—¿Ti in tila?

Atzun weye xi ntzakꞌweꞌne:

—In wile jun tcubil candil kꞌan pwak ttxꞌotxꞌil, tucꞌix jun tcubil aseyt tcub tibaj ex wuk candil; ex cyuj wuk tubo in pon canun aseyt cyiꞌj. 3 At cabe tkan olivo tcub ttxlaj tcubil candil, jun tuj tbankꞌab ex jun tuj tnayaj.

4 Ax icx xi nkanine te anjel aju in yolintok wucꞌile:

—Tat, ¿ti t-xilen jlu? Nchiye.

5 Atzunte anjel tzaj ttzakꞌweꞌn cyjaꞌ:

—¿Mintiꞌpetzun baꞌn tuꞌna ti t-xilen?

Xi ntzakꞌweꞌne:

—Tat, mintiꞌ baꞌn wuꞌne, nchiye.

6 Atzunte anjel tzaj tmaꞌn weye:

—Atzun tkanil lu tuꞌn Kman te Zorobabel: Mya tuꞌn cyipumal txkan soldad, ex mya tuꞌn cyipumal xjal cbantel akꞌuntl, nok oꞌcx tuꞌn Nxewe, chi Kman aju Tajaw Tcyakil. 7 ¿Ti toclena aya matij witz? Cꞌoquela te jun chkꞌajlaj twitz Zorobabel. Ate Zorobabel cbel kꞌonte aju mancbil abj tuꞌn tjupet tja Dios, ex cjawiltzun tkꞌajkꞌajel cywiꞌ cycyakil xjal te akꞌbil chjonte: Tbanilxix te jlu, tbanilxix te jlu, che chilo.

8 Tzaj tmaꞌntl Kman juntl tkanil weye:

9 Ate Zorobabel ma cub kꞌonte t-simyentil tja Dios, ex tuꞌnx Zorobabel cpol baj akꞌuntl. Cyjaꞌtzun cꞌelel cynicꞌ tiꞌj, akine Dios aju Tajaw Tcyakil ma chinx samante teya. 10 Akeju mintiꞌ xi cyniman tej ttzaj xeꞌt akꞌuntl, jaꞌlo che jawil tzalaj oc tcyil oc tpon baj akꞌuntl tuꞌn Zorobabel, chi Kman.

Ax icx tzaj tmaꞌntl anjel weye:

—Akeju wuk candil lu, atzun ke tbakꞌ twitz Kman in che queꞌyin tuj tcyakil twitz txꞌotxꞌ.

11 Xi nkanine te anjel: ¿Ti cyxilen ke cabe tzeꞌ olivo cycub ttxlaj tcubil candil, jun tuj tbankꞌab ex jun tuj tnayaj? 12 Ax icx xi nkanintle te: ¿Ti cyxilen ke cabe tkꞌab olivo cycub junx cyucꞌil ke tubo kꞌan pwak cytxꞌotxꞌil, akeju in che ajben tuꞌn tpon aseyt cyiꞌj ke candil?

13 Tzaj ttzakꞌweꞌn anjel:

—¿Mintiꞌpetzun baꞌn tuꞌna ti cyxilen? Xi ntzakꞌweꞌne:

—Tat, mintiꞌ baꞌn wuꞌne, nchiye.

14 Atzun te tzaj ttzakꞌweꞌn:

—Atzun ke cabe xjal lu ma txi kꞌoꞌn cyoclen tuꞌn cyajben te Kman aju Tajaw Tcyakil twitz txꞌotxꞌ.