Aju o til Zacarías tiꞌj jun cyꞌjaj te echbil
2
Ax icx at juntl tzaj yecꞌun weye. O wile jun xinak kꞌiꞌn jun cyꞌjaj te echbil tuꞌn. 2 Xi nkanine te cyjaꞌ: ¿Jatum ma txiꞌya? Atzun te tzaj ttzakꞌweꞌn: Ma chinxe echalte tnam Jerusalén, tuꞌntzun twile jteꞌ tnukbil ex jteꞌ twitz. 3 Atzunte anjel otok yolin wucꞌile xi lakꞌeꞌ chꞌintl ex oc noj juntl anjel twitz, 4 ex tzaj kꞌmaꞌn te cyjaꞌ: Chux ojkelanxa ex kꞌmanxa teju cuꞌxun cyjaꞌ: Mintiꞌ muro cꞌoquel tiꞌjele tnam Jerusalén, tuꞌnju nim xjal cnajal tuj ax icx alumaj. 5 Chi Kman in tmaꞌn: Akine chin oquele te muro puro kꞌakꞌ tiꞌjele tnam Jerusalén ex cxel nyecꞌune wajwalile tuj tnam.Tuꞌn Kman che cletel ke xjal etzan tuꞌn
6 Chi Kman in tmaꞌn: Wuꞌne o baj cysputin cyibe tuj cycyajil pacꞌ twitz txꞌotxꞌ, pero jaꞌlo in xi nmaꞌne cyeye: Jurat-x cyetz oke tuj txꞌotxꞌ tuj tbankꞌab kꞌij. 7 Akeye aj Sión o che pon kꞌiꞌne tuj Babilonia, cyetz oke. Akine Dios ma chin kꞌmante jlu.
8 Ate Kman aju Tajaw Tcyakil ma chin tzaj samaꞌne tuꞌn, tucꞌil jun tkanil cyiꞌj ke nasyon e oc tzokpaj cyiꞌje tuꞌn t-xi cyiꞌn tcyakilju at cyeye, chi cyjaꞌ: Alcye ma tzꞌoc tbinchaꞌn mya baꞌn tiꞌj tnam etzan wuꞌne junx taꞌ ic tzaꞌn tiꞌj t-santil tbakꞌ nwitze nnoꞌc tbinchaꞌn jlu. 9 Cyjaꞌtzun ax kine chin kꞌojile cyiꞌj ke nasyon lu, ex ax ke cymajen che oquel tzokpaj cyiꞌj ex cxel cyiꞌn tcyakilju at cye, chi Dios. Cyjaꞌtzun cꞌelel cynicꞌe tiꞌj, ate Kman aju Tajaw Tcyakil ma tzaj samante weye.
10 Chi Kman in tmaꞌn: Che bitzane tucꞌil tzalajbil akeye najl tuj tnam Jerusalén, porque chin ule najal cyxole. 11 Octzun tpon tkꞌijlalil lu, nim ke nasyon cxel cyniman tyol Kman ex cxel tmaꞌn Kman cyjaꞌ: Ax icx ke nasyon lu che oquel te weye. Oc chin najale cyxole chi Dios. Cyjaꞌtzun cꞌelel cynicꞌe tiꞌj, ate Kman aju Tajaw tcyakil ma tzaj samante weye. 12 Cꞌoquel Kman juntl maj te tajwil txꞌotxꞌ Judá ex cꞌoquel te jun tetzbil nimxix toclen tuj txꞌotxꞌ Xjan ex cjawil t-scꞌoꞌn juntl maj tnam Jerusalén.
13 Cycyakilxwit xjal che cub txuleꞌ twitz Kman, porque ctzajel tuj tnajbil Xjan tuj cyaꞌj.