cye xjal otok che ul meltzꞌaj tuj cytanmi: 3 Ka at jun cyxole o queꞌyinte aju tbanilxix binchben te tja Dios nej, baꞌn tuꞌn ttzaj tmaꞌn ka junx taꞌ tucꞌil ju niban tbant jaꞌlo. ¿Myape ax toc a jlu mintiꞌ ma pon binchben te ic tzaꞌn aju bant nej? 4 Pero tenx tipuna, aya Zorobabel; tenx tipuna Josué, aya nejenel cye pal, ex tenx cyipune cycyakile akeye xjal ateꞌye tuj txꞌotxꞌ lu; che akꞌnane porque chin tele cyucꞌile. Akine Cymane, aju Tajaw Tcyakil in xi nmaꞌne jlu cyeye. 5 Ic tzaꞌn xi ntziyane cyeye tej cyetze tuj Ejipt, aju Nxewe cucx at cyucꞌile. Miꞌn che xobe. 6 Chꞌix tpon tkꞌijlalil tuꞌn ttzaj yucch cyaꞌj ex enter txꞌotxꞌ wuꞌne, tucꞌix mar ex txꞌotxꞌ. 7 Che tzajel luꞌlun cycyakil nasyon wuꞌne ex ctzajel cyiꞌn cykꞌinumabl, ex cnojel njaye tuꞌn wajwalile. Akine Cymane aju Tajaw Tcyakil in chin kꞌmante jlu: 8 Weye aju sak pwak ex kꞌan pwak chi Kman, aju Tajaw Tcyakil. 9 Aju njaye lu mas tbanil cꞌoquel ic tzaꞌn tnejel ex wuꞌne che tel xjal tuj tzalajbil tuj lugar lu. Akine Cymane aju Tajaw Tcyakil in chin kꞌmante jlu.Xi tcawin Dios ke xjal tuꞌn tlaj mintiꞌ japun tyol cyuꞌn
10 Tuj 24 tajlal tbelajin xjaw te tcabin abkꞌi ttzyetlen tcawin rey Darío, tzaj yolin Kman tucꞌil Hageo aju t-sanjel, chi cyjaꞌ: 11 Atzun jlu in tmaꞌn Kman aju Tajaw Tcyakil: Kaninxa cye pal junjun xjel tiꞌj ley cyjaꞌ: 12 Ka at jun xjal ma txi kꞌinte chibj xjansamaj balkꞌiꞌn tuj t-ẍjoꞌw, ex ka ma tzicꞌ tacl ttxaꞌn t-ẍjoꞌw tiꞌj pan, chibj, taꞌl twitz uva, chibj aseyt, ex ka juntl wik chibj, ¿Jacupe che xjanset ke jlu icju? Atzun cye pal tzaj cytzakꞌweꞌn, mlay, che chi. 13 Xi tkanin Hageo juntl xjel cyjaꞌ: Pero ka at jun otok tzꞌilix tuꞌnju toclen tmacoꞌn t-ximlal jun cyimni ex ka ma tzꞌoc tmacoꞌn ke tiꞌxti lu: ¿Mlaype che oc ke jlu te tzꞌil? Atzun cye pal tzaj cytzakꞌwen, jacu, che chi.
14 Xitzun tmaꞌn Hageo: Chi Kman in tmaꞌn: Ictzun in baj cye ke xjal lu: Tcyakil aju in cybinchaꞌn ex tcyakil aju in tzaj cykꞌoꞌn weye, puro tzꞌil ke. 15 Textzun jaꞌlo che ximane tiꞌj jlu, naꞌnxtok ttzyet tuꞌn tjaw binchet njaye, 16 ¿Alcyetok in baj cyiꞌj xjal? Ka at jun ma txiꞌ jatum taꞌ jun byuj twitz awal te winkin malbil, oc tpon kꞌilte nok laj malbil in bant, ex oc t-xiꞌ jun jatum nneꞌl taꞌl twitz uva tuꞌn tjatz tiꞌn 50 ẍokꞌ taꞌl twitz uva, oc tpon kꞌilte nok winkin ẍokꞌ in bant. 17 O naj tcyakil cyakꞌunbene wuꞌne tuꞌn cykꞌikꞌ, yabil ex sakbakun, atzun cyeye mintiꞌ e ajtz meltzꞌaje wucꞌile. Akine Cymane in chin kꞌmante jlu. 18 Cykꞌoꞌnque cwent tiꞌj, jaꞌlo 24 tajlal tbelajin xjaw ma cub keꞌ t-simyentil njaye, ex tzꞌelx cynicꞌe tiꞌj. 19 Masque jaꞌlo mintiꞌ twitz awal cyuj txꞌutxꞌ, ex naꞌnx ttzaj cykꞌoꞌn cywitz ke tkan uva, mi ke tkan higo, mi ke tkan carnad ẍokꞌ, mi ke tkan olivo, pero texju jaꞌlo che bel ncyꞌiwlaꞌne, chi Dios.
Aju yol tzaj ttziyan Kman te Zorobabel
20 Tuj 24 tajlal tbelajin xjaw tzaj yolin Kman juntl maj tucꞌil Hageo, 21 ex xi tmaꞌn te tuꞌn t-xi tmaꞌn te Zorobabel aju gobernador te Judá akeju yol lu: Ctzajel luꞌlun cyaꞌj ex txꞌotxꞌ wuꞌne; 22 che elex nxoꞌne ke kꞌukbil te cawbil, cnajel cyipumal ke cawbil te twitz txꞌotxꞌ wuꞌne, che jawil ntoline ke carwaj in che ajben tuj kꞌoj, cyucꞌix keju ateꞌjx cyuj, che najel ke chej cabay ex ke xjal cyjax cyibaj cbel cybyon cyib cyxolx tuꞌn spad. 23 Ex tuj tkꞌijlalil lu, aya Zorobabel, cꞌoquel nkꞌoꞌne toclena ic tzaꞌn nxmulkꞌabe in ajben te sey, porque akine ma chin jaw scꞌonte teya. Akine Cymane, aju Tajaw Tcyakil in chin kꞌmante jlu.