Aju o til Zacarías tiꞌj tnejel pal Josué
3
Tzaj tyecꞌun Kman weye ate Josué aju tnejel pal waꞌl tcubtok twitz t-anjel Kman. Tuj tbankꞌab Josué tcubtok Satanás in kꞌmantok tiꞌj alcye til Josué. 2 Xitzun tmaꞌn t-anjel Kman te Satanás: Awt Kman mayonte teya. Awt Kman aju in cꞌujlante tnam Jerusalén mayonte teya. Ate xjal lu ic tten ic tzaꞌn jun ttxan siꞌ ma tzꞌetz kꞌiꞌn tuj kꞌakꞌ. 3 Toctok t-xbalun Josué nim tzꞌil tiꞌj ex waꞌl tcubtok twitz t-anjel Kman. 4 Atzunte anjel xi tmaꞌn cye ke onil te tuꞌn tel cyiꞌn t-xbalun Josué, akeju nimtok tzꞌil cyiꞌj. Xi tmaꞌn anjel te Josué cyjaꞌ: Bintza, atzun t-xilen jlu, ma tzꞌel wiꞌne tila ex ma tzꞌoc nkꞌoꞌne t-xbaluna tbanilxix. 5 Xi tmaꞌntl anjel cye ke onil te tuꞌn toc cykꞌoꞌn jun cꞌalbil wibaj sakxix tiꞌj wen tiꞌj twiꞌ Josué. Octzun cykꞌoꞌn jun cꞌalbil twiꞌ Josué ex te tibajxi oc cykꞌoꞌn t-xbalun tbanilxix wen, acux waꞌlxtok ju anjel.6 Xi tmaꞌntl t-anjel Kman te Josué cyjaꞌ: 7 Atzun jlu in tmaꞌn Kman, aju Tajaw Tcyakil: Ka ma beta tuj tumelxix nwitze ex ka ma japun tuꞌna tcyakilju o txi nmaꞌne teya, ax icx cyjel ten njaye tuj tcwenta, cyucꞌix ke ttxaꞌn peꞌn, ex cxel nkꞌoꞌne toclena cyxol keju in che ajben weye. 8 Bintza Josué, aya tnejel pal, ax icx e ttzaj cybiꞌn ke tucꞌila, porque akeye jun techal tiꞌj ju tzul: Lu ctzajel wiꞌne nmajene, aju toc tbi t-xul. 9 Lu ma cub nkꞌoꞌne jun abj twitz Josué, at wuk pacꞌ ttxlaj, ex ax kine chin bel tzꞌibante junjun yol twitz. Ex tuj junx kꞌij cꞌelel baj wiꞌne cyil cycyakil xjal ateꞌ tuj txꞌotxꞌ lu. 10 Octzun tul canun ju kꞌij lu, tuj txubtxaj che ankꞌile; teyle junjun cyeye ctzajel ttxcoꞌn tamiw tuꞌn cyojlane tjakꞌ t-xlecumal tkan higo ex tjakꞌ tkan uva at cyucꞌile. A kine Dios Tajaw Tcyakil in chin kꞌmante jlu.