Aju yol tzaj ttziyan Kman
8
Ate Kman aju Tajaw Tcyakil tzaj tmaꞌn tkanil lu weye: 2 Akine Dios aju Tajaw Tcyakil, atzun jlu in xi nmaꞌne: At nimxix nganiye tiꞌj tnam Sión ex ma tzaj nimxix ntxꞌuꞌjile cyiꞌj ke aj kꞌoj tiꞌj. 3 Jaꞌlo chin ajel meltzꞌaje tuj Jerusalén tuꞌntzun nnajane tuj. Cꞌoquel kꞌoꞌn tbi tnam Jerusalén: Aju tnam jatum ateꞌ ke xjal in japun tyol Dios cyuꞌn; ex aju witz etzan wuꞌne, cꞌoquel tbi: Aju Witz Xjan. Akine Tajaw Tcyakil. 4 Che bel keꞌ juntl maj ke tij xinak ex ke tij xuꞌj cyuj ke cay tuj Jerusalén, ex teyle junjun kꞌiꞌn tcyꞌakoꞌch tuꞌn tlaj nimxix cyabkꞌiyil. 5 Che nojel ke cay tuj tnam cyuꞌn ke tal kꞌa ex ke tal txin in che schan. 6 Tuj tkꞌijlalil tzul, tcyakil jlu cꞌoquel te jun binchben maꞌxix t-xilen tuj cywitz ke xjal etzan wuꞌne, akeju che cyjel ankꞌintl, atzun weye tuj nwitz mya jun binchben maꞌ t-xilen jlu. Akine Dios Tajaw Tcyakil in chin kꞌmante jlu. 7 Ke xjal etzan wuꞌne che cletel wuꞌne tjakꞌ cycawbil xjal ateꞌ tuj txꞌotxꞌ tuj tjawitz kꞌij ex tuj txꞌotxꞌ tuj telex kꞌij, 8 ex che ajetz wiꞌne juntl maj tuꞌn cynajan tuj Jerusalén. Che oquel te jun tnam etzan wuꞌne, atzun weye chin oquele te Cydios axix toc ex tzꞌaklxix kine.9 Atzun jlu in tmaꞌn Kman aju Tajaw Tcyakil: Cykꞌonque tilil akꞌuntl, akeye ma cybiye jaꞌlo aju o kꞌmanjtz ojtxi cyuꞌn ke t-sanjel Dios atxix tej tcub keꞌ simyent tuꞌn tjaw binchet juntl maj tja Kman aju Tajaw Tcyakil. 10 Ojtxi mintiꞌtok chojbil twi cycꞌuꞌj xjal ex mi ke alumaj. Ex tuꞌn cylaj ke aj kꞌoj, mintiꞌtok ttxubtxajal at cyxol xjal ex ax kine otok chin cub kꞌonte kꞌoj cyxol xjal. 11 Atzun jaꞌlo mlay nbinchatle cyiꞌj ke xjal che cyjel tentl tuj tnam lu ic tzaꞌn o bant wuꞌne ojtxi. A kine Dios Tajaw Tcyakil in chin kꞌmante jlu: 12 Tuj txubtxaj che xeꞌl xjal awal, cꞌoquel twitz uva; ctzajel tkꞌoꞌn txꞌotxꞌ tawal ex ctzajel jbal cabalxix. Tcyakil jlu cxel nkꞌoꞌne te cyetzbil ke xjal etzan wuꞌne, akeju che cyjel ten. 13 Akeye aj Judá ex aj Israel, ic tzaꞌn o che yolin xjal mya baꞌn cyiꞌje tej cytene cyuj ke nasyon, icxtzun che cletele wuꞌne jaꞌlo ex che oquele te cyꞌiwbil. Miꞌn che xobe, cykꞌoꞌnc cyipune.
14 Atzun jlu in tmaꞌn Kman aju Tajaw Tcyakil: Cub nximane tuꞌn tcub nkꞌoꞌne cycastiw cyxeꞌchele ojtxi tej ttzaj nkꞌoje cyuꞌn ex mintiꞌ icꞌx tiꞌj wuꞌne. 15 Atzun jaꞌlo ma cub nximane tuꞌn nbinchanteye baꞌn cyiꞌj aj Jerusalén ex cyiꞌj aj Judá. Cyjaꞌtzun, miꞌn che xobe. 16 Atzun jlu tuꞌn cybinchanteye: Che yoline axix toc cyucꞌil mastl, cybinchanxe cyiꞌj xjal tuj tumelxix ex tzꞌoc tililx cyuꞌne tuꞌn tbant cyten xjal cyxolx oc cypon xtisil. 17 Miꞌn cub cyximane tuꞌn cybinchanteye mya baꞌn cyiꞌj cyucꞌile ex miꞌn txi cytziyane yol mya ax toc, porque tcyakil jlu nneꞌl wicꞌune. Akine Dios in chin kꞌmante jlu.
18 Ate Kman aju Tajaw Tcyakil tzaj tmaꞌn weye cyjaꞌ: 19 Aju tuꞌn tcub cyyoꞌne weꞌyaj tuj tcyajin xjaw, tuj tjweꞌyin, tuj twukin ex tuj tlajiꞌn, jaꞌlo cꞌoquel te tzalajbilxix cyeye ex te ninkꞌij tzalajbilxix cye ke tiyjil Judá. Che tzalajxe tiꞌj ju yol axix toc ex tuꞌn cytene baꞌn cyxolxe.
20 Atzun jlu in tmaꞌn Kman aju Tajaw Tcyakil: Che ul nimcu cꞌloj xjal tzalu ex ke xjal najlke cyuj ke nintz tnam. 21 Ke xjal tuj jun tnam che xeꞌl cyucꞌil xjal tuj juntl tnam ex cxel cymaꞌn cye cyjaꞌ: Koꞌ ke jyolte Kman aju Tajaw Tcyakil, koꞌ kanilte tuꞌn kcub tcyꞌiwlaꞌn, che chilo. Ex atzun ke xjal tuj juntl tnam ctzajel cytzakꞌweꞌn cyjaꞌ: Ax icx keye ko xeꞌle, che chilo. 22 Che ul tuj Jerusalén nimcu tnam ex ke nasyon nim cyipun, che ul jyolte Kman aju Tajaw Tcyakil, che ul kanil te tuꞌn cycub cyꞌiwlaꞌn tuꞌn. 23 Tuj tkꞌijlalil tzul, laj stranjer xjal cye mastl nasyon ctzajel cytzyuꞌn ttxaꞌn t-xbalun jun xjal judiy ex cxel cymaꞌn te cyjaꞌ: Kaje koꞌxe cyucꞌile, porque ma kbiye atzun taꞌ Dios cyucꞌile, che chilo.