Aju o til Zacarías tiꞌj jun botzꞌ uꞌj tzꞌiban yol twitz
5
Ax icx o wile jun botzꞌ uꞌj tzꞌiban yol twitz ex in lipantok twitz cyaꞌj. 2 Tzaj tkanin anjel weye:—¿Ti in tila? Chi.
Xi ntzakꞌweꞌne:
—Ma wile jun botzꞌ uꞌj tzꞌiban yol twitz ex in lipan twitz cyaꞌj, at laj var tnukbil ex jweꞌ var twitz. 3 Tzajtzun tmaꞌn anjel weye: Atzun tzꞌibamaj tcyakilju mya baꞌn ctzajel tuj tcyakil twitz txꞌotxꞌ. Ic tzaꞌnx in tmaꞌn tuj jun pacꞌ twitz, cbel cycastiw cycyakil keju ma che elkꞌan, ex cycyakil keju ma txi cytziyan yol mya ax toc, cbel cycastiw tuꞌn cycyim ic tzaꞌnx tzꞌiban tuj juntl pacꞌ. 4 Ate Kman aju Tajaw Tcyakil chi in tmaꞌn cyjaꞌ: A kine chin xel samante mya baꞌn tuj tja ju xjal in elkꞌan ex tuj tja ju xjal in ttziyan yol mya ax toc ex nnoꞌc tkꞌoꞌn kine te testiw tiꞌj tyol. Aju mya baꞌn ax ctel tuj cyja ex cbajel xitj tcyakil tuꞌn, cyucꞌix ke viga ex ke abj.
Aju o til Zacarías tiꞌj jun cajón ex jun xuꞌj
5 Etz aju anjel in yolintok wucꞌile ex tzaj tmaꞌn weye cyjaꞌ:
—Kꞌonca cwent tiꞌj aju ctzajel yecꞌun teya jaꞌlo.
6 Xi nkanine:
—¿Titzun jlu? Nchiye.
Atzun te tzaj ttzakꞌweꞌn:
—Ate jlu jun cajón. Ex tzaj tmaꞌntl: Aju cajón lu, atzun malbil cyil cycyakil ke aj Israel.
7 Tcubtok jun tmaksil cajón, plom ttxꞌotxꞌil. Jaw jakoꞌn tmaksil ex attok jun xuꞌj kꞌukl tcuꞌx tuj. 8 Ex tzaj tmaꞌn anjel weye:
—Aju xuꞌj lu, atzun jun techal tiꞌj ju mya baꞌn, chi.
Cuꞌx tlamoꞌn juntl maj tuj cajón ex cub tmaksiꞌn ttziꞌ tuꞌn tmaksil plom ttxꞌotxꞌil.
9 Xi nqueꞌyine juntl maj ex o wile cabe xuꞌj attok cyxicꞌ mer ic tzaꞌn cyxicꞌ garza ex tuꞌn cykꞌikꞌ in che bet. Xi cyiꞌn aju cajón twitz cyaꞌj.
10 Xitzun nkanine te anjel aju in yolintok wucꞌile:
¿Jatum cpol cyiꞌn xuꞌj aju cajón? Nchiye.
11 Atzunte anjel tzaj ttzakꞌweꞌn:
—Ma cheꞌx binchalte jun tja tuj Babilonia. Octzun tjupet tja, cpol cyiꞌn aju cajón tuj ex axtzun cyjel ten tibaj jun tkꞌukbil.