Aju til Zacarías cyiꞌj cyaje carwaj in che ajben tuj kꞌoj
6
Ax icx o wile cyaje carwaj te kꞌojbil ateꞌ cyxol cabe witz, ic che queꞌyin ic tzaꞌn kꞌan cꞌuxbil. 2 Aju tnejel carwaj jawoꞌntok cyuꞌn chej cyak cyiꞌj; aju tcabin jawoꞌntok cyuꞌn chej kꞌek cyiꞌj; 3 aju toxin jawoꞌntok cyuꞌn chej sak cyiꞌj; aju tcyajin jawoꞌntok cyuꞌn chej sib cyiꞌj ex nimxix cyipun.4 Xi nkanine te anjel aju in yolintok wucꞌile:
—Tat, ¿ti t-xilen jlu? Nchiye.
5 Atzunte anjel tzaj ttzakꞌweꞌn:
—Ake jlu, aketzun cyaje cykꞌikꞌ in che etz twitz Kman aju Tajaw Tcyakil twitz txꞌotxꞌ. 6 Aju carwaj jawoꞌn cyuꞌn chej kꞌek cyiꞌj cyjaꞌ cyxiꞌ tuj txꞌotxꞌ tuj tbankꞌab kꞌij, aju carwaj jawoꞌn cyuꞌn ke chej sak cyiꞌj cyjaꞌ cyxiꞌ tuj txꞌotxꞌ tumlal telex kꞌij, ex aju carwaj jawoꞌn cyuꞌn chej sib cyiꞌj cyjaꞌ cyxiꞌ tuj txꞌotxꞌ tuj tnayaj kꞌij, chi anjel.
7 E jeꞌxtzun ke chej sib cyiꞌj, nimxix cygan tuꞌn tbaj cybetin tuj tcyakil twitz txꞌotxꞌ. Xi tmaꞌn anjel cye: Cybetin baje tuj tcyakil twitz txꞌotxꞌ, chi. Ex o cybincha icju.
8 Te tibajxi jlu, tzaj schꞌin anjel wiꞌje, tzaj tmaꞌn weye cyjaꞌ:
—Akeju e jeꞌx tuj txꞌotxꞌ tuj tbankꞌab kꞌij ma chewix tkꞌoj Kman cyuꞌn tuj ju txꞌotxꞌ ma chixin.
Tej tjax kꞌoꞌn coron tuj twiꞌ Josué
9 Tzaj tmaꞌn Kman tkanil lu weye:
10 —Chmoꞌn jawa chꞌin oyaj cyxol Heldai, Tobías ex Jedaías, akeju eꞌx kꞌiꞌn tuj Babilonia ex o che ajtz meltzꞌaj. Ex ax tuj kꞌij lu txiꞌya tja Josías aju tcyꞌajal Sofonías. 11 Tiꞌj ju sak pwak ex kꞌan pwak cjawil tchmoꞌna, binchama ke coron, ex kꞌon jaxa jun tuj twiꞌ Josué aju tnejel pal ex tcyꞌajal Josadac. 12 Ex kꞌmanxa te cyjaꞌ: Ate Kman aju Tajaw Tcyakil chi cyjaꞌ: Lu xinak aju toc tbi T-xul, tiꞌj ctzajel jlet jun t-xul, ex atzunte cjawil binchante juntl maj aju tja Kman. 13 Cjawil tbinchaꞌn juntl maj tja Kman ex oc tcꞌmaꞌ nimbil ic tzaꞌn jun rey. Cbel keꞌ tuj tkꞌukbil tuꞌn tcawin, cbel keꞌ pal ttxlaj ju tkꞌukbil ex cmojebel cyyol cycabil. 14 Ax che cyjel ten ke coron tuj tja Kman te nabl cye Heldai, Tobías, Jedaías ex Josías aju tcyꞌajal Sofonías.
15 Che ul ke xjal te najchak onil tuꞌn tjaw binchet juntl maj tja Kman; cꞌeleltzun cynicꞌe tiꞌj, ate Kman aju Tajaw Tcyakil ma tzaj samante weye. Cbantel jlu ka ma txi cynimane tyol Kman aju Cydiose.