In cub cyyoꞌn weꞌyaj, pero mya ax toc cyuꞌn
7
Tuj tcyajin kꞌij te tbelajin xjaw (aju xjaw toc tbi Quisleu), tej lajoꞌntok tcyajin abkꞌi ttzyetlen tcawin rey Darío, tzaj tmaꞌn Kman jun tkanil te Zacarías aju t-sanjel. 2 Tuj tkꞌijlalil lu, ke xjal tuj tnam Betel xi cysamaꞌn Sarezer tucꞌix Regem-melec cyucꞌix ke mastl cyucꞌil tuꞌn t-xi cykanin tcyꞌiwbil Kman 3 ex tuꞌn t-xi cykanin cye ke t-sanjel Dios ex cye ke pal ateꞌ tuj tja Kman aju Tajaw Tcyakil, che chi cyjaꞌ: ¿Cucxpe ko bisule ex cucxpe cbel kyoꞌne weꞌyaj tuj tjweꞌyin xjaw tuj junjun abkꞌi ic tzaꞌn in kbinchaꞌne ma tzꞌel elaꞌxi abkꞌi ex cucx jaꞌlo? Che chi.4 Tzaj yolin Kman weye, aju Tajaw Tcyakil, ex tma cyjaꞌ: 5 Kꞌmanxa cye cycyakil tnam xjal najlke tuj txꞌotxꞌ lu ex cye ke pal: Ma bant-xi 70 abkꞌi in cub cyyoꞌne weꞌyaj ex in che bisune tuj tjweꞌyin ex tuj twukin xjaw te junjun abkꞌi, pero mintiꞌ in cybinchaꞌne jlu tuꞌn njaw cynimsaꞌne, 6 nok oꞌcx, oc in che waꞌne ex oc in che cꞌane in cybinchaꞌne nok tuꞌn tnoj cycꞌuꞌje, chicuya cye. 7 ¿Myapetzun ax yol lu o kꞌmanjtz tuꞌn Kman cyuꞌn ke t-sanjel o che ten ojtxi, tej attok tnam Jerusalén tuj txubtxaj ex tej attok nimcu xjal tuj, ex ateꞌxtok xjal cyuj ke tnam ateꞌ tiꞌjele tnam Jerusalén, ex tej najlkeꞌxtok ke xjal tuj Néguev ex tuj chkꞌajlaj t-xe witz?
Tuꞌnju miban che niman, cyjaꞌtzun e jeꞌx kꞌiꞌn pres tuj juntl lugar
8 Tzaj yolin Kman tucꞌil Zacarías aju t-sanjel ex chi cyjaꞌ: 9 Atzun jlu o txi nmaꞌne: Cybinchanxe cyiꞌj xjal tuj tumelxix, cybinchame xtalbil ex tenxwit tkꞌakꞌbil cycꞌuꞌje cyiꞌj cyucꞌile. 10 Miꞌn cub cyyajlaꞌne ke meba xuꞌj, mi ke cꞌwaꞌl mintiꞌ cyman ex cytxuꞌ, mi ke stranjer xjal ex mi ke meba mintiꞌ at cye. Miꞌn cub cyximane tuꞌn toc cybinchaꞌne mya baꞌn tiꞌj cyucꞌile, chi Dios. 11 Pero mintiꞌ cub tuj cywitz xjal tuꞌn t-xi cyniman. Cycyakil ajtz cykꞌoꞌn ttzal cyiꞌj twitz Dios ex oc cymaksiꞌn cyẍcyin tuꞌn miꞌn cybinte tyol. 12 Cub cycyuwsaꞌn cyanmi ic tzaꞌn abj cyuw, tuꞌn miꞌn t-xi cybiꞌn ke xnakꞌtzbil ex ke yol e tzaj tmaꞌn Kman aju Tajaw Tcyakil, aju o tzaj tmaꞌn cye t-sanjel ojtxi.
Cyjaꞌtzun tzaj nimxix tkꞌoj Kman aju Tajaw Tcyakil, 13 ex tma: Tzaꞌnxtzun cye mintiꞌ ma chinx cybiꞌn tej nyoline, cyjaꞌxtzun weye, mlay cheꞌx nbiꞌne oc cytzaj yolin weye. 14 Cyjaꞌtzun e baj nsputine ic tzaꞌn tuꞌn xcyakinpaẍ cyxol cycyakil nasyon mintiꞌ ojtzkiꞌn cyuꞌn, ex cyetzlenxi tuj cytanmi oc cytxꞌotxꞌ te tzkij txꞌotxꞌ jatum mi jun xjal jacu najan tuj. Tbanilxix aju txꞌotxꞌ ex cyuꞌnx ma tzꞌoc te tzkij txꞌotxꞌ.